ନୂଆଦିଲ୍ଲୀ, ୨୮/୦୩: ଦେଶର ସବୁଠୁ ଧନୀ ମହିଳା ତଥା ହରିୟାଣାର ପୂର୍ବତନ ମନ୍ତ୍ରୀ ସାବିତ୍ରୀ ଜିନ୍ଦଲ କଂଗ୍ରେସ ହାତ ଛାଡ଼ି ଦେଇଛନ୍ତି । କିଛିଦିନ ତଳେ ତାଙ୍କ ପୁଅ ତଥା ଶିଳ୍ପପତି ନବୀନ ଜିନ୍ଦଲ କଂଗ୍ରେସ ଛାଡ଼ି ବିଜେପିରେ ସାମିଲ୍ ହୋଇଥିଲେ । ୮୪ ବର୍ଷୀୟ ସାବିତ୍ରୀ ଜିନ୍ଦଲ ଏକ ସୋସିଆଲ୍ ମିଡିଆ ପୋଷ୍ଟ କରି କଂଗ୍ରେସ ଛାଡ଼ିଥିବା ଘୋଷଣା କରିଛନ୍ତି ।
ସାବିତ୍ରୀ ଜିନ୍ଦଲ ଲେଖିଛନ୍ତି, ମୁଁ ବିଧାୟିକା ଭାବେ ୧୦ ବର୍ଷ ଧରି ହିସାର ଲୋକଙ୍କ ପ୍ରତିନିଧିତ୍ୱ କରିଥିଲି । ଜଣେ ମନ୍ତ୍ରୀ ଭାବେ ନିଃସ୍ୱାର୍ଥପର ସହ ହରିୟାଣାର ସେବା କରୁଥିଲି । ହିସାର ଲୋକ ହେଉଛନ୍ତି ମୋ ପରିବାର ଏବଂ ପରିବାର ପରାମର୍ଶକ୍ରମେ ମୁଁ ଆଜି କଂଗ୍ରେସର ପ୍ରାଥମିକ ସଭ୍ୟ ପଦରୁ ଇସ୍ତଫା ଦେଉଛି ।
ଫୋବର୍ସ ଇଣ୍ଡିଆ ଚଳିତ ବର୍ଷ ସାବିତ୍ରୀ ଜିନ୍ଦଲଙ୍କୁ ଦେଶର ସବୁଠୁ ଧନୀ ମହିଳା ବିବେଚନା କରିଥିଲା । ଫୋବର୍ସର ଭାରତର ସବୁଠୁ ଧନୀ ୧୦ ମହିଳାଙ୍କ ତାଲିକା ଅନୁସାରେ, ଦିବଙ୍ଗତ ଶିଳ୍ପପତି ତଥା ପୂର୍ବତନ ମନ୍ତ୍ରୀ ଓପି ଜିନ୍ଦଲଙ୍କ ପତ୍ନୀ ସାବିତ୍ରୀ ଜିନ୍ଦଲଙ୍କ ମୋଟ ସମ୍ପତ୍ତି ୨୯.୧ ଅରବ ଆମେରିକୀୟ ଡଲାର୍ (୨୪.୨୭ ହଜାର କୋଟି ଟଙ୍କା) ।
ହରିୟାଣାର ଭୂପିନ୍ଦର ସିଂହ ହୁଡ୍ଡାଙ୍କ ନେତୃତ୍ୱାଧୀନ ସରକାରରେ ମନ୍ତ୍ରୀ ଥିଲେ ସାବିତ୍ରୀ ଜିନ୍ଦଲ । ୨୦୧୪ ଲୋକସଭା ନିର୍ବାଚନରେ ସେ ହିସାରରୁ ଲଢ଼ିଥିବା ବେଳେ ବିଜେପିର ଡା. କମଲ ଗୁପ୍ତାଙ୍କ ଠାରୁ ହାରି ଯାଇଥିଲେ । ଗୁପ୍ତା ଏବେ ନାୟବ ସିଂହ ସୈନି ସରକାରରେ ମନ୍ତ୍ରୀ ଅଛନ୍ତି । ସାବିତ୍ରୀ ଜିନ୍ଦଲଙ୍କ ପୁଅ ତଥା ଶିଳ୍ପପତି ନବୀନ ଜିନ୍ଦଲଙ୍କୁ ବିଜେପି କୁଋକ୍ଷେତ୍ର ଆସନରୁ ପ୍ରାର୍ଥୀ କରିଛି ।
୨୦୦୪ରୁ ୨୦୧୪ ପର୍ଯ୍ୟନ୍ତ କୁଋକ୍ଷେତ୍ର ଲୋକସଭା ଆସନରୁ ପ୍ରତିନିଧିତ୍ୱ କରିଥିବା ନବୀନ ଜିନ୍ଦଲ ରବିବାର କଂଗ୍ରେସ ଛାଡ଼ି ଦେଇଥିଲେ । ବିଜେପିରେ ମିଶିବା ସହ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ବିକଶିତ ଭାରତ’ ଏଜେଣ୍ଡାରେ ଯୋଗଦାନ ଦେବାକୁ ଚାହୁଁଛି ।