ତୁମୁଡିବନ୍ଧ,୨୭/୧୦: ଦାମ୍ପତ୍ୟ କଳହରୁ ତୁମୁଡିବନ୍ଧ ଅଞ୍ଚଳରେ ଘଟିଛି ଏକ ଜଘନ୍ୟ ହତ୍ୟାକାଣ୍ଡ । ମଦ୍ୟପ ସ୍ବାମୀ ଧାରୁଆ ଅସ୍ତ୍ରରେ ସ୍ତ୍ରୀର ବେକ କାଟି ହତ୍ୟା କରିଛି। ମୃତ ମହିଳା ଜଣକ ହେଲେ ନୂଆମୁଣ୍ଡା ଗ୍ରାମର ମଧୁମତୀ ଦଲାଇ।
ତୁମୁଡିବନ୍ଧ ଥାନା ନୂଆମୁଣ୍ଡା ଗ୍ରାମର ଚନ୍ଦ୍ରକାନ୍ତ ବେହର ଦଳାଇଙ୍କ ସ୍ତ୍ରୀ ମଧୁମତୀ ଆଜି ଦ୍ୱିପ୍ରହର ସମୟରେ ଏଟିଏମରୁ ଟଙ୍କା ଉଠାଇ ଥିଲେ। ସ୍ବାମୀ ଚନ୍ଦ୍ରକାନ୍ତ ଏହି ଟଙ୍କା ମାଗିବାରୁ ଉଭୟଙ୍କ ମଧ୍ୟରେ ଦୀର୍ଘ ସମୟ ଧରି ବଚସା ହୋଇଥିଲା। ପରେ ଘରର କବାଟ ବନ୍ଦ କରି ସ୍ତ୍ରୀ ମଧୁମତିର ବେକକୁ ଏକ ଧାରୁଆ ଅସ୍ତ୍ରରେ କାଟି ପକାଇଥିଲା ନିଶାସକ୍ତ ଚନ୍ଦ୍ରକାନ୍ତ । । ଫଳରେ ଘଟଣା ସ୍ଥଳରେ ମଧୁମତୀର ମୃତ୍ୟୁ ହୋଇଥିଲା। ଖବର ପାଇ ତୁମୁଡ଼ିବନ୍ଧ ପୋଲିସ ସାଇଣ୍ଟିଫିକ ଟିମ୍ ସହ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ପୁଲିସ ଅଭିଯୁକ୍ତ ଚନ୍ଦ୍ରକାନ୍ତଙ୍କୁ ଗିରଫ କରିବା ସହିତ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଥିବା ଥାନା ଅଧିକାରୀ ସୂଚନା ଦେଇଛନ୍ତି।
