ନୂଆଦିଲ୍ଲୀ ୧୩/୧୧: ମହୁମାଛିଙ୍କ ଯୋଗୁ ମାର୍କ ଜୁକରବର୍ଗଙ୍କର ଏକ ବଡ଼ ଯୋଜନା ଅଟକିଛି । ସେ ଆମେରିକାର ଏଭଳି ଏକ ସ୍ଥାନରେ ଏଆଇ ଡାଟା ସେଣ୍ଟର୍ ସ୍ଥାପନ କରିବାକୁ ଯାଉଥିଲେ, ଯେଉଁଠି ସହଜରେ ପରମାଣୁ ଶକ୍ତି ମିଳିପାରିବ । କିନ୍ତୁ ଉକ୍ତ ସ୍ଥାନରେ ମହୁମାଛିଙ୍କର ଏକ ଦୁର୍ଲଭ ପ୍ରଜାତି ମିଳିଛି । ମେଟା ସିଇଓ ଜୁକରବର୍ଗ ଜଣେ ନ୍ୟୁକ୍ଲିୟର ପାୱାର ଏନର୍ଜି ଅପରେଟରଙ୍କ ସହ ଏହି ଚୁକ୍ତି ଲାଗି ପ୍ରସ୍ତୁତି ଚଳାଇଥିଲେ ।
ରିପୋର୍ଟ ଅନୁସାରେ, ଜଣେ କର୍ମଚାରୀ କହିଲେ ଯେ ଏଣିକି ଏହି ପ୍ରୋଜେକ୍ଟରେ ଆଗକୁ ବଢ଼ିବା ମୁସ୍କିଲ । କାରଣ ସେଠାରେ ଦୁର୍ଲଭ ପ୍ରଜାତିର ମହୁମାଛି ଆବିଷ୍କୃତ ହୋଇଛନ୍ତି । ଏହା ଯୋଗୁ କମ୍ପାନିକୁ ଅନେକ ନିୟମାବଳୀ ପାଳନ କରିବାକୁ ପଡ଼ିବ । ଜୁକରବର୍ଗଙ୍କ ଅନୁସାରେ, ଯଦି ଏହି ଚୁକ୍ତି ଆଗକୁ ବଢ଼ିଥାନ୍ତା ତେବେ ମେଟା ପାଖରେ ପ୍ରଥମ ପରମାଣୁ ଉର୍ଜା ଦ୍ୱାରା ପରିଚାଳିତ ଏଆଇ ଡାଟା ସେଣ୍ଟର୍ ଥାନ୍ତା । ଯଦି କମ୍ପାନି ଏହାର କୌଣସି ବିକଳ୍ପ ମାର୍ଗ ଖୋଜିପାରିବ, ତେବେ ଏହି ପରିଯୋଜନା ସତରେ ରୂପାନ୍ତରିତ ହୋଇପାରିବ । କମ୍ପାନିକୁ ଏ ମାମଲାରେ ଆଗକୁ ବଢ଼ିବାକୁ ପଡ଼ିବ, କାରଣ ତାଙ୍କ ପ୍ରତିଯୋଗୀମାନେ ମଧ୍ୟ ପରମାଣୁ ଶକ୍ତିରେ ନିବେଶ କରୁଛନ୍ତି ବୋଲି ସେ କହିଛନ୍ତି ।
ଗୁଗଲ୍ ୨୦୩୦ ମସିହାରୁ ଆରମ୍ଭ ହେବାକୁ ଯାଉଥିବା ନିଜର ଡାଟା ସେଣ୍ଟର୍କୁ ବିଜୁଳି ଯୋଗାଣ ଲାଗି ୭ କ୍ଷୁଦ୍ର ନ୍ୟୁକ୍ଳିୟର ପାୱାର ପ୍ଲାଣ୍ଟ୍ ସ୍ଥାପନ ବିଷୟରେ ଘୋଷଣା କରିଛି । ପରମାଣୁ ରିଆକ୍ଟର ନିର୍ମାଣ ଲାଗି ଷ୍ଟାର୍ଟଅପ୍ କାରୋସ ପାୱାର ସହ ମିଶି ଏହା କାମ ଆରମ୍ଭ କରିସାରିଛି । ଆମାଜନ୍ ଓ ମାଇକ୍ରୋସଫ୍ଟ ମଧ୍ୟ ଏ କ୍ଷେତ୍ରରେ କାମ ଆରମ୍ଭ କରିଦେଇଛନ୍ତି । ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ସମ୍ବନ୍ଧୀୟ କାମ ପୂରା କରିବା ଲାଗି ଏଆଇ ଡାଟା ସେଣ୍ଟର୍ ନିର୍ମାଣ କରାଯାଏ । ଏଠାରେ ବ୍ୟାପକ ସ୍ତରୀୟ କମ୍ପ୍ୟୁଟିଙ୍ଗ ସିଷ୍ଟମ୍ ଥାଏ । ଜିଟିଳ ମେସିନ୍ ଲର୍ନିଂ ମଡେଲ, ଆଲ୍ଗୋରିଦମ୍ ପ୍ରସ୍ତୁତି ଓ ବ୍ୟବହାର ଲାଗି ଏହି କମ୍ପ୍ୟୁଟିଙ୍ଗ୍ର ଉପଯୋଗ କରାଯାଏ । ଏଆଇ ଡାଟା ସେଣ୍ଟର୍ରେ ଉଚ୍ଚ-ପ୍ରଦର୍ଶନକାରୀ ସର୍ଭର, ଷ୍ଟୋରେଜ୍ ସିଷ୍ଟମ୍, ନେଟ୍ୱର୍କିଂ ଇନ୍ଫ୍ରାଷ୍ଟକଚର ଆଦି ଥାଏ । ତେଣୁ ଏଥିପାଇଁ ଅଧିକ ବଦ୍ୟୁତ୍ ଶକ୍ତି ଆବଶ୍ୟକ ହୁଏ । ଏହି ଆବଶ୍ୟକତା ପୂରଣ ଲାଗି କମ୍ପାନିଗୁଡ଼ିକ କ୍ଷୁଦ୍ର ପରମାଣୁ ପ୍ଲାଣ୍ଟ୍ ପ୍ରସ୍ତୁତ କରୁଛନ୍ତି ।
