ନୂଆଦିଲ୍ଲୀ,୨୯/୦୮: ଦିନକୁ ଦିନ ବଢ଼ିଚାଲିଛି ଅପରାଧର ସଂଖ୍ୟା । ଦେଶଠୁ ଆରମ୍ଭ କରି ବିଦେଶ ପର୍ଯ୍ୟନ୍ତ । ସବୁଠି ଜଳୁଛି ଅଶାନ୍ତିର ବହ୍ନି । ଏହାକୁ ନେଇ ଅନେକ ସମୟରେ ଲୋକେ ମଧ୍ୟ ଭୟଭୀତ । କିନ୍ତୁ ଦୁନିଆରେ ଏପରି ସ୍ଥାନ ରହିଛି, ଯେଉଁଠିକାର ବାସିନ୍ଦା ନିଜକୁ ସୁରକ୍ଷିତ ମଣୁଛନ୍ତି । ଅପରାଧ ଠାରୁ ଦୂରେଇ ରହିଛି ଏହି ସ୍ଥାନ । ସେମାନଙ୍କ ଜୀବନରେ ଭୟ ବୋଲି କିଛି ଶବ୍ଦ ହିଁ ନାହିଁ କହିଲେ ଅତ୍ୟୁକ୍ତି ହେବ ନାହିଁ । ରାତିରେ ନିଶଃସନ୍ଦେହରେ ଏକୁଟିଆ ବୁଲି ଥାନ୍ତି ଲୋକେ । ଏମିତିକି ଏହି ସ୍ଥାନରେ କୌଣସି ଘରେ ତାଲା ଲାଗିନଥାଏ । କାରଣ ଏଠାରେ ଚୋରିର ପ୍ରଶ୍ନ ହିଁ ନାହିଁ । ବିଶ୍ବରେ କେଉଁଠି ଏହି ଦେଶ ରହିଛି । ସେଠାରେ କିପରି ଏତେ ସୁରକ୍ଷିତ ଲେକେ । ମନରେ ଉଠୁଥିବା ଏଭଳି ପ୍ରଶ୍ନର ଉତ୍ତର ଆମେ ଆପଣଙ୍କୁ ଦେବୁ ।
ଆଇସଲ୍ୟାଣ୍ଡ, ୨୦୦୮ରୁ ଲଗାତାର ଭାବେ ଶାନ୍ତିପୂର୍ଣ୍ଣ ଦେଶ ଲିଷ୍ଟରେ ରହିଛି । ଏହି ଦ୍ବୀପ ଦେଶରେ ଅପରାଧ ହାର ଖୁବ୍ କମ୍। ପୁଲିସ ପାଖରେ ଅସ୍ତ୍ରଶସ୍ତ୍ର ରଖିନଥାଏ । ଲୋକେ ପରସ୍ପର ଉପରେ ବିଶ୍ୱାସ ରଖନ୍ତି । ଆଇସଲ୍ୟାଣ୍ଡରେ ବିଳମ୍ବିତ ରାତି ପର୍ଯ୍ୟନ୍ତ ବିନା କୌଣସି ଦ୍ବନ୍ଦରେ ବୁଲିପାରିବେ । ଦେଶର କେବଳ ସୁରକ୍ଷାରେ କଥା ନୁହେଁ, ବରଂ ଲିଙ୍ଗଗତ ସମାନତା ଏବଂ ସାମାଜିକ ସନ୍ତୁଳନରେ ମଧ୍ୟ ବିଶ୍ୱରେ ଅଗ୍ରଣୀ ରହିଛି । ଏଠାକାର ନୀତି ମହିଳାମାନଙ୍କୁ ସମାନ ଅଧିକାର ପ୍ରଦାନ କରେ । ଯାହା ସମାଜରେ ଏକ ଗଭୀର ବିଶ୍ୱାସ ଏବଂ ସନ୍ତୁଳନ ବଜାୟ ରଖାଯାଏ । ଆଇସଲ୍ୟାଣ୍ଡରେ ଏପରି ସମୟ ଥିଲା କଥା କଥାରେ ବିବାଦ ଏବଂ ହିଂସା ଲାଗି ରହୁଥିଲା । ବର୍ତ୍ତମାନ ଏସବୁ ନାହିଁ । ଦେଶକୁ ଶାନ୍ତିପୂର୍ଣ୍ଣ ଏବଂ ସୁରକ୍ଷିତ ବୋଲି ମଣାଯାଉଛି । ସେହିପରି ଆୟରଲ୍ୟାଣ୍ଡ ମଧ୍ୟ ବିଶ୍ବରେ ଶାନ୍ତିପ୍ରିୟ ଦେଶ ତାଲିକାରେ ଆସୁଛି । ସମୟ ଥିଲା ଆୟର୍ଲ୍ୟାଣ୍ଡରେ ହିଂସା ଏବଂ ବିବାଦର କେନ୍ଦ୍ରସ୍ଥଳି ଥିଲା । ମାତ୍ର ସରକାରଙ୍କ ନୀତି ପରିବର୍ତ୍ତନ ପରେ ଶାନ୍ତି ଫେରିଛି । ସାମାଜିକ କଲ୍ୟାଣ ଏବଂ ପରିବେଶ ସୁରକ୍ଷାକୁ ପ୍ରାଥମିକତା ଦିଆଯାଉଛି। ୟୁରୋପର ଅଧିକାଂଶ ଦେଶ ନାଟୋର ଅଂଶ ଥିବା ବେଳେ ମାତ୍ର ଆୟର୍ଲ୍ୟାଣ୍ଡ ଏବେ ବି ଏହି ସଂଗଠନର ସଦସ୍ୟ ହୋଇନାହିଁ । ଆଉ ବିଶ୍ୱକୁ କହୁଛି ଅସ୍ତ୍ର ଦୌଡ଼ରେ ସାମିଲ ନ ହୋଇ ଶାନ୍ତି ଏବଂ ସରଳ ଜୀବନ ଯାପନ କର।
ସୁରକ୍ଷିତ ଏବଂ ଶାନ୍ତ ସ୍ଥାନ ମଧ୍ୟରେ ଦ୍ବୀପଦେଶ ନ୍ୟୁଜିଲ୍ୟାଣ୍ଡ ମଧ୍ୟ ଆସୁଛି । ୨୦୨୫ରୁ ନ୍ୟୁଜିଲ୍ୟାଣ୍ଡ ତୃତୀୟ ସ୍ଥାନରେ ରହିଛି । ଏହାର କାରଣ ହେଉଛି ଉତ୍ତମ ସୁରକ୍ଷା, କମ୍ ହିଂସା ଏବଂ ଦୃଢ଼ ଆଇନ ଶୃଙ୍ଖଳା। ଏଠାକାର ଲୋକେ ସେମାନଙ୍କ ଘରର ଦ୍ୱାର ବନ୍ଦ କରନ୍ତି ନାହିଁ । ଛାତ୍ରଛାତ୍ରୀମାନେ ଅଧିକାଂଶ ସସୟରେ ଚାଲି ଚାଲି ସ୍କୁଲକୁ ଯାଇଥାନ୍ତି । ନ୍ୟୁଜିଲ୍ୟାଣ୍ଡରେ ସରକାରୀ ବ୍ୟବସ୍ଥା ଉପରେ ଲୋକଙ୍କର ପୂର୍ଣ୍ଣ ବିଶ୍ବାସ ରହିଛି । ଏହି ଦେଶ କେବଳ ଏହାର ପ୍ରାକୃତିକ ସୌନ୍ଦର୍ଯ୍ୟ ପାଇଁ ପ୍ରସିଦ୍ଧ ନୁହେଁ, ଏଠାକାର ଲୋକମାନେ ବନ୍ଧୁତ୍ୱପୂର୍ଣ୍ଣ, ସଚ୍ଚୋଟ ଏବଂ ଶାନ୍ତିପ୍ରିୟ। ଏଥିପାଇଁ ଏଠାରେ ବେଶୀ ପର୍ଯ୍ୟଟକଙ୍କ ମେଳି ଦେଖିବାକୁ ମିଳିଥାଏ । ଅଷ୍ଟ୍ରିଆ ସୁରକ୍ଷିତ ଦେଶ ମଧ୍ୟରେ ଚତୁର୍ଥ ସ୍ଥାନରେ ରହିଛି । କାରଣ ଦେଶରେ କଠୋର ଆଇନ ଶୃଙ୍ଖଳା ବ୍ୟବସ୍ଥା ରହିଛି । ଅପରାଧ କରିବା ପୂର୍ବରୁ ଅପରାଧୀ ଦୁଇ ଥର ଭାବିଥାନ୍ତି । ଏହି ରାଷ୍ଟ୍ର ବିଭିନ୍ନ ସାମରିକ ମେଣ୍ଟରୁ ଦୂରେଇ ରହିଛି । ସରକାର ଦେଶର ଜନକଲ୍ୟାଣ ଉପରେ ବିଶ୍ବାସ ରଖିଥାନ୍ତି । ବିଳମ୍ବିତ ରାତି ପର୍ଯ୍ୟନ୍ତ ଲୋକେ ସୁରକ୍ଷିତ ଭାବେ ବୁଲି ପାରନ୍ତି ।ସିଙ୍ଗାପୁର, ବିଶ୍ୱର ସୁରକ୍ଷିତ ରାଷ୍ଟ୍ର ରାଙ୍କିଂରେ ଷଷ୍ଠ ସ୍ଥାନରେ ରହିଛି । ସିଙ୍ଗାପୁର ଏସିଆ ମହାଦେଶର ସବୁଠାରୁ ଶାନ୍ତିପୂର୍ଣ୍ଣ ଏବଂ ସୁରକ୍ଷିତ ଦେଶ। ଏଠାରେ ଅପରାଧ କହିବାକୁ ଗଲେ ଜମାରୁ ହୁଏନି । ଆଇନ ଶୃଙ୍ଖଳା ବ୍ୟବସ୍ଥା ପାଇଁ ଲୋକେ ବିନା ଭୟରେ ବିଳମ୍ବିତ ରାତି ପର୍ଯ୍ୟନ୍ତ ଚଳପ୍ରଚଳ କରିଥାନ୍ତି । ସିଙ୍ଗାପୁରର ରୁଢିବାଦୀ ନୀତି ଯଦିଓ କିଛି ପ୍ରସଙ୍ଗରେ କଠୋର ହୋଇଥାଏ, କିନ୍ତୁ ଯେତେବେଳେ ସୁରକ୍ଷା ଏବଂ ନାଗରିକ ଅଧିକାର କଥା ଆସେ, ଏହି ଦେଶ ସମସ୍ତଙ୍କୁ ସମ୍ମାନ ଏବଂ ସ୍ୱାଧୀନତା ପ୍ରଦାନ କରେ।
