ଭୁବନେଶ୍ୱର,୧୦/୧୧: ରାଜ୍ୟରେ ରବି ଫସଲ ପାଇଁ ପାଗ ପ୍ରତିକୂଳ ରହିଛି । ଏ ବର୍ଷ ରାଜ୍ୟରେ ଶୀତ ଆସିବାରେ ବିଳମ୍ବ ହେବ । ପୁଣି ସ୍ୱାଭାବିକଠାରୁ ଅଧିକ ତାତି ଓ କମ୍ ବର୍ଷା ଯୋଗୁ ରବି ଫସଲ ରବି ଫସଲ ପାଇଁ ବାଧକ ସାଜିପାରେ ବୋଲି ବରିଷ୍ଠ କୃଷି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ପୂର୍ବାନୁମାନ କରିଛନ୍ତି । କମ୍ ଅବଧି ଆକଳନ ମଧ୍ୟ ଅନ୍ୟତମ କାରଣ ବୋଲି ସେ କହିଛନ୍ତି ।
ପ୍ରଫେସର ଡ. ପଶୁପାଳକଙ୍କ ଆକଳନ କହୁଛି, ଶୀତ ଦିନରେ ଡାଲିଜାତୀୟ ଓ ତୈଳବୀଜ ଜାତୀୟ ଫସଲ ସହିତ ପନିପରିବା ଚାଷ ହୁଏ । ରବି ଫସଲ ଭାବେ ଜଳସେଚିତ ଓ ଅଣଜଳସେଚିତ ଜମିରେ ଏହାକୁ ଚାଷ କରାଯାଏ । ଗତ ଅକ୍ଟୋବର ମାସ ୧ ତାରିଖରୁ ନଭେମ୍ବର ୯ ତାରିଖ ଯାଏ ରାଜ୍ୟରେ ବର୍ଷା ପରିମାଣ ୪୧% କମ୍ ରହିଛି । ବାତ୍ୟା ‘ଦାନା’ ପ୍ରଭାବରେ କିଛି ଉପକୂଳ ଜିଲ୍ଲାରେ ଭଲ ବର୍ଷା ହୋଇଛି । ପୁଣି କିଛି ଜିଲ୍ଲାରେ ୮୦% ନିଅଣ୍ଟିଆ ବର୍ଷା ହୋଇଛି । ତାପମାତ୍ରା ମଧ୍ୟ ସ୍ୱାଭାବିକଠାରୁ ଅଧିକ ରହୁଛି । ଉପକୂଳ ଓ ପଶ୍ଚିମ ଓଡ଼ିଶାରେ ସର୍ବାଧିକ ତାପମାତ୍ରା ୩୩ରୁ ୩୫ ଡିଗ୍ରୀ ଭିତରେ ରହୁଥିବାବେଳେ ଅଳ୍ପ କିଛି ସ୍ଥାନରେ ଏହା ସର୍ବନିମ୍ନ ତାପମାତ୍ରା ୨୦ଡିଗ୍ରୀ ତଳେ ରହିଛି
ତାପମାତ୍ରା ୨୦ଡିଗ୍ରୀରୁ କମ୍ ନ ହେଲେ ଗଛରେ ଆଳୁ ଧରେନି । ସର୍ବନିମ୍ନ ତାପମାତ୍ରା ୧୫ ଡିଗ୍ରୀ ସେଲସିୟସ୍ ଥିଲେ ଏହା ଆଳୁ ଫସଲ ପାଇଁ ଉପଯୁକ୍ତ । ତାପମାତ୍ରା ଅଧିକ ରହିଲେ ଛୋଟ ଆଳୁ ବାହାରେ ଓ ଉତ୍ପାଦନ ବି କମିଯାଏ । ଏବେ ଆଳୁ ଫସଲ ପାଇଁ ଅନୁକୂଳ ପାଗ ସୃଷ୍ଟି ହୋଇନି । ସେହିଭଳି ଅକ୍ଟୋବର ମାସ ପରେ ପିଆଜ ଲଗାଯାଏ । ପାଣିପାଗ ବିଭାଗର ଆକଳନ ଅନୁସାରେ ଆସନ୍ତା ୧୦ଦିନ ଯାଏ ଦକ୍ଷିଣ ଓଡ଼ିଶାରେ ତାପମାତ୍ରା ବିଶେଷ ବଦଳିବନି ।
ସେହିଭଳି ମୁଗ, ବିରି, ସୋରିଷକୁ ରବି ଫସଲ ଭାବେ ଚାଷ କରାଯାଏ । ପଶ୍ଚିମ ଓଡ଼ିଶାରେ ଚଣା ଏକ ପ୍ରମୁଖ ରବି ଫସଲ । କମ୍ ବର୍ଷା ଓ ତାପମାତ୍ରାଜନିତ ବାଷ୍ପୀକରଣ ଅଧିକ ଯୋଗୁ ଅଧିକ ପାଣି ଆବଶ୍ୟକତା ହେଉଛି । ଫଳରେ ଏ ସବୁ ଚାଷ କଲେ ଗଛ ବଢ଼ିବା ପ୍ରଭାବିତ ହେବ । ଫୁଲ ଓ ଛୁଇଁ ଧରିବା ମଧ୍ୟ କମିବ ବୋଲି ସେ କହିଛନ୍ତି । ଶୀତ ଦିନରେ ଟମାଟୋ ଓ ବିନସ୍ ସହିତ କୋବି ଜାତୀୟ ଓ ଅନ୍ୟ ଫସଲ ଲଗାଯାଏ । ଏ ସବୁ ଚାଷ ପାଇଁ ଜଳସେଚନର ସୁବିଧା ଥିବା ଦରକାର । ପୁଣି ରୋଗ ଓ ପୋକର ପ୍ରାର୍ଦୁଭାବ ବଢ଼ିବାର ଆଶଙ୍କା ଅଛି । ଫଳରେ ଅମଳ କମିବା ସହ ପନିପରିବାର ମାନ କମିବ ବୋଲି ସେ ଆକଳନ କରିଛନ୍ତି ।
ଶୀତ ଦିନରେ କାକର ପଡ଼ିଲେ ଏହା ରବି ଫସଲ ପାଇଁ ପ୍ରାକୃତିକ ଭାବେ ଜଳୀୟ ଉତ୍ସର ଆବଶ୍ୟକତା ପୂରା କରେ । ଏବେ ରାତି ତାପମାତ୍ରା ଯେତିକି ରହୁଛି ତାହା କାକର ସୃଷ୍ଟି ପାଇଁ ଅନୁକୂଳ ହେଉନି । ଆସନ୍ତା ସପ୍ତାହରେ ବି କାକର ପଡ଼ିବା ବା କୁହୁଡ଼ି ହେବାର ସମ୍ଭାବନା କ୍ୱଚିତ୍ । ଏଥିପାଇଁ ରବି ଫସଲ ପ୍ରଭାବିତ ହୋଇପାରେ । ତୁରନ୍ତ କେନାଲ ଜଳସେଚନ ପାଇଁ ଆରମ୍ଭ କରିବାକୁ ସେ ପରାମର୍ଶ ଦେଇଛନ୍ତି
