ନୂଆଦିଲ୍ଲୀ,୧୫/୦୮: ୟୁପିଆଇରେ ଆଉ ଟଙ୍କା ଧାର କରିପାରିବେ ନାହିଁ ଗ୍ରାହକ। ଖୁବ୍ଶୀଘ୍ର ବନ୍ଦ ହେବାକୁ ଯାଉଛି ଏହି ସୁବିଧା । ନ୍ୟାସନାଲ ପେମେଣ୍ଟ୍ସ କର୍ପୋରେସନ ଅଫ୍ ଇଣ୍ଡିଆ ଅକ୍ଟୋବର ପହିଲାରୁ ୟୁପିଆଇରେ ପିଅର-ଟୁ-ପିଅର କଲେକ୍ଟ ରିକ୍ୟୁଏଷ୍ଟକୁ ସମ୍ପୂର୍ଣ୍ଣ ବନ୍ଦ କରିବାକୁ ନିର୍ଦ୍ଦେଶ ଦେଇଛି। ଯାହା ଦ୍ୱାରା କୌଣସି ବ୍ୟକ୍ତି ଅନ୍ୟ ଜଣେ ବ୍ୟକ୍ତିଙ୍କୁ ଟଙ୍କା ମାଗିବା ରିକ୍ୱେଷ୍ଟ ପଠାଇ ପାରିବେ ନାହିଁ ।
ପିଟୁପି କଲେକ୍ଟ ରିକ୍ୱେଷ୍ଟ ବା ପୁଲ୍ ଟ୍ରାଞ୍ଜାକ୍ସନ ଏକ ଏଭଳି ସୁବିଧା, ଯେଉଁଥିରେ ଜଣେ ୟୁପିଆଇ ୟୁଜରଅନ୍ୟ ଜଣେ ୟୁପିଆଇ ୟୁଜରଙ୍କୁ ଟଙ୍କା ମାଗିବା ସମ୍ପର୍କିତ ରିକ୍ୱେଷ୍ଟ ପଠାନ୍ତି । ରିକ୍ୱେଷ୍ଟ ପାଇବା ପରେ ଟଙ୍କା ଦେଉଥିବା ବ୍ୟକ୍ତି ୟୁପିଆଇ ପିନ୍ ଜରିଆରେ ପେମେଣ୍ଟକୁ ମଞ୍ଜୁରୀ ଦେଇଥାନ୍ତି । ଏହି ଫିଚରକୁ ବ୍ୟବହାର କରି ସାଇବର ଅପରାଧିମାନେ ଲୋକଙ୍କୁ ଠକୁଥିଲେ । ଅଜଣା ନମ୍ବରରୁ ରିକୁଏଷ୍ଟ ପଠାଇ ଲୋକଙ୍କୁ ଟଙ୍କା ପଠାଇବାକୁ ଅନୁରୋଧ କରୁଥିଲେ। ବଢ଼ୁଥିବା ସାଇବର ଠକେଇକୁ ରୋକିବା ପାଇଁ NPCI ଏହି ନିଷ୍ପତ୍ତି ନେଇଛି। ତେବେ ଏହି କଟକଣା ସମସ୍ତଙ୍କ ପାଇଁ ଲାଗୁ ହେବ ନାହିଁ। ଏହି ପ୍ରତିବନ୍ଧକ କେବଳ P2P ସଂଗ୍ରହ ଅନୁରୋଧ ଅର୍ଥାତ୍ ବ୍ୟକ୍ତିଗତ ରିକୁଏଷ୍ଟ ସ୍ତରରେ ଲାଗୁ ହେବ। ତେବେ ବ୍ୟବସାୟୀମାନେ ଯେପରିକି Flipkart, Amazon, Swiggy, କିମ୍ବା IRCTC ବୈଧ ବ୍ୟବସାୟ ପାଇଁ କେଲକ୍ଟ ରିକୁଏଷ୍ଟ ସୁବିଧା ବ୍ୟବହାର କରିପାରିବେ। ଯଦି ଉପଭୋକ୍ତା ପେମେଣ୍ଟକୁ ଅନୁମତି ଦେବେ ତେବେ ଏହା ହୋଇପାରିବ। ଏନପିସିଆଇ ସମସ୍ତ ବ୍ୟାଙ୍କ ଏବଂ ୟୁପିଆଇ ଆପଗୁଡ଼ିକୁ ୧ ଅକ୍ଟୋବର ୨୦୨୫ ସୁଦ୍ଧା P2P କେଲକ୍ଟ ରିକ୍ୟୁଏଷ୍ଟକୁ ସମ୍ପୂର୍ଣ୍ଣ ବନ୍ଦ କରିବାକୁ ନିର୍ଦ୍ଦେଶ ଦେଇଛି।
