ମେଲବର୍ଣ୍ଣ,୨୮/୦୩: ଆଗାମୀ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ ପାଇଁ କ୍ରିକେଟ୍ ଅଷ୍ଟ୍ରେଲିଆ ପକ୍ଷରୁ ଚୂଡ଼ାନ୍ତ କ୍ରୀଡ଼ାସୂଚୀ ଘୋଷଣା କରାଯାଇଛି । ଆସନ୍ତା ନଭେମ୍ବର ୨୨ରୁ ଟେଷ୍ଟ ସିରିଜ ଆରମ୍ଭ ହୋଇ ୨୦୨୫ ଜାନୁଆରୀ ମାସ ୭ ତାରିଖରେ ଶେଷ ହେବ । ଫଳରେ ନଭେମ୍ବର ଦ୍ୱିତୀୟ ସପ୍ତାହରୁ ଭାରତୀୟ ଦଳ ଅଷ୍ଟ୍ରେଲିଆରେ ପହଞ୍ଚି ପ୍ରସ୍ତୁତି ଆରମ୍ଭ କରିବ । ଏଣିକି ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜରେ ୫ଟି ମ୍ୟାଚ୍ ଖେଳାଯିବ । ପୂର୍ବରୁ ଏହି ସିରିଜ ୪ମ୍ୟାଚ୍ ବିଶିଷ୍ଟ ରହିଥିଲା । ଶେଷ ଥର ପାଇଁ ୧୯୯୧/୯୨ରେ ଉଭୟ ଦଳ ମଧ୍ୟରେ ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳାଯାଇଥିଲା । ଅଷ୍ଟ୍ରେଲିଆ ୪-୦ରେ ଏହି ସିରିଜ ଜିତିଥିଲା । ମାତ୍ର ସେତେବେଳେ ଏହି ସିରିଜର ନାମ ବର୍ଡର-ଗାଭାସ୍କର ଟ୍ରଫି ନଥିଲା ।
ପେସ୍ ବୋଲରଙ୍କ ସ୍ୱର୍ଗ ଭାବେ ପରିଚିତ ପର୍ଥରେ ପ୍ରଥମ ଟେଷ୍ଟ ଆୟୋଜନ କରାଯିବ । ନଭେମ୍ବର ୨୨ ତାରିଖରୁ ଏହି ଟେଷ୍ଟ ଆରମ୍ଭ ହେବ। ପର୍ଥରେ ନବ ନିର୍ମିତ ଅପ୍ଟସ ଷ୍ଟାଡ଼ିୟମ୍ ବର୍ତ୍ତମାନ ଅଷ୍ଟ୍ରେଲିଆର ପ୍ରିୟ ଭେନ୍ୟୁ ଭାବେ ଗଣା ହେଉଛି । ଏହି ଗ୍ରାଉଣ୍ଡରେ ଅଷ୍ଟ୍ରେଲିଆ ୪ଟି ଟେଷ୍ଟ ଖେଳିଛି ଓ ସମସ୍ତ ଟେଷ୍ଟ ଜିତିଛି । ୨୦୧୮/୧୯ ସିଜନରେ ବର୍ଡର-ଗାଭାସ୍କର ଟ୍ରଫିର ପ୍ରଥମ ଟେଷ୍ଟ ଖେଳାଯାଇଥିଲା ଓ ଅଷ୍ଟ୍ରେଲିଆ ୧୪୬ ରନ୍ରେ ଉକ୍ତ ମ୍ୟାଚ୍ ଜିତିଥିଲା । ମାତ୍ର ପରେ ଭାରତ ୨-୧ରେ ସିରିଜ ବିଜୟୀ ହୋଇଥିଲା । ୨୦୨୦/୨୧ରେ ଏହି ଗ୍ରାଉଣ୍ଡ ବର୍ଡର-ଗାଭାସ୍କର ଟ୍ରଫି ଆୟୋଜନର ସୁଯୋଗ ପାଇ ନଥିଲା ।
🔥 Six white-ball matches with Pakistan
— ICC (@ICC) March 27, 2024
🏏 Five #WTC25 Tests against India
Some mouth-watering contests coming up in Australia this summer 👀https://t.co/MFRiiDzzfe
ମେଲବର୍ଣ୍ଣରେ ବକ୍ସିଂ ଡେ’ ଟେଷ୍ଟ ପୂର୍ବରୁ ସିରିଜର ପ୍ରଥମ ୩ଟି ଟେଷ୍ଟ ଶେଷ ହୋଇ ସାରିଥିବ । ଆଡିଲେଡ୍ରେ ଦ୍ୱିତୀୟ ଟେଷ୍ଟ ଓ ବ୍ରିସବେନ(ଗାବା) ରେ ତୃତୀୟ ଟେଷ୍ଟ ଅନୁଷ୍ଠିତ ହେବ । ସିଡନୀ ପାରମ୍ପରିକ ନୂଆ ବର୍ଷ ଟେଷ୍ଟ ଆୟୋଜନ କରିବ । ଆଡିଲେଡ୍ ଦିବା-ରାତ୍ର ଟେଷ୍ଟ ଆୟୋଜନ କରିବ । ଫଳରେ ପିଙ୍କ୍ ବଲ୍ରେ ଏହି ମ୍ୟାଚ୍ ଖେଳାଯିବ ।
ସୂଚନାଯୋଗ୍ୟ, ଭାରତ ୨୦୧୭ରୁ ବର୍ଡର-ଗାଭାସ୍କର ଟ୍ରଫି ବଜାୟ ରଖିଛି । ୨୦୧୮/୧୯ ଓ ୨୦୨୦/୨୧ ଗସ୍ତରେ ଭାରତ ୨-୧ରେ ସିରିଜ ବିଜୟ ହାସଲ କରିଥିଲା ।