ଭୁବନେଶ୍ୱର ୦୯/୧୨: ବିବାହ ଋତୁ ଦେବୋତ୍ଥାନ ଏକାଦଶୀ ପରଠାରୁ ଆରମ୍ଭ ହୋଇଯାଇଛି । ବିବାହ ଉତ୍ସବରେ ଶୁଭେଚ୍ଛାମୂଳକ ଭାବେ ନବଦମ୍ପତିଙ୍କୁ ଅର୍ଥ ଅବା ଉପହାର ସାମଗ୍ରୀ ପ୍ରଦାନ କରିବାର ପରମ୍ପରା ରହିଛି । ଲକ୍ଷ୍ୟ କରାଯାଏଯେ ଯେତେବେଳେ ଉପହାର ଭାବେ ଅର୍ଥ ଦିଆଯାଏ ତାହା ଅଯୁଗ୍ମ ସଂଖ୍ୟକ ଦିଆଯାଇଥାଏ । ଯେପରି ୧୧, ୨୧, ୫୧, ୧୦୧, ୫୦୧ ବା ୧୦୦୧... ଇତ୍ୟାଦି । ରଙ୍ଗିନ ଲିଫାଫାରେ ୧ଟଙ୍କାର ମୁଦ୍ରା ଖଞ୍ଜାଯାଇ ବିକ୍ରି କରାଯାଉଥିବା ମଧ୍ୟ ଲକ୍ଷ୍ୟ କରାଯାଏ । ତେବେ ୧ଟଙ୍କା ଅଧିକ କାହିଁକି ଦିଆଯାଏ? ଆସନ୍ତୁ ଜାଣିବା ସେ ବିଷୟରେ ।
ଜ୍ୟୋତିଷ ଶାସ୍ତ୍ର ଅନୁସାରେ ସନାତନ ଧର୍ମରେ ଅଯୁଗ୍ମ ସଂଖ୍ୟା ପ୍ରଗତି ତଥା ସମୃଦ୍ଧିର ପ୍ରତୀକ । ଆମେ ଯେହେତୁ ନବଦମ୍ପତିଙ୍କ ଦାମ୍ପତ୍ୟ ଜୀବନ ଆଗକୁ ବଢ଼ୁ ବୋଲି ଆଶା କରୁ ଏହାର ପ୍ରତୀକ ଭାବେ ଅଯୁଗ୍ମ ସଂଖ୍ୟକ ଅର୍ଥ ନବଦମ୍ପତିଙ୍କୁ ଶୁଭେଚ୍ଛା ଜଣାଇବା ପାଇଁ ଦେଇଥାଉ । ଅନ୍ୟପକ୍ଷରେ ଯୁଗ୍ମ ସଂଖ୍ୟା ସ୍ଥିରତା ତଥା ଶାନ୍ତିର ପ୍ରତୀକ । ଶୁଦ୍ଧିକ୍ରିୟାରେ ସର୍ବଦା ୧୦, ୨୦, ୫୦,୧୦୦ ଅବା ୫୦୦ ଟଙ୍କା..ଏହିପରି ଯୁଗ୍ମ ସଂଖ୍ୟକ ଅର୍ଥ ଦିଆଯାଏ । କାରଣ ଦିବଂଗତ ଆତ୍ମା ପାଇଁ ଆମେ ଶାନ୍ତି ତଥା ସ୍ଥିରତା କାମନା କରିଥାଉ । ଗାଣିତିକ ଦୃଷ୍ଟିରୁ ମଧ୍ୟ ଅଯୁଗ୍ମ ସଂଖ୍ୟା ଗତିଶୀଳତାର ପ୍ରତୀକ । ସେହିପରି ବୈଜ୍ଞାନିକଙ୍କ କହିବା ଅନୁଯାୟୀ ସଂଖ୍ୟା ଆମ ମସ୍ତିଷ୍କକୁ ଭିନ୍ନ ଭିନ୍ନ ଢ଼ଙ୍ଗରେ ପ୍ରଭାବିତ କରିଥାଏ । ନ୍ୟୁରୋ-ପ୍ଲେସବୋ ଅନୁସାରେ ବିଷମ ବା ଅଯୁଗ୍ମ ସଂଖ୍ୟା ଆଶା ଆକାଂକ୍ଷା ବଢ଼ାଇବାରେ ସହାୟକ ହୋଇଥାଏ । ଉର୍ଜା ସିଦ୍ଧାନ୍ତ ଅନୁଯାୟୀ ମଧ୍ୟ ଅଯୁଗ୍ମ ସଂଖ୍ୟା ଶକ୍ତିର ଅନବରତ ପ୍ରବାହକୁ ସୂଚାଇଥାଏ । ଏଣୁ ସବୁ ଦୃଷ୍ଟିରୁ ସମସ୍ତ ଶୁଭ କାର୍ଯ୍ୟରେ ଅଯୁଗ୍ମ ସଂଖ୍ୟକ ଅର୍ଥ ଦେବା ଉଚିତ ।
