ଫୁଲବାଣୀ, ୧୯/୫ : କନ୍ଧମାଳ ଜିଲ୍ଲାର ଅନେକ ସ୍ଥାନରେ ଆଜି ପର୍ଯ୍ୟନ୍ତ ପହଞ୍ଚି ପାରିନାହିଁ ମୋବାଇଲ ନେଟୱାର୍କ ସୁବିଧା। କିଛି ସ୍ଥାନରେ ଟାଓ୍ବାର ବସିଥିଲେ ମଧ୍ୟ ଠିକରେ କାମ କରୁନାହିଁ। ଫଳରେ ଗ୍ରାମବାସୀଙ୍କୁ ଜରୁରୀ ସମୟରେ ଯୋଗାଯୋଗ କରିବା ସହିତ ବିଭିନ୍ନ ଅନଲାଇନ କାମ ପାଇଁ ବହୁ ସମସ୍ୟାର ସମ୍ମୁଖୀନ ହେବାକୁ ପଡୁଛି। ଫିରିଙ୍ଗିଆ ବ୍ଲକ ଡିଣ୍ଡିରା ଗାଁ ପଞ୍ଚାୟତର ଲୋକେ ଦୀର୍ଘ ଦିନ ଧରି ଏଭଳି ସମସ୍ୟାର ସମ୍ମୁଖୀନ ହୋଇ ଆସୁଛନ୍ତି। ବାରମ୍ବାର ଅଭିଯୋଗ ଓ ଦାବି ସତ୍ତ୍ଵେ ଏହାର ସମାଧାନ ହେଉନାହିଁ। ତେଣୁ ସୋମବାର ବାଧ୍ୟ ହୋଇ ଗ୍ରାମବାସୀ ରାସ୍ତାକୁ ଓହ୍ଲାଇଛନ୍ତି। ଫୁଲବାଣୀ-ବାଲିଗୁଡ଼ା ରାସ୍ତାର ଡିଣ୍ଡିରା ଗାଁ ଠାରେ ରାସ୍ତା ଅବରୋଧ କରିଛନ୍ତି।
ରାସ୍ତାରୋକ ଯୋଗୁଁ ଫୁଲବାଣୀ-ବାଲିଗୁଡ଼ା ମୁଖ୍ୟ ରାସ୍ତା ଦେଇ ଯାତାୟାତ ସମ୍ପୂର୍ଣ୍ଣ ବ୍ୟାହତ ହୋଇଛି। ଉଭୟ ପାର୍ଶ୍ବରେ ବହୁ ସଂଖ୍ୟାରେ ଗାଡି ଅଟକି ରହିଛି। ସ୍ଥାନୀୟ ପୁଲିସ ଓ ପ୍ରଶାସନିକ ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରୁଛନ୍ତି। ତେବେ ସମସ୍ୟାର ସମାଧାନ ନହେବା ପର୍ଯ୍ୟନ୍ତ ରାସ୍ତାରୁ ଉଠିବେ ନାହିଁ ବୋଲି ଆନ୍ଦୋଳନକାରୀ କହିଛନ୍ତି।
