ଗୋପାଳପୁର, ୧୬/୫ : ଗୋପାଳପୁର ପୋଲିସ ଶୁକ୍ରବାର ଜଣେ ନାବାଳିକାକୁ ଅସଦାଚରଣ ସହ ଗାଳି ଗୁଲଜ କରିବା ମାମଲାରେ ଜନୈକ ଯୁବକକୁ ଗିରଫ କରି କୋର୍ଟ ଚାଲାଣ କରିଛି l ଗିରଫ ଅଭିଯୁକ୍ତ ଜଣକ ନୁଆଁ ବକ୍ସିପଲ୍ଲୀ ଡୁମୁଲୁପେଟା ଗ୍ରାମର ଏମ.ମଧୁ ରେଡି ବୋଲି ଜଣାପଡ଼ିଛି l 

ସୂଚନା ଅନୁସାରେ ଉକ୍ତ ଥାନା ଅଞ୍ଚଳର ଜଣେ ନାବାଳିକା ଗତ ୯ତାରିଖ ସନ୍ଧ୍ୟାରେ ଟିଉସନ ଯିବା ସମୟରେ ଅଭିଯୁକ୍ତ ମଧୁ ପଛ ପଟୁ ଏକ ପଲସର ବାଇକରେ ଆସି ଧକ୍କା ଦେଇ ନାବାଳିକାକୁ ଫୋନ ନମ୍ବର ମାଗିଥିଲା l ଫୋନ ନମ୍ବର ନ ଦେବାରୁ ନାବାଳିକାର ଡ୍ରେସ ଟିକୁ ଟାଣି ଚିରି ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ମୁହଁକୁ ଏକ ଶକ୍ତ ଚାପୁଡ଼ା ମାରି ଜୀବନରେ ମାରିଦେବି ବୋଲି ଧମକ ଦେଇଥିଲା l ଏ ନେଇ ନାବାଳିକାର ମା’ ଗତକାଲି ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ l 

ଅଭିଯୋଗ ଅନୁସାରେ ପୋଲିସ କେସ ନମ୍ବର ୧୪୬/୨୫ରେ ଏକ ମାମଲା ରୁଜୁ କରି ତଦନ୍ତ କରିବା ସହ ନାବାଳିକାର ବୟାନ ରେକର୍ଡ଼ କରିଥିଲା l ଏଥି ମଧ୍ୟରେ ଅଭିଯୁକ୍ତ ମଧୁ ଫେରାର ରହିଥିଲା l କୌଣସି ସୂତ୍ରରୁ ପୋଲିସ ଖବର ପାଇ ଆଜି ଅଭିଯୁକ୍ତକୁ ନିଜ ଗାଁରୁ ଗିରଫ କରିବା ସହ ବ୍ୟବହାର କରିଥିବା ବାଇକ ଜବତ କରି ଆଜି କୋର୍ଟ ଚାଲାଣ କରିଥିବା ଥାନା ଅଧିକାରୀ ପ୍ରଶାନ୍ତ ମଲ୍ଲିକ ସୂଚନା ଦେଇଛନ୍ତି l