ଇସଲାମାବାଦ : ପାକିସ୍ତାନ ଉପରେ ଖପ୍ପା ଚାଇନା । ପାକ୍ ବିରୋଧରେ ଚାଇନାରୁ ଉଠିଲା ତୀବ୍ର ସ୍ୱର। ପାକିସ୍ତାନ ଆଉ ଚାଇନା ନାଗରିକଙ୍କ ପାଇଁ ସୁରକ୍ଷିତ ନୁହେଁ। ଏକଥା କହିଛି ଚୀନ୍। ପାକିସ୍ତାନର ଖୈବର ପଖତୁନଖ୍ୟାରେ ଏକ ଜଳ ବିଦ୍ୟୁତ୍ ପ୍ରକଳ୍ପରେ ଆତ୍ମଘାତୀ ହମଲା ହୋଇଥିଲା। ଏଥିରେ ୫ଜଣ ଚାଇନା ନାଗରିକଙ୍କ ଜୀବନ ଯାଇଥିଲା। ଏହି ଘଟଣା ପରେ ଚୀନର ଏକ କମ୍ପାନୀ ଉକ୍ତ ଅଶାନ୍ତ ଅଞ୍ଚଳରେ ଆଉ ଏକ ଜଳବିଦ୍ୟୁତ୍ ପ୍ରକଳ୍ପର ନିର୍ମାଣ କାର୍ଯ୍ୟରେ ରୋକ୍ ଲଗେଇଛି ଏବଂ ଶହ ଶହ ଶ୍ରମିକଙ୍କୁ କାମରୁ ହଟେଇ ଦେଇଛି।
ଗୁରୁବାର ମିଡ଼ିଆରେ ଆସିଥିବା ଖବରରେ ଏହି ସୂଚନା ଦିଆ ଯାଇଛି। ମଙ୍ଗଳବାର ଖୈବର ପଖତୁନଖ୍ୟାର ଏକ ଅଞ୍ଚଳରେ ବିସ୍ଫୋରକ ଲଦା ଗୋଟିଏ ଗାଡ଼ି , ଏକ ବସ୍ ସହ ଧକ୍କା ହୋଇଥିଲା। ଯାହାଦ୍ୱାରା ଏଥିରେ ବସି ଥିବା ଦାସୁ ଜଳବିଦ୍ୟୁତ୍ ପ୍ରକଳ୍ପରେ କାମ କରୁଥିବା ୫ ଜଣ ଚାଇନା ନାଗରିକଙ୍କ ସହ ୬ ଜଣ ବ୍ୟକ୍ତିଙ୍କର ମୃତ୍ୟୁ ହୋଇଛି।
କୌଣସି ଆତଙ୍କୀ ସଙ୍ଗଠନ ଏହି ଆତ୍ମଘାତୀ ହମଲାରେ ନିଜକୁ ଦାୟୀ କରି ନାହାନ୍ତି। ଡନ୍ ଖବର କାଗଜ ସରକାରୀ ସୂତ୍ରାନୁସାରେ ନିଜ ଖବରରେ କହିଛି, ଚାଇନା କମ୍ପାନୀ ପାୱର କଷ୍ଟ୍ରକ୍ସନ କର୍ପୋରେସନ ଅଫ୍ ଚୀନ୍ ( ପିସିସିସି) ଶାଙ୍ଗଲା ଜିଲ୍ଲାରେ ଆତ୍ମଘାତୀ ହମଲାରେ , ଚାଇନା ନାଗରିକଙ୍କ ମୃତ୍ୟୁ ପରେ ପ୍ରାନ୍ତର ସ୍ୱାବି ଜିଲ୍ଲାରେ ଥିବା ତାରବେଲା ଜଳବିଦ୍ୟୁତ୍ ବିସ୍ତୃତ ପ୍ରକଳ୍ପର ନିର୍ମାଣ ସମ୍ୱନ୍ଧୀୟ କାର୍ଯ୍ୟକୁ ବନ୍ଦ କରି ଦେଇଛି।
ଏଠାରେ କମ୍ପାନୀ ୨ହଜାରରୁ ଅଧିକ ଶ୍ରମିକଙ୍କ କାମରୁ ହଟେଇ ଦେଇଛି। ଖବର ମୁତାବିକ , କମ୍ପାନୀର ପ୍ରକଳ୍ପ ପ୍ରବନ୍ଧକ ଏକ ଆଦେଶ ଜାରି କରି କାର୍ଯ୍ୟ ସ୍ଥଗିତ କରାଯିବାକୁ ଘୋଷଣା କରିଛନ୍ତି ଏବଂ କହିଛନ୍ତି ସୁରକ୍ଷା କାରଣରୁ ଆଗାମୀ ଆଦେଶ ଆସିବା ଯାଏ ସବୁ କର୍ମଚାରୀ ଓ ଶ୍ରମିକଙ୍କୁ ହଟାଇ ଦିଆ ଯାଇଛି।
କହି ରଖୁଛୁ କି, ପାକିସ୍ତାନର ଖୈବର ପଖତୁନଖ୍ୟା ପ୍ରାନ୍ତର ଶାଙ୍ଗଲା ଜିଲ୍ଲାର ବେଶମ ସହରରେ ଏକ ଏକ୍ସର୍ଟ ଉପରେ ହମଲାରେ ୫ଜଣ ଚାଇନା ଓ ଜଣେ ସ୍ଥାନୀୟ ନାଗରିକଙ୍କର ମୃତ୍ୟୁ ହୋଇଥିଲା। ଏହାପରେ ଚୀନ୍ରେ ଉକ୍ତ ଘଟଣାକୁ ନେଇ ଗଭୀର ସ୍ୱର ଉଠିଛି। ପାକିସ୍ତାନ ସ୍ଥିତ ଚାଇନା ଦୂତାବାସ ଏକ ବୟାନରେ କହିଛି , ପାକିସ୍ତାନରେ ଚାଇନା ଦୂତାବାସ ଓ ବାଣିଜ୍ୟ ଦୂତାବାସ ଜରୁରିକାଳୀନ କାର୍ଯ୍ୟ ଆରମ୍ଭ କରି ଦେଇଛନ୍ତି ଏବଂ ପାକିସ୍ତାନୀ ପକ୍ଷରୁ ହମଲାର କଡ଼ା ଯାଞ୍ଚ କରିବା , ଦୋଷୀଙ୍କୁ କଠୋର ସଜା ଦେବା ତଥା ଚାଇନା ନାଗରିକଙ୍କ ସୁରକ୍ଷା ପାଇଁ ବ୍ୟାବହାରିକ ତଥା ପ୍ରଭାବୀ ଉପାୟର ଦାବି ଉଠାଇଛନ୍ତି।
