ଭୁବନେଶ୍ୱର,୦୩/୦୨: ଫେବ୍ରୁଆରୀ ମାସ ଆରମ୍ଭରୁ ଅସମ୍ଭାଳ କଲାଣି ତାତି । ଆଗକୁ ଆହୁରି ବଢ଼ିବ । ରାତିରେ ଆଉ ଶୀତ ଅନୁଭୂତ ହେବନି । ପାଣିପାଗ ବିଶେଷଜ୍ଞ ଏଭଳି ପୂର୍ବାନୁମାନ କରିଛନ୍ତି ।
ଚଳିତ ବର୍ଷ ପ୍ରଥମ ଥର ପାଇଁ ତାପମାତ୍ରା ୩୬ ଡିଗ୍ରୀ ପାର୍ କରିଛି । ରବିବାର ବଲାଙ୍ଗିରରେ ତାତି ୩୬.୭ ଡିଗ୍ରୀ ସେଲସିୟସ୍ ରେକର୍ଡ ହୋଇଛି । ଟିଟିଲାଗଡ଼ରେ ୩୬, ପାରଳାଖେମୁଣ୍ଡିରେ ୩୫.୮, ଝାରସୁଗୁଡ଼ାରେ ୩୫.୬, ସମ୍ବଲପୁରରେ ୩୫.୧ ଓ ଭବାନୀପାଟଣାରେ ୩୫ ଡିଗ୍ରୀ ରେକର୍ଡ ହୋଇଛି । ଶନିବାର ଭୁବନେଶ୍ୱରରେ ତାତି ୩୩.୬ ଡିଗ୍ରୀ ଥିଲା । ଆଜି ଏହା ୩୪.୯ ଡିଗ୍ରୀକୁ ବଢ଼ିଛି । ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ ଆକଳନ କରି କହିଛନ୍ତି, ତାପମାତ୍ରା ଅଧିକ ରହିବା ଯୋଗୁ ଦିନରେ ଗରମ ଅନୁଭୂତ ହେବ । ରାତିରେ ପାଣିପାଗ ସ୍ଥିତି ଆରାମଦାୟକ ରହିବ । ଦିନ ତାପମାତ୍ରା ବଢ଼ିବା, କମିବା ଜାରି ରହିବ ।
୫ ତାରିଖରେ ତାତି ଅଧିକ ହେବ । ୬ ତାରିଖରୁ ତାତି ସାମାନ୍ୟ କମିବ । କିନ୍ତୁ ଶୀତ ଆଉ ଫେରିବନି ବୋଲି ସେ କହିଛନ୍ତି । ନୂଆପଡ଼ାରେ ରାତି ତାପମାତ୍ରା ୧୫ ଡିଗ୍ରୀ ଥିଲା । ପାରାଦୀପରେ ୨୩ ଡିଗ୍ରୀ ରେକର୍ଡ ହୋଇଥିଲା । ଅଧିକାଂଶ ସ୍ଥାନରେ ରାତି ତାପମାତ୍ରା ୧୮ ଡିଗ୍ରୀ ଉପରେ ରହିବା ଯୋଗୁ ଶୀତ ଅନୁଭୂତ ହୋଇ ନଥିଲା ।
