ମୁନିଗୁଡ଼ା,୨୫/୧୧: ବିବାହର ୪ ବର୍ଷ ପରେ ଝୁଲନ୍ତା ଅବସ୍ଥାରେ ମହିଳାଙ୍କ ମୃତଦେହ ଉଦ୍ଧାର ହୋଇଛି । ହତ୍ୟା ଅଭିଯୋଗ ଆଣିଲେ ମହିଳାଙ୍କ ବାପଘରଲୋକେ । ମୃତ ମହିଳା ଜଣକ ଅମ୍ୱାଦଳା ଥାନା ଅନ୍ତର୍ଗତ ରଘୁବାରି ପଞ୍ଚାୟତ ଖଲିଆଗୁଡା ଗ୍ରାମର ପରଖିତ ବିଭାରଙ୍କ ଝିଅ ସନିଆ ବିଭାର ବୋଲି ଜଣାପଡିଛି । ରାୟଗଡ ଜିଲ୍ଲା କୁଡୁବାରୁ ଗ୍ରାମ ନିକଟରେ ଏଭଳି ଘଟଣା ଗଟିଛି ।
ସୂଚନା ମୁତାବକ, ୪ ବର୍ଷ ତଳେ ସନିଆ ରଘୁବାରୀ ପଞ୍ଚାୟତ କୁଡୁବାରୁ ଗ୍ରାମ ଅକୁର କୁଲଦିପିଆଙ୍କ ପୁଅ ଆସିନ କୁଲଦିପିଆଙ୍କୁ ପ୍ରେମ ବିବାହ କରିଥିଲେ । ବାହାଘର ପରେ ଦୀର୍ଘ ଦିନ ହେଲା ସ୍ଵାମୀ, ଶାଶୁ, ଶ୍ୱଶୁର ମିଶି ସନିଆଙ୍କୁ ଯୌତୁକ ଯନ୍ତ୍ରଣା ଦେବା ସହ ଶାରୀରିକ ମାନସିକ ନିର୍ଯାତନା ଦେଉଥିଲେ । ତେଣୁ ଗତ ଦୀପାବଳିରେ ନିଜ ବାପଘର ଖଲିଆ ଗୁଡା ପଲାଇ ଆସିଥିଲେ । ବାପ ଘରେ କିଛିଦିନ ରହିବା ପରେ ସମସ୍ୟାର ସମାଧାନ କରିବା ପାଇଁ ଆସିନ ଖଲିଆ ଗୁଡା ଗ୍ରାମକୁ ଯାଇ ନିଜ ସ୍ତ୍ରୀ ସନିଆକୁ ବୁଝା ସୁଝା କରି ଘରକୁ ନେଇଥିଲେ । ଶନିବାର କୁଡୁବାରୁ ଗାଁ ନିକଟ ଏକ ଡିମିରି ଗଛରେ ଝୁଲନ୍ତା ଅବସ୍ଥାରେ ସନିଆଙ୍କ ମୃତଦେହ ଦେଖିଥିଲେ ଗାଁଲୋକେ । ଏହା ଦେଖ ତୁରନ୍ତ ପୋଲିସକୁ ଖବର ଦେଇଥିଲେ । ଏନେଇ ମହିଳାଙ୍କ ବାପଘରଲୋକ ଅମ୍ୱାଦଳା ଥାନାରେ ଲିଖିତ ଅଭିଯୋଗ କରିବା ପରେ ଅମ୍ବାଦଳା ପୋଲିସ, ସାଇଣ୍ଟଫିକ ଟିମ ଓ ମାଜିଷ୍ଟ୍ରେଟ ଘଟଣା ସ୍ଥଳରେ ପହଞ୍ଚି ତଦନ୍ତ କରିଥିଲା । ପରେ ଅମ୍ବାଦଳା ପୋଲିସ ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଚଳାଇଛି । ତେବେ ମହିଳା ଜଣକ ଆତ୍ମହତ୍ୟା କରିଛନ୍ତି ନା ତାଙ୍କ ହତ୍ୟା ହୋଇଛି, ତାହା ତଦନ୍ତ ପରେ ଡଣାପଡିବ ।
