ୱାଶିଂଟନ ଡିସି,୧୭/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏବେ କିଛି ପ୍ରମୁଖ ଗଣମାଧ୍ୟମ ସଂସ୍ଥାଙ୍କୁ ଟାର୍ଗେଟ୍ କରିଛନ୍ତି । ସେମାନେ ଏଣିକି ରାଷ୍ଟ୍ରପତିଙ୍କ ବିଭିନ୍ନ ଗତିବିଧିକୁ ସିଧାସଳଖ ଭାବେ କଭର୍ କରିପାରିବେ ନାହିଁ । ଅନ୍ୟ ପ୍ରମୁଖ ସଂସ୍ଥାଠାରୁ ଏହା ସେମାନଙ୍କୁ ହାସଲ କରିବାକୁ ପଡ଼ିବ । ଏହି ସୁବିଧା ସେମାନଙ୍କଠାରୁ ଛଡ଼ାଇ ନେଇଛି ହ୍ୱାଇଟ୍ ହାଉସ୍ । ଟ୍ରମ୍ପ୍ ପ୍ରଶାସନ ହ୍ୱାଇଟ୍ ହାଉସ୍ ପ୍ରେସ୍ ପୁଲ୍ରୁ ରଏଟର୍ସ, ବ୍ଲୁମ୍ବର୍ଗ ଏବଂ ଆସୋସିଏଟେଡ୍ ପ୍ରେସ୍ (ଏପି) ନ୍ୟୁଜ୍ ଏଜେନ୍ସିକୁ ବାଦ୍ ଦେବା ଲାଗି ନିଷ୍ପତ୍ତି ନେଇଛି । ପ୍ରେସ୍ ପୁଲ୍ରେ ଏଣିକି ଏହି ୩ଟି ଏଜେନ୍ସିଙ୍କୁ ସ୍ଥାୟୀ ଜାଗା ମିଳିବ ନାହିଁ ବୋଲି ହ୍ୱାଇଟ୍ ହାଉସ୍ ପକ୍ଷରୁ କୁହାଯାଇଛି ।
ଉଲ୍ଲେଖଯୋଗ୍ୟ, ପ୍ରେସ୍ ପୁଲ୍ ହେଉଛି ଏକ ଛୋଟ ଗ୍ରୁପ୍, ଯେଉଁଥିରେ ପ୍ରାୟ ୧୦ଟି ଗଣମାଧ୍ୟମ ସଂସ୍ଥା ରହିଥାନ୍ତି । ଏଥିରେ କିଛି ସାମ୍ବାଦିକ ଓ ଫଟୋଗ୍ରାଫର ସାମିଲ ଥାଆନ୍ତି । ଏମାନେ ରାଷ୍ଟ୍ରପତିଙ୍କ ଛୋଟବଡ଼ ଗତିବିଧିକୁ ସିଧାସଳଖ କଭର୍ କରିଥାନ୍ତି । ଏହାପରେ ଅନ୍ୟ ସାମ୍ବାଦିକଙ୍କୁ ସେୟାର କରିଥାଆନ୍ତି ।
ଟ୍ରମ୍ପ୍ ପ୍ରଶାସନ ଏଭଳି କରି ୧୧୧ ବର୍ଷର ପୁରୁଣା ପରମ୍ପରାକୁ ବଦଳାଇ ଦେଇଛି । ହ୍ୱାଇଟ୍ ହାଉସ୍ ପ୍ରେସ୍ ପୁଲ୍ର ଆରମ୍ଭ ୧୯୫୦ ଦଶକରେ ତତ୍କାଳୀନ ରାଷ୍ଟ୍ରପତି ଡ୍ୱାଇଟ୍ ଆଇଜନହାୱରଙ୍କ ସମୟରେ ହୋଇଥିଲା । ରାଷ୍ଟ୍ରପତିଙ୍କ ଗତିବିଧି କଭର୍ ପାଇଁ ସାମ୍ବାଦିକଙ୍କ ପ୍ରବଳ ଭିଡ଼ ହେବାରୁ ସମସ୍ୟା ଉପୁଜିଥିଲା । ସମାଧାନ ସ୍ୱରୂପ ପ୍ରମୁଖ ସାମ୍ବାଦିକଙ୍କୁ ନେଇ ଏକ ଛୋଟ ଗ୍ରୁପ୍ ବନାଯାଇଥିଲା । ଏହାର ନାମ ପ୍ରେସ୍ ପୁଲ୍ ରଖାଯାଇଥିଲା । ପ୍ରେସ୍ ପୁଲ୍ରେ କେଉଁ ଗଣମାଧ୍ୟମ ସଂସ୍ଥା ରହିବେ, ତାହା ଧାର୍ଯ୍ୟ କରିବା ଦାୟିତ୍ୱ ହ୍ୱାଇଟ୍ ହାଉସ୍ କରେସପଣ୍ଡେନ୍ସ ଆସୋସିଏସନ (ଡବ୍ଳ୍ୟୁଏଚ୍ସିଏ) ପାଖରେ ରହିଛି ।
