ଭୁବନେଶ୍ୱର,୨୪/୧୨: ଦୁଇ ଦିନ ରାଜ୍ୟର ଦକ୍ଷିଣ ଓ ଉପକୂଳ ଅଞ୍ଚଳରେ ପ୍ରବଳ ବର୍ଷା ସମ୍ଭାବନା ଅଛି । ମଙ୍ଗଳବାର ଗଜପତି, ଗଞ୍ଜାମ, ଜଗତ୍ସିଂହପୁର, କେନ୍ଦ୍ରାପଡ଼ା ଓ କୋରାପୁଟ ଜିଲ୍ଲାରେ ପ୍ରବଳ ବର୍ଷା ହୋଇପାରେ । ବୁଧବାର ଗଞ୍ଜାମ ଓ ଗଜପତିରେ ବର୍ଷା ହେବ । ପାଣିପାଗ ବିଭାଗ ଏଭଳି ପୂର୍ବାନୁମାନ କରିଛି । ଏହାକୁ ନେଇ ସବୁ ଜିଲ୍ଲାପାଳଙ୍କୁ ସତର୍କ କରାଇଛନ୍ତି ସ୍ୱତନ୍ତ୍ର ରିଲିଫ କମିଶନର (ଏସ୍ଆରସି) ।
ତିନି ଦିନ ତଳେ ଲଗାଣ ବର୍ଷାରେ ରାଜ୍ୟରେ ବ୍ୟାପକ ଫସଲ କ୍ଷୟକ୍ଷତି ହୋଇଛି । କଟା ହୋଇ ଜମିରେ ପଡ଼ିଥିବା ଧାନ ଅଧିକ କ୍ଷତି ହୋଇଛି । ଅଦିନିଆ ବର୍ଷା ଅନେକ ଚାଷୀଙ୍କ ଅଣ୍ଟା ଭାଙ୍ଗି ଦେଇଛି । ଏହି ଦୁଃଖରୁ ଚାଷୀ ବାହାରି ନ ଥିବା ବେଳେ ଆଗକୁ ପୁଣି ବିପଦ ଆସୁଛି । ମଙ୍ଗଳବାରଠାରୁ ବର୍ଷା ପୁଣି ନାକେଦମ୍ କରିବ । ଗଜପତି, ଗଞ୍ଜାମ, ଖୋର୍ଦ୍ଧା, ପୁରୀ, କେନ୍ଦ୍ରାପଡ଼ା, ଜଗତ୍ସିଂହପୁର, ବାଲେଶ୍ୱର, ବୌଦ୍ଧ, ଯାଜପୁର, କଟକ, ନୟାଗଡ଼, କନ୍ଧମାଳ, କଳାହାଣ୍ଡି, କୋରାପୁଟ ଓ ମାଲକାନଗିରିରେ ସ୍ୱଳ୍ପରୁ ମଧ୍ୟମ ପରିମାଣର ବର୍ଷା ସମ୍ଭାବନା ଅଛି ।
୫ଟି ଜିଲ୍ଲାରେ ପ୍ରବଳ ବର୍ଷା ହୋଇପାରେ ବୋଲି ପୂର୍ବାନୁମାନ ଦିଆଯାଇଛି । ବୁଧବାର ଗଜପତି ଓ ଗଞ୍ଜାମରେ ପ୍ରବଳ ବର୍ଷା ହୋଇପାରେ। ଏଥିପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି । ପୁଣି ଆସନ୍ତା ଦୁଇ ଦିନରେ ରାତି ତାପମାତ୍ରା ୨ରୁ ୪ ଡିଗ୍ରୀ ସେଲସିୟସ୍ କମିପାରେ ବୋଲି ଆକଳନ କରାଯାଇଛି । ଦୁଇ ଦିନ ବର୍ଷା ଥିବାରୁ ପାଣିପାଗ ସ୍ଥିତି ଉପରେ ନଜର ରଖି ପଦକ୍ଷେପ ନେବାକୁ ଏସ୍ଆରସି ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ।
ସେପଟେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ଅଦିନିଆ ବର୍ଷାରେ ହୋଇଥିବା କ୍ଷୟକ୍ଷତିର ଆକଳନ ପାଇଁ ସବୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛୁ । ଜମିରୁ ପାଣି କମିବା ପରେ ସେମାନେ କ୍ଷେତ୍ର ଅଧିକାରୀଙ୍କ ଜରିଆରେ କ୍ଷୟକ୍ଷତିର ବିସ୍ତୃତ ଆକଳନ କରିବେ । ୩ଦିନରେ ରିପୋର୍ଟ ଦେବାକୁ କୁହାଯାଇଛି । ଚତୁର୍ଥ ଦିନରେ ଏହାର ରିପୋର୍ଟର ଅନୁଧ୍ୟାନ କରାଯିବ । ପଞ୍ଚମ ଦିନରୁ କ୍ଷତିପୂରଣ ମିଳିବା ଆରମ୍ଭ ହେବ ।
କୌଣସି ଚାଷୀଙ୍କ ଧାନ ଓଦା ହୋଇଥିଲେ ତାକୁ ଶୁଖାଇବାକୁ ମଣ୍ଡିରେ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । ଓଦା ହେବା ସତ୍ତେ୍ୱ ଯେଉଁ ଧାନ ବିକ୍ରି ଯୋଗ୍ୟ ହେବ ସେ କ୍ଷେତ୍ରରେ ନିୟମକୁ କୋହଳ କରିବାକୁ କୁହାଯାଇଛି । ଫସଲ କ୍ଷତି ପାଇଁ ଇନପୁଟ୍ ସବ୍ସିଡି ମିଳିବ । ଯେଉଁ ଚାଷୀମାନେ ବୀମା କରିଥିବେ ସେମାନେ ସହାୟତା ପାଇବାକୁ ଯୋଗ୍ୟ । ସେମାନେ ବୀମା କମ୍ପାନୀକୁ ଆବେଦନ କଲେ ନିୟମ ଅନୁସାରେ ବୀମା ସହାୟତା ମିଳିବ ବୋଲି ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି ।
