ନୂଆଦିଲ୍ଲୀ ୧୮/୦୫: ସାଉଦି ଆରବରେ ଖୋଲିଛି ବିଶ୍ୱର ପ୍ରଥମ ଏଆଇ ଡାକ୍ତର କ୍ଲିନିକ୍ । ଏଠାରେ ଆର୍ଟିଫିସିଆଲ ଇଣ୍ଟେଲିଜେନ୍ସ ଡାକ୍ତରଙ୍କ ଦ୍ୱାରା ରୋଗୀଙ୍କର ରୋଗ ଚିହ୍ନଟ ହେଉଛି ଏବଂ ସେମାନଙ୍କର ଚିକିତ୍ସା ମଧ୍ୟ ହେଉଛି । ସାଉଦିର ଅଲ୍ମୂସା ହେଲ୍ଥ ଗ୍ରୁପ୍ ସହିତ ଚୀନ୍ ସ୍ଥିତ ମେଡିକାଲ ଟେକ୍ନୋଲୋଜି କମ୍ପାନି ସିନି ଏଆଇର ସହଭାଗିତାରେ ଏହି ପରୀକ୍ଷଣ କାର୍ଯ୍ୟକ୍ରମ ଆରମ୍ଭ ହୋଇଛି । ଅଲ୍- ଆହ୍ସାର ପୂର୍ବ ପ୍ରାନ୍ତରେ ଗତ ମାସ ଏହି କାର୍ଯ୍ୟକ୍ରମ ଆରମ୍ଭ ହୋଇଛି ।
ରୋଗ ଚିହ୍ନଟ ଓ ଚିକିତ୍ସା ନିମନ୍ତେ ପ୍ରଥମ ପର୍ଯ୍ୟାୟରେ ଡାକ୍ତରଙ୍କ ହସ୍ତକ୍ଷେପ ବିନା ଏଆଇ ଡାକ୍ତର ଦ୍ୱାରା ଚିକିତ୍ସା ଏହି କ୍ଲିନିକ୍ର ଉଦ୍ଦେଶ୍ୟ । ଏହା ସତ୍ତେ୍ୱ ରୋଗୀଙ୍କ ସୁରକ୍ଷା ଦୃଷ୍ଟିରୁ ଏଥିରେ ଅସଲ ଡାକ୍ତରଙ୍କୁ ସାମିଲ କରାଯାଇଛି ।
ଶଂଘାଇ ସ୍ଥିତ କମ୍ପାନି ସିନି-ଏଆଇ କହିଛି, ଏଆଇ କ୍ଲିନିକ୍ ଏକ ଅଭିନବ ଚିକିତ୍ସା ସେବା ପ୍ରଣାଳୀ । ଏଠାରେ ଏଆଇ ଡାକ୍ତରମାନେ ସ୍ୱାଧୀନ ଭାବେ ରୋଗ ଯାଞ୍ଚ୍ଠୁ ଆରମ୍ଭ କରି ଔଷଧ ଲେଖିବା ପର୍ଯ୍ୟନ୍ତ ସମ୍ପୂର୍ଣ୍ଣ ଚିକିତ୍ସା କାର୍ଯ୍ୟକ୍ରମର ପରିଚାଳନା କରୁଛନ୍ତି । ସୁରକ୍ଷା ପାଇଁ ଏଆଇ ଡାକ୍ତରଙ୍କ ରୋଗ ଚିହ୍ନଟ ଓ ଚିକିତ୍ସା ପରିଣାମର ସମୀକ୍ଷା ପାଇଁ ବାସ୍ତବ ଡାକ୍ତର ସୁରକ୍ଷା ପ୍ରହରୀ ଭାବେ କାମ କରୁଛନ୍ତି ।
ରୋଗୀ କ୍ଲିନିକ୍ରେ ପହଞ୍ଚିବା ପରେ, ଏକ ଟାବ୍ଲେଟ୍ କମ୍ପ୍ୟୁଟର ବ୍ୟବହାର କରି ଡା. ହୁଆ ନାମରେ ପରିଚିତ ଏଆଇ ଡାକ୍ତରଙ୍କୁ ସେମାନେ ନିଜର ରୋଗର ଲକ୍ଷଣ ବର୍ଣ୍ଣନା କରୁଛନ୍ତି । ଜଣେ ଅସଲି ଡାକ୍ତରଙ୍କ ଭଳି ଏଆଇ ଡାକ୍ତର ରୋଗୀଙ୍କୁ ଅଧିକ ପ୍ରଶ୍ନ ପଚାରନ୍ତି । ମାନବ ସହକର୍ମୀଙ୍କ ସହାୟତାରେ ତଥ୍ୟ ଓ ଛବିଗୁଡ଼ିକର ବିଶେଷ୍ଳଣ କରନ୍ତି । ତା’ପରେ ଡା. ହୁଆ ଚିକିତ୍ସା ପ୍ରସ୍ତାବ ଦିଅନ୍ତି । ଶେଷରେ ଜଣେ ମାନବ ଡାକ୍ତର ଏହାର ପୁଙ୍ଖାନୁପୁଙ୍ଖ ସମୀକ୍ଷା କରନ୍ତି । ଯେଉଁ ମାମଲା ଏଆଇ ନିୟନ୍ତ୍ରଣରେ ନ ଥାଏ, ସେହି କ୍ଷେତ୍ରରେ ମାନବ ଡାକ୍ତର ଉପସ୍ଥିତ ଥାନ୍ତି ।
ଏଆଇ ଡାକ୍ତର ଏବେ ଶ୍ୱାସ ଓ ଫାରିନ୍ଗିଟିସ୍ ଭଳି ୩୦ ରୋଗ ପାଇଁ ଚିକିତ୍ସା ପ୍ରସ୍ତାବ ଦେଉଛନ୍ତି । ୫୦ ପ୍ରକାର ଶ୍ୱାସ ରୋଗ, ଗ୍ୟାଷ୍ଟ୍ରିକ୍ ଓ ତ୍ୱଚା ରୋଗର ଚିକିତ୍ସା ପାଇଁ ଏଆଇ ଡାକ୍ତରଙ୍କୁ ସକ୍ଷମ କରିବାକୁ ସିନି ଏଆଇ ଲକ୍ଷ୍ୟ ରଖିଛି । ଏହି ପାଇଲଟ୍ ପ୍ରୋଗ୍ରାମ୍ର ତଥ୍ୟ ସାଉଦି କର୍ତ୍ତୃପକ୍ଷଙ୍କୁ ପ୍ରଦାନ କରାଯିବା ସହିତ ୧୮ ମାସ ମଧ୍ୟରେ ଏହାକୁ ମଞ୍ଜୁରି ମିଳିବ ବୋଲି କମ୍ପାନି ଆଶା କରିଛି । ପାଇଲଟ୍ ପ୍ରୋଗ୍ରାମ୍ ପୂର୍ବରୁ ପରୀକ୍ଷଣ ପର୍ଯ୍ୟାୟରେ ଏହି ଟେକ୍ନୋଲୋଜିର ତ୍ରୁଟି ହାର ୦.୩ ପ୍ରତିଶତ ଥିଲା ବୋଲି ସିନି ଏଆଇ କହିଛି ।
କମ୍ପାନିର ସିଇଓ ଝାଙ୍ଗ୍ ଶାଓଦିଆନ୍ କହିଛନ୍ତି, ଏଆଇ ପୂର୍ବରୁ ଡାକ୍ତରଙ୍କୁ ସାହାଯ୍ୟ କରୁଥିଲା । ଏବେ କିନ୍ତୁ ଆମେ ଏହି ଯାତ୍ରାର ଚୂଡ଼ାନ୍ତ ସୋପାନରେ ପହଞ୍ଚିଛୁ, ଯେଉଁଠି ଏଆଇ ସିଧାସଳଖ ରୋଗ ଚିହ୍ନଟ କରିବ ଓ ରୋଗୀଙ୍କ ଚିକିତ୍ସା କରିବ ।
