ନୂଆଦିଲ୍ଲୀ,୧୨/୧୨: ସିକ୍ସର କିଙ୍ଗ ଯୁବରାଜ ସିଂ। ଜର୍ସି ପିନ୍ଧି ପଡିଆକୁ ଆସିବା ମାତ୍ରେ ମନେ ପଡିଯାଏ ତାଙ୍କ ୬ ବଲ ୬ ଛକା କଥା । ଆକ୍ରମକ ବ୍ୟାଟିଂ ଓ ଜବରଦସ୍ତ ଫିଲ୍ଡିଂ କରି ସ୍ବତନ୍ତ୍ର ପରିଚୟ ହାସଲ କରିଥିବା ଖେଳାଳି ଭାରତୀୟ କ୍ରିକେଟ ଦଳର ବାମହାତୀ ବ୍ୟାଟ୍ସମ୍ୟାନ ଯୁବରାଜ ସିଂ। ସେ ଆଜି ୪୩ ବର୍ଷରେ ପାଦ ଥାପିଛନ୍ତି ।
ତେବେ ୧୯୮୧ର ଆଜିର ଦିନରେ ଚଣ୍ଡିଗଡରେ ଜନ୍ମ ନେଇଥିଲେ ଯୁବରାଜ । ୧୭ ବର୍ଷ ବୟସରେ ଦେଶ ପାଇଁ ଖେଳିବା ଆରମ୍ଭ କରିଥିଲେ । ଦିନ ଆସିଲା ଅଲରଉାଣ୍ଡର ଖେଳାଳି ଭାବେ ଦେଶକୁ ବିଶ୍ବକପ୍ ମଧ୍ୟ ଜିତାଇଥିଲେ । ସେ ତାଙ୍କ କ୍ୟାରିୟରରେ ୪୦୨ଟି ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି । ସେଥିମଧ୍ୟରେ ୪୦ଟି ଟେଷ୍ଟ, ୩୦୪ଟି ଦିନିକିଆ ଓ ୫୮ଟି ଟି୨୦ ମ୍ୟାଚ୍ ସାମିଲ ରହିଛି । ତେବେ ଖାଲି ବ୍ୟାଟିଂ ନୁହେଁ ଯୁବରାଜ ଜଣେ ଭଲ ବୋଲର ମଧ୍ୟ । ତାଙ୍କ ନାମରେ ୧୪୮ ୱିକେଟ ରହିଛି । ୨୦୦୭ ଆଇସିସି ଟି-୨୦ ବିଶ୍ବକପ ବିଜୟରେ ଯୁବରାଜଙ୍କ ଭୂମିକା ଗୁରୁତ୍ବପୂର୍ଣ୍ଣ ଥିଲା । ଏହାସହ ୨୦୧୧ ବିଶ୍ବକପ ବିଜୟରେ ମଧ୍ୟ ତାଙ୍କ ପ୍ରଦର୍ଶନକୁ ଭୁଲି ନାହାନ୍ତି କ୍ରିକେଟ ପ୍ରେମୀ ।
୨୦୧୧ ବିଶ୍ବକପ୍ରେ ମ୍ୟାନ ଅଫ ଦି ସିରିଜ ବିବେଚିତ ହୋଇଥିଲେ । ୧୦ ଜୁନ୍ ୨୦୧୯ରେ ନିଜର ଅନ୍ତରାଷ୍ଟ୍ରୀୟ କ୍ରିକେଟକୁ ଅଲବିଦା କହିଥିଲେ ଯୁବରାଜ ସିଂ । ମଣିଷ ଶରୀରରେ ସବୁଠୁ ବଡ ରୋଗ କୁହାଯାଉଥିବା କ୍ୟାନ୍ସର ବା କର୍କଟ ରୋଗକୁ ହରାଇଥିଲେ ଏହି ମହାନ ଖେଳାଳି । ସେହିପରି ୨୦୧୧ରେ ବିଶ୍ବକପ ସମୟରେ କ୍ୟାନ୍ସରରେ ପୀଡିତ ଥାଇ ବି ଖେଳିଥିଲେ । ପରବର୍ତ୍ତୀ ସମୟରେ କ୍ୟାନ୍ସରକୁ ମାତ ଦେଇ ଜୀବନଯୁଦ୍ଧରେ ଜିତିଥିଲେ ଯୁବରାଜ ।ସେହିପରି ୨୦୧୯ ଜୁନ ୧୦ ତାରିଖରେ ହଠାତ କ୍ରିକେଟରୁ ଅବସର ଘୋଷଣା କରିଥିଲେ । ଯାହା ଅନେକ କ୍ରିକେଟ ଫ୍ୟାନଙ୍କୁ ନିରାଶ କରିଥିଲା ।
