ନୂଆଦିଲ୍ଲୀ: ସ୍ପାଇସଜେଟର ଏକ ବିମାନ ବଡ଼ ଦୁର୍ଘଟଣାରୁ ବର୍ତ୍ତି ଯାଇଛି । ବିମାନଟି ଉଡ଼ାଣ ଭରିବା ବେଳେ ଏହାର ଏକ ଚକ୍ ତଳକୁ ଖସିପଡ଼ିଥିଲା ବୋଲି ଜଣାପଡ଼ିଛି । ମିଳିଥିବା ସୂଚନା ଅନୁସାରେ, ଶୁକ୍ରବାର ସ୍ପାଇସଜେଟର ଏକ ବିମାନ Q400 କାଣ୍ଡଲାରୁ ମୁମ୍ବାଇ ଯାଉଥିଲା । ଉଡ଼ାଣ ଆରମ୍ଭ କରିବା ପରେ ବିମାନର ଏକ ଚକ ରନୱେରେ ଖସି ପଡ଼ିଥିଲା । ସ୍ପାଇସଜେଟର ଜଣେ ମୁଖପାତ୍ର ଏ ବିଷୟରେ ସୂଚନା ଦେଇଛନ୍ତି । ବିମାନରେ ୭୫ ଜଣ ଯାତ୍ରୀ ଥିଲେ । କାଣ୍ଡଲା ବିମାନବନ୍ଦରରେ ବିମାନର ଚକ ଖସିପଡ଼ିବା ପରେ ବିମାନବନ୍ଦରରେ ହଇଚଇ ସୃଷ୍ଟି ହୋଇଥିଲା ଏବଂ ଅଧିକାରୀମାନେ ତୁରନ୍ତ ଜରୁରୀକାଳୀନ ପରିସ୍ଥିତି ଘୋଷଣା କରିଥିଲେ ।
ସ୍ପାଇସଜେଟ ପକ୍ଷରୁ କୁହାଯାଇଛି ଯେ, ଚକ ଖସିପଡ଼ିବା ପରେ ମଧ୍ୟ ବିମାନଟି ଉଡ଼ାଣ କରିଥିଲା ଏବଂ ମୁମ୍ବାଇରେ ସୁରକ୍ଷିତ ଭାବରେ ଅବତରଣ କରିଥିଲା । ଏହା ଆଶ୍ୱସ୍ତିର ବିଷୟ ଯେ, କୌଣସି ବଡ଼ ଦୁର୍ଘଟଣା ଘଟିନାହିଁ । ସୁରକ୍ଷିତ ଅବତରଣ ପରେ ବିମାନଟି ଟର୍ମିନାଲକୁ ଯାଇଥିଲା ଏବଂ ସମସ୍ତ ଯାତ୍ରୀ ସ୍ୱାଭାବିକ ଭାବରେ ଓହ୍ଲାଇଥିଲେ ।
ଏହି ବିମାନଟି ଏକ ବମ୍ବାର୍ଡିୟର DHC8-400 ଥିଲା। ବିମାନଟି ଅପରାହ୍ନ ୨.୩୯ରେ ଉଡ଼ାଣ ଆରମ୍ଭ କରିଥିଲା। କାଣ୍ଡଲାରେ ରନୱେ ୨୩ ରୁ ଉଡ଼ାଣ ଭରିବା ସମୟରେ, ଟାୱାର କଣ୍ଟ୍ରୋଲର୍ ବିମାନରୁ ଏକ ବଡ଼ କଳା ବସ୍ତୁ ଖସିପଡ଼ିଥିବା ଦେଖିଥିଲେ । ଏହା ରନୱେର ଡାହାଣ ପାର୍ଶ୍ୱରେ ପଡ଼ିଥିଲା ଏବଂ ଟାୟାର ପରି ଗଡ଼ି ଗଢ଼ି ଯାଇଥିଲା । ତଦନ୍ତ ପାଇଁ ପଠାଯାଇଥିବା ଏକ ଟିମ୍ ଏହା ବିମାନର ଏକ ଚକ ବୋଲି ଜାଣିବାକୁ ପାଇଥିଲେ । ବମ୍ବାର୍ଡିୟର DHC8-400 ରେ ଏକ ସ୍ୱତନ୍ତ୍ର ଅବତରଣ ପ୍ରଣାଳୀ ରହିଛି । ଏହାକୁ ଟ୍ରାଇସାଇକେଲ୍ ଲ୍ୟାଣ୍ଡିଂ ଗିଅର୍ ସିଷ୍ଟମ୍ କୁହାଯାଏ। ଏହାର ଆଗ ଭାଗରେ ଦୁଇଟି ଚକ ଏବଂ ପ୍ରତ୍ୟେକ ମୁଖ୍ୟ ଅବତରଣ ଗିଅରରେ ଦୁଇଟି ମୁଖ୍ୟ ଚକ ରହିଛି ।
ସ୍ପାଇସଜେଟ୍ ଏହି ଘଟଣା ସଂପର୍କରେ ସୂଚନା ଦେଇଛି । ସ୍ପାଇସଜେଟର ଜଣେ ମୁଖପାତ୍ର କହିଛନ୍ତି ଯେ, ସେପ୍ଟେମ୍ବର ୧୨ ତାରିଖରେ କାଣ୍ଡଲାରୁ ମୁମ୍ବାଇ ଯାଉଥିବା ସ୍ପାଇସଜେଟ୍ Q400 ବିମାନର ଏକ ଚକ ଉଡ଼ାଣ ଭରିବା ପରେ ରନୱେରେ ମିଳିଥିଲା । ବିମାନଟି ତା'ର ଯାତ୍ରା ଜାରି ରଖିଥିଲା ଏବଂ ସୁରକ୍ଷିତ ଭାବରେ ମୁମ୍ବାଇରେ ଅବତରଣ କରିଥିଲା। ସୁରକ୍ଷିତ ଅବତରଣ ପରେ , ବିମାନଟି ଟର୍ମିନାଲକୁ ଯାଇଥିଲା ଏବଂ ସମସ୍ତ ଯାତ୍ରୀ ଓହ୍ଲାଇ ଯାଇଥିଲେ ।
ସେପଟେ ସ୍ପାଇସଜେଟ୍ ଏବେ ଆର୍ଥିକ ସମସ୍ୟାର ସମ୍ମୁଖୀନ ହେଉଛି। ଏହାର ଅଧାରୁ ଅଧିକ ବିମାନ ଉଡ଼ାଣ ଭରିପାରୁ ନାହିଁ । ଏହି କାରଣରୁ, ଏହା ଅନ୍ୟ କମ୍ପାନୀଗୁଡ଼ିକ ସହିତ ପ୍ରତିଯୋଗିତା କରିପାରୁନାହିଁ । ଘରୋଇ ବଜାରରେ ସ୍ପାଇସଜେଟର ଅଂଶ ୧.୯ ପ୍ରତିଶତକୁ ହ୍ରାସ ପାଇଛି । ଗତ ବର୍ଷ ସ୍ପାଇସଜେଟ୍ ନିବେଶକଙ୍କଠାରୁ ୩୦୦୦ କୋଟି ଟଙ୍କା ସଂଗ୍ରହ କରିଥିଲା। କମ୍ପାନୀ କହିଥିଲା ଯେ, ଏହା ମାର୍ଚ୍ଚ ସୁଦ୍ଧା ୪୦ ଟି ବିମାନ ପରିଚାଳନା କରିବ ଏବଂ ୨୦୨୬ ଶେଷ ସୁଦ୍ଧା ଏହାକୁ ୧୦୦ କୁ ବୃଦ୍ଧି କରିବ। କିନ୍ତୁ ଏଭଳି କିଛି ହୋଇନାହିଁ । ସ୍ପାଇସଜେଟ୍ ଏବେ ବି ବକେୟା ଦେୟ ଦେବାକୁ ଅସମର୍ଥ ।
