ଭୁବନେଶ୍ୱର,୧୩/୦୭: ବୋଲ୍ ବମ୍ ..ହର ହର ବମ୍ । କୈଳାସପତି ପାର୍ କରେଗା... ପାର୍ବତୀ ପତି ପାର୍ କରେଗା, ବାବାମଣି ନେ ଟାଣି.... । ଏହିଭଳି ଧ୍ୱନିରେ ପ୍ରକମ୍ପିତ ହେବ ନଦୀ ଘାଟ, ରାସ୍ତା ଓ ଶିବାଳୟ । ଗେରୁଆ ବସ୍ତ୍ର ପିନ୍ଧି କାନ୍ଧରେ ବାହୁଙ୍ଗା ଧରି ଭକ୍ତମାନେ ମହାଦେବଙ୍କୁ କରିବେ ଜଳଲାଗି । ପ୍ରଭୁଙ୍କୁ ମାଗିବେ ନିଜର ମନସ୍କାମନା । ରାତି ପାହିଲେ ଶ୍ରାବଣ ମାସର ପ୍ରଥମ ସୋମବାର । ମହାଦେବଙ୍କୁ ଜଳଲାଗି କରିବେ କାଉଡ଼ିଆ ଭକ୍ତ।
ଶ୍ରାବଣ ମାସକୁ ଅନ୍ୟତମ ପବିତ୍ର ମାସ ଭାବେ ଗଣନା କରାଯାଏ । ଏହି ମାସକୁ ଶିବଭକ୍ତମାନେ ଅନେଇ ବସିଥାନ୍ତି । କେହି କେହି ଶ୍ରାବଣ ମାସର ପ୍ରଥମ ସୋମବାର ମହାଦେବଙ୍କୁ ଜଳଲାଗି କରୁଥିବା ବେଳେ କେହି ପ୍ରତି ଶ୍ରାବଣ ସୋମବାରରେ ପାଣି ଢାଳିଥାନ୍ତି । ସେଥିପାଇଁ ଶ୍ରୀଲିଙ୍ଗରାଜ ମନ୍ଦିର ସମେତ, ଭାସ୍କରେଶ୍ୱର ମନ୍ଦିର, ବିଶ୍ୱେଶ୍ୱର ମନ୍ଦିର, ମୁକ୍ତେଶ୍ୱର ମନ୍ଦିର, ଗଣ୍ଡମୁଣ୍ଡା ମହାକାଳେଶ୍ୱର ମନ୍ଦିର, ଧର୍ମବିହାରସ୍ଥିତ ଧର୍ମେଶ୍ୱର ମନ୍ଦିର, ସିଦେ୍ଧଶ୍ୱର ମହାଦେବ ମନ୍ଦିର ସମେତ ଏକାମ୍ରକ୍ଷେତ୍ରର ସମସ୍ତ ଶୈବପୀଠରେ ସୋମବାର ଭକ୍ତଙ୍କର ଲାଗିବ ପ୍ରବଳ ଗହଳି । ଏଥିପାଇଁ ଶୈବପୀଠଗୁଡ଼ିକରେ ମଧ୍ୟ ଆରମ୍ଭ ହୋଇଗଲାଣି ସମସ୍ତ ପ୍ରସ୍ତୁତି । ସୋମବାର ସକାଳୁ ମହାଦେବଙ୍କର ଦୈନନ୍ଦିନ ନୀତିକାନ୍ତି ସରିଲା ପରେ ଭକ୍ତମାନେ ଦର୍ଶନ ଓ ପାଣି ଲାଗି କରିବେ । କାଉଡ଼ିଆ ଭାଇମାନେ କିଣାକିଣି ଉଦ୍ଦେଶ୍ୟରେ ବଜାରମୁହାଁ ହେଲେଣି ।
ୟୁନିଟ-୧ ସ୍ଥିତ ଦୋକାନଗୁଡ଼ିକରେ ଲୋକମାନଙ୍କ ଗହଳି ଲାଗିରହୁଛି । ବାଉଁଶ ବାହୁଙ୍ଗାର ମୂଲ୍ୟ ୧୮୦ ଟଙ୍କାରୁ ଆରମ୍ଭ ହୋଇ ୫୦୦ ଟଙ୍କା ପର୍ଯ୍ୟନ୍ତ ରହିଛି । ବାହୁଙ୍ଗା ସେଟ୍ର ମୂଲ୍ୟ ୨୨୦ ଟଙ୍କାରୁ ଆରମ୍ଭ ହେଉଛି । ସେହିପରି ବେତ ବାହୁଙ୍ଗାର ମୂଲ୍ୟ ୮୦୦ରୁ ୧୦୦୦ ଟଙ୍କା ରହୁଛି । ବାହୁଙ୍ଗା ସଜେଇବା ପାଇଁ ଲାଗୁଥିବା ଶିବଲିଙ୍ଗ, ସାପ, ବେଲପତ୍ର, ତ୍ରିଶୁଳ, ଧୂପଦାନି, ଘୁଙ୍ଗୁର, ଘଣ୍ଟି, ହାତୀଶୁଣ୍ଢ, ଫିତା ୧୫ ଟଙ୍କାରୁ ଆରମ୍ଭ ହୋଇ ୪୦ ଟଙ୍କା ପର୍ଯ୍ୟନ୍ତ ରହିଛି । ଶିକା ମୂଲ୍ୟ ୪୦ ଟଙ୍କାରୁ ଆରମ୍ଭ ହୋଇ ୭୦ ଟଙ୍କା ପର୍ଯ୍ୟନ୍ତ ରହୁଛି । ମାଟି କଳସ ୩୦ ଟଙ୍କାରୁ ଆରମ୍ଭ ହୋଇ ୫୦ ଟଙ୍କା ପର୍ଯ୍ୟନ୍ତ ରହିଥିବା ବେଳେ ପିତଳ କଳସ ଆକାର ଏବଂ ଓଜନ ଅନୁଯାୟୀ ମୂଲ୍ୟ ୨୦୦ ଟଙ୍କାରୁ ଆରମ୍ଭ ହୋଇ ୧୦୦୦ ଟଙ୍କା ପର୍ଯ୍ୟନ୍ତ ରହିଛି । ମହାଦେବ ଓ ଦେବୀ ପାର୍ବତୀଙ୍କର ଚିତ୍ରଥିବା ଟି-ସାର୍ଟ ଦେଢଶହ ଟଙ୍କାରୁ ଆରମ୍ଭ ହେଉଥିବା ବେଳେ ଗେରୁଆ ପ୍ୟାଣ୍ଟ୍ର ମଲ୍ୟ ୧୩୦ ଟଙ୍କା ।
ଏକ ନମ୍ବର ହାଟରେ ବୋଲବମ୍ ସାମଗ୍ରୀ ବିକ୍ରିକରୁଥିବା ଶ୍ରୀକାନ୍ତ କୁହନ୍ତି, ଆସନ୍ତା ଶ୍ରାବଣମାସର ପ୍ରଥମ ସୋମବାର ପାଇଁ ଲୋକମାନେ ବେଶ୍ ଉତ୍ସାହିତ । ଯେଉଁ ଭକ୍ତମାନେ ପ୍ରଥମକରି ପାଣି ଲାଗିକରିବେ ସେମାନଙ୍କ ଭିତରେ ଢେର୍ ଆନନ୍ଦ ଦେଖାଯାଉଛି । ସେମାନେ ବିଭିନ୍ନ ପ୍ରକାର ସାମଗ୍ରୀ କିଣିବାକୁ ସଂକୋଚ କରୁନାହାନ୍ତି ।
