ନୂଆଦିଲ୍ଲୀ: ବିଶ୍ୱ ବ୍ୟାଙ୍କ ଅଧ୍ୟକ୍ଷ ଅଜୟ ବାଙ୍ଗା ଆଜି (ଗୁରୁବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି । ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ପକ୍ଷରୁ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ କରାଯିବା ପରେ ପ୍ରଧାନମନ୍ତ୍ରୀ ମୋଦୀ ଏବଂ ଅଜୟ ବାଙ୍ଗାଙ୍କ ମଧ୍ୟରେ ଏହି ବୈଠକ ହୋଇଥିଲା। ସୂଚନାଥାଉକି, ୧୯୬୦ ମସିହାରେ ଭାରତ ଏବଂ ପାକିସ୍ତାନ ମଧ୍ୟରେ ସିନ୍ଧୁ ଜଳ ଚୁକ୍ତି ସ୍ୱାକ୍ଷରିତ ହୋଇଥିଲା। ସିନ୍ଧୁ ଜଳ ଚୁକ୍ତି ପାଇଁ ୯ ବର୍ଷ ଧରି ଚାଲିଥିବା ଆଲୋଚନାରେ ବିଶ୍ୱ ବ୍ୟାଙ୍କ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। କେବଳ ଏତିକି ନୁହେଁ, ବିଶ୍ୱ ବ୍ୟାଙ୍କ ମଧ୍ୟ ଭାରତ ଏବଂ ପାକିସ୍ତାନ ମଧ୍ୟରେ ଏହି ଚୁକ୍ତି ସ୍ୱାକ୍ଷର କରିଥିଲା।  

ଆଜି ପ୍ରଧାନମନ୍ତ୍ରୀ ମୋଦିଙ୍କୁ ଭେଟିବା ପରେ, ଅଜୟ ବାଙ୍ଗା ଆସନ୍ତାକାଲି (ଶୁକ୍ରବାର) ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌ ଯିବେ। ସେଠାରେ ସେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭେଟିବେ। ୟୁପି ସରକାରଙ୍କ ସୂଚନା ଅନୁଯାୟୀ,"ବାଙ୍ଗାଙ୍କ ଏହି ଗସ୍ତ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନେତୃତ୍ୱରେ ଉତ୍ତର ପ୍ରଦେଶର ଦ୍ରୁତ ବିକାଶ ପ୍ରତି ବଢ଼ୁଥିବା ବୈଶ୍ବିକ ଆଗ୍ରହକୁ ସୂଚିତ କରୁଛି । କାରଣ ରାଜ୍ୟ ୧୦୦୦ ବିଲିୟନ ଡଲାର ଅର୍ଥନୀତି ହେବାର ଏହାର ମହତ୍ୱାକାଂକ୍ଷୀ ଲକ୍ଷ୍ୟ ଆଡକୁ ବଢୁଛି। 

ସୂଚନା ମୁତାବକ ଅଜୟ ବାଙ୍ଗା ଆସନ୍ତାକାଲି ଲକ୍ଷ୍ନୌର ତାଜ ହୋଟେଲରେ ଅନେକ ବୈଠକ ଏବଂ କାର୍ଯ୍ୟକ୍ରମରେ ଯୋଗଦେବେ। ଏହି ଅବଧିରେ ମୁଖ୍ୟ ସଚିବଙ୍କ ଉପସ୍ଥିତିରେ ଅଂଶୀଦାର ମାନଙ୍କ ସହିତ ଏକ ବୈଠକ ମଧ୍ୟ କରିବେ। ପରେ, ସେ ମୁଖ୍ୟମନ୍ତ୍ରୀଙ୍କ ବାସଭବନରେ ତାଙ୍କୁ ଭେଟିବେ ଏବଂ ରାତ୍ରୀଭୋଜନରେ ଯୋଗଦେବେ। ବିବୃତ୍ତି ଅନୁଯାୟୀ, ବିଶ୍ୱ ବ୍ୟାଙ୍କ ମୁଖ୍ୟ ଲକ୍ଷ୍ନୌରୁ ବାରବାଙ୍କି ଯାତ୍ରା କରିବେ, ଯେଉଁଠାରେ ସେ ରାଜୌଲିରେ ଏକ ମହୁମାଛି ପାଳନ କେନ୍ଦ୍ର ପରିଦର୍ଶନ କରିବେ ଏବଂ ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ମାନଙ୍କୁ ଭେଟିବେ। ଆଉ ଏହା ପରେ ସେ ହୋଟେଲ ତାଜରେ ନିର୍ଦ୍ଧାରିତ କାର୍ଯ୍ୟକ୍ରମରେ ଅଂଶଗ୍ରହଣ କରିବା ପରେ ଦିଲ୍ଲୀ ଫେରି ଯିବେ।