ନୂଆଦିଲ୍ଲୀ,୫।୪: ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସଂସଦରେ ପାସ୍ ହୋଇଥିବା ଓ୍ବାକଫ୍ ସଂଶୋଧନ ଅଧିନିୟମକୁ ନେଇ ଆଗାମୀ ପ୍ଳାନ ବିଷୟରେ ସୂଚନା ଦେଇଛନ୍ତି। ମହାରାଜଗଞ୍ଜରେ ଯୋଗୀ କହିଛନ୍ତି, ଲକ୍ଷାଧିକ ଏକର ଜମି ଓ୍ବାକଫ୍ ବୋର୍ଡର ନାଁରେ କବଜା କରି ନିଆଯାଇଛି। ଅଳ୍ପ କିଛି ଲୋକଙ୍କୁ ଲୁଟ୍ର ମାଧ୍ୟମ ହୋଇଯାଇଥିଲା। ଏହାକୁ ନେଇ ଏବେ ସମ୍ପୂର୍ଣ୍ଣ ଭାବରେ ଲଗାମ ଲଗାଇ ଦିଆଯିବ। ଏହି ସବୁ ଜମିକି ଫେରାଇ ନିଆଯିବ। ଏ ସବୁକୁ ମଧ୍ୟ ସାର୍ବଜନୀନ କରାଯିବ। ସେଥିରେ ସ୍କୁଲ, ହସ୍ପିଟାଲ, କଲେଜ ଓ ମେଡିକାଲ କଲେଜ ତିଆରି କରାଯିବ।
ସିଏମ୍ ଯୋଗୀ ମହାରାଜଗଞ୍ଜରେ ନୌତନଭା ବ୍ଲକର ରତନପୁରରେ ଦେଢ ଶହ କୋଟି ମୂଲ୍ୟରେ ତିଆରି ରୋହିନ ବ୍ୟାରେଜ୍କୁ ଲୋକାର୍ପଣ କରିବା ପରେ ଲୋକଙ୍କୁ ସମ୍ବୋଧିତ କରିଥିଲେ। ସେ ଗତ ସରକାର ଉପରେ ଟାର୍ଗେଟ କରି କହିଥିଲେ, ଦୀର୍ଘ ବର୍ଷ ପର୍ଯ୍ୟନ୍ତ ଉତ୍ତର ପ୍ରଦେଶର ଦାୟିତ୍ବ ନେଇଥିବା ସରକାର ପାଖରେ ନିଜର ପେଟ ଭରିବା ଛଡା ଅନ୍ୟ କିଛିର ଫୁରସତ୍ ନଥିଲା।
ଯୋଗୀ କହିଛନ୍ତି ଆଗାମୀ ୩ ବର୍ଷରେ ୟୁପିରୁ ଗରିବି ଶେଷ ହେବ। ‘ଗରିବ ଶୂନ୍ୟ ଲକ୍ଷ୍ୟକୁ ପୂରଣ କରି ଉତ୍ତର ପ୍ରଦେଶକୁ ଦେଶରେ ଅର୍ଥବ୍ୟବସ୍ଥା ମାମଲାରେ ଏକ ନମ୍ବର ରୂପରେ ସ୍ଥାପିତ କରିବୁ। ପୂର୍ବତନ ସରକାର ପ୍ରତି ଜିଲ୍ଲାରେ ଗୋଟିଏ ମାଫିଆ ପାଳିକି ରଖିଥିଲେ। ଏବେ ଆମେ ସେହି ମାଫିଆଙ୍କ ଜାଗାରେ ଗୋଟିଏ ଗୋଟିଏ ମେଡିକାଲ କଲେଜ ତିଆରି କରିଛୁ।
