ଭୁବନେଶ୍ୱର,୨୯/୦୩: ବିଜେପିରେ ଟିକଟ କସରତ ଜୋର୍ ହୋଇଛି । ବିଜେଡି ଆଗୁଆ ବିଧାନସଭା ପ୍ରାର୍ଥୀ ଘୋଷଣା କରି ପାଦେ ଆଗରେ ଅଛି । ତେବେ ବିଜେପି ଦିନେ ବା ଦୁଇ ଦିନ ଭିତରେ ୧୦୦ ଜଣିଆ ପ୍ରାର୍ଥୀ ତାଲିକା ଘୋଷଣା କରିବ । ଏହା ଉପରେ ଚୂଡ଼ାନ୍ତ ମୋହର ମାରିବାକୁ ଗୁରବାର ବିଳମ୍ବିତ ରାତି ଯାଏ ଦିଲ୍ଲୀରେ ବୈଠକ ବସିଛି । ବିଜେପି ଅଧ୍ୟକ୍ଷ ଜେ.ପି. ନଡ୍ଡା ଓ ଗୃହମନ୍ତ୍ରୀ ଅମିତ ଶାହଙ୍କ ଉପସ୍ଥିତିରେ ତିନି ଘଣ୍ଟା ଯାଏ ମାରାଥନ୍ ଆଲୋଚନା ହୋଇଛି ।
ପ୍ରଥମ ପର୍ଯ୍ୟାୟରେ ୧୮ଜଣିଆ ଲୋକସଭା ପ୍ରାର୍ଥୀ ତାଲିକା ଘୋଷଣା ହୋଇଥିଲା । କେବଳ ଯାଜପୁର, କଟକ ଓ କନ୍ଧମାଳ ଆସନକୁ ଝୁଲାଇ ରଖାଯାଇଥିଲା । ଏହି ତିନି ଆସନ ପାଇଁ ପ୍ରାର୍ଥୀଙ୍କ ସମେତ ବିଧାନସଭା ପ୍ରାର୍ଥୀ ତାଲିକାକୁ ସମସ୍ତେ ଅପେକ୍ଷା କରି ରହିଛନ୍ତି । ପ୍ରାର୍ଥୀ ତାଲିକା ଚୂଡ଼ାନ୍ତ କରିବାକୁ ଗୁରୁବାର ବିଜେପି ରାଜ୍ୟ ସଭାପତି ମନମୋହନ ସାମଲ ଓ ରାଜ୍ୟ ସଂଗଠନ ସମ୍ପାଦକ ମାନସ ମହାନ୍ତି ଦିଲ୍ଲୀ ଯାଇଛନ୍ତି।
ଅପରାହ୍ନରେ ଦିଲ୍ଲୀସ୍ଥିତ ବିଜେପି ମୁଖ୍ୟାଳୟରେ ଭର୍ତ୍ତୃହରି ଓ ସିଦ୍ଧାନ୍ତଙ୍କ ମିଶ୍ରଣ ପର୍ବ ପରେ ସନ୍ଧ୍ୟାରେ କୋର୍ କମିଟି ବୈଠକ ବସିଥିଲା । ରାଜ୍ୟ ସଭାପତି ଓ ସମ୍ପାଦକଙ୍କ ସହିତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟ ନିର୍ବାଚନ ପ୍ରଭାରୀ ବିଜୟ ପାଲ ସିଂ ତୋମାର ଉପସ୍ଥିତ ଥିଲେ । ସନ୍ଧ୍ୟାରେ ନଡ୍ଡାଙ୍କ ସହିତ ଦୀର୍ଘ ସମୟ ଯାଏ ପ୍ରାର୍ଥୀ ତାଲିକା ଉପରେ ଆଲୋଚନା ହୋଇଥିଲା । ପରେ ଗୃହମନ୍ତ୍ରୀ ଶାହ ଆସି ବୈଠକରେ ସାମିଲ ହୋଇଥିଲେ । ଦ୍ୱିତୀୟ ପର୍ଯ୍ୟାୟରେ ବିଜେପି ୩ଟି ଲୋକସଭା ଆସନ ସହିତ ୧୦୦ ଜଣିଆ ବିଧାନସଭା ପ୍ରାର୍ଥୀ ତାଲିକା ଘୋଷଣା କରିପାରେ । କିଛି ପୁରୁଖା ନେତାଙ୍କ ସହିତ ନୂଆ ମୁହଁକୁ ବିଜେପି ତାଲିକାରେ ଦେଖିବାକୁ ମିଳିବ । ବିଜେପି ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି, ୧୦୦ଜଣିଆ ତାଲିକା ଚୂଡ଼ାନ୍ତ ହୋଇଛି । ଦିନେ ବା ଦୁଇ ଦିନ ଭିତରେ ଏହା ଘୋଷଣା କରାଯିବ ।