ନୂଆଦିଲ୍ଲୀ,୧୨/୦୫: ପ୍ରଥମେ ରୋହିତ ଆଉ ଏବେ ବିରାଟ କୋହଲି । ୫ ଦିନରେ କ୍ରିକେଟର ଦୁଇ କିମ୍ବଦନ୍ତୀ ଟେଷ୍ଟ କ୍ରିକେଟରୁ ଅବସର ନେଇଛନ୍ତି । ଏହାକୁ ଭାରତୀୟ କ୍ରିକେଟର ଗୋଟିଏ ଯୁଗ ଶେଷ ହୋଇଛି ବୋଲି କୁହାଯିବ । ଏବେ ମୈଦାନରେ ଧଳା ଜର୍ସିରେ ରୋ-କୋଙ୍କୁ ଆଉ ଦେଖିବାକୁ ମିଳିବ ନାହିଁ । ରୋହିତଙ୍କ ପରେ ଏବେ କୋହଲି ସନ୍ନ୍ୟାସ ନେଇ ଏକ ପ୍ରଶ୍ନବାଚୀର ଗାର ଟାଣି ଦେଇଛନ୍ତି । ଏମିତି ସୟମରେ କୋହଲି ଅବସର ନେଇଛନ୍ତି ଯେ, ସମସ୍ତେ କହୁଛନ୍ତି ଏମିତି ବି କଣ ଜଲଦୀ ଥିଲା ।
ଏମିତିରେ କୌଣସି ପ୍ଲେୟାର ବିରାଟ କୋହଲି ହୋଇ ଯାଆନ୍ତି ନାହିଁ । ୩୬ ବର୍ଷୀୟ ହେଲେ ବି ବିରାଟଙ୍କର ଫିଟ୍ନେସ, ଏନର୍ଜି ଲେବଲ, ଜୋସ୍, ପୂର୍ତ୍ତି ଏକଦମ୍ ଅଲଗା ଥିଲା । ତାଙ୍କ ଖେଳିବା ଷ୍ଟାଇଲ୍ ତାଙ୍କୁ ସ୍ୱତନ୍ତ୍ର କରିଥିଲା । କିଙ୍ଗ୍ ରନ୍ ମେସିନ୍ର ପରିଚୟ ଦେଇଥିଲା । ସେ ଆଉ ଦୁଇ ବର୍ଷ ଟେଷ୍ଟ କ୍ରିକେଟ ଖେଳିପାରିଥାନ୍ତେ । ବିସିସିଆଇ ତାଙ୍କୁ ମନାଇବାକୁ ଚେଷ୍ଟା କରିଥିଲା ହେଲେ କିଙ୍ଗ କୋହଲି ତାଙ୍କ ମନ କଥା ଶୁଣିଲେ । ଅବସର ଘୋଷଣା କରିଦେଲେ । ଅଧିନାୟକ ଭାବେ ଶତକ, ସର୍ବାଧିକ ସ୍କୋର, ସବୁଠୁ ଅଧିକ ଡବଲ ସେଞ୍ଚୁରୀ ରେକର୍ଡ ତାଙ୍କ ନାମରେ ରହିଛି ।
ଅବସର ପଛରେ ପ୍ରଶ୍ନଗାର- ଦୁଇଦିନ ତଳେ ଅବସର ନେଇ ବିସିସିଆଇକୁ ଜଣାଇଥିଲେ । ବିସିସିଆଇ ତାଙ୍କୁ ନିଷ୍ପତ୍ତି ବଦଳାଇବାକୁ କହିଥିଲା । ହେଲେ ନିଷ୍ପତ୍ତିରେ ଅଟଳ ରହିଲେ ବିରାଟ କୋହଲି । ୧୪ ବର୍ଷର ଟେଷ୍ଟ କ୍ରିକେଟ କ୍ୟାରିୟରରେ ପୂର୍ଣ୍ଣଚ୍ଛେଦ ପକାଇଛନ୍ତି । ଅଚାନକ ତାଙ୍କ ନିଷ୍ପତ୍ତି ଉପରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି । ବିସିସିଆଇ ସହ ତାଙ୍କର ମତାନ୍ତର ଥିବା କୁହାଯାଉଛି । କିଛି ରିପୋର୍ଟ ଆସିଛି କି ରୋହିତଙ୍କ ପରେ ସେ ଇଂଲଣ୍ଡ ବିପକ୍ଷରେ ଅଧିନାୟକ ହେବାକୁ ଚାହୁଁଥିଲେ । ହେଲେ ବିସିସିଆଇ ତାଙ୍କୁ ସଫାସଫା ମନା କରି ଦେଇଥିଲା ।
ଅଧିକ ପଢନ୍ତୁ...ଟେଷ୍ଟ କ୍ରିକେଟରୁ ବିରାଟ କୋହଲିଙ୍କ ଅବସର ଘୋଷଣା; ଇନଷ୍ଟାରେ ଲେଖିଲେ ୨୬୯ ସାଇନିଂ ଅଫ୍
ଟେଷ୍ଟରେ ଭାରତର ସର୍ବଶ୍ରେଷ୍ଠ ଅଧିନାୟକ- ରନ୍ ମେସିନ୍ ବିରାଟ କୋହଲିଙ୍କର ସଫଳ ଟେଷ୍ଟ ଅଧିନାୟକ ଭାବେ ଚମତ୍କାର ରେକର୍ଡ ରହିଛି । ସେ ୬୮ଟି ମ୍ୟାଚରୁ ୪୦ଟିରେ ଭାରତକୁ ବିଜୟୀ କରାଇଛନ୍ତି । ୧୭ଟି ହାରିଛନ୍ତି ୧୧ଟି ଡ୍ର ହୋଇଛି । ଭାରତର ସବୁଠୁ ସଫଳ ଅଧିନାୟକ ତାଲିକାରେ କୋହଲି ଆଗରେ ରହିଛନ୍ତି । ଅନ୍ୟମାନଙ୍କ ମଧ୍ୟରେ ମହେନ୍ଦ୍ର ସିଂହ ଧୋନି ୬୦ଟି ଟେଷ୍ଟରେ ନେତୃତ୍ୱ ନେଇ ୨୭ଟି ଟେଷ୍ଟ ଜିତାଇଥିବାବେଳେ ସୌରଭ ଗାଙ୍ଗୁଲି ୪୯ଟି ଟେଷ୍ଟରେ ନେତୃତ୍ୱ ନେଇ ୨୧ଟି ଟେଷ୍ଟ ଜିତାଇଛନ୍ତି । ସର୍ବକାଳୀନ ଶ୍ରେଷ୍ଠ ଟେଷ୍ଟ ଅଧିନାୟକ ତାଲିକାରେ ମଧ୍ୟ କୋହଲି ଚତୁର୍ଥ ସ୍ଥାନରେ ରହିଛନ୍ତି ।
ଥ୍ୟାଙ୍କ ୟୁ କିଙ୍ଗ୍- ଏବେ ଆଉ ବିରାଟ କୋହଲିଙ୍କୁ ଧଳା ଜର୍ସିରେ ଦେଖିବାକୁ ମିଳିବ ନାହିଁ । ଆଉ ତାଙ୍କ ବ୍ୟାଟିଂ ଷ୍ଟାଇଲ ଦେଖିବାକୁ ପାଇବେନି ଫ୍ୟାନ୍ସ । ଏବେ ଆଉ ଟେଷ୍ଟରେ ତାଙ୍କର ସଙ୍କଟମୋଚକ ଅବତାର ଦେଖିବାକୁ ମିଳିବନି । କୋହଲିଙ୍କର ଜବରଦସ୍ତ କ୍ୟାରିୟର ଥିଲା! ଥ୍ୟାଙ୍କ ୟୁ ବିରାଟ୍ କୋହଲି !ଭାରତୀୟ କ୍ରିକେଟ ଦଳର କିଙ୍ଗ୍ । ଥ୍ୟାଙ୍କ ୟୁ ।
