ନୂଆଦିଲ୍ଲୀ,୦୯/୧୧: ଭାରତର ପ୍ରଧାନ ବିଚାରପତି (ସିଜେଆଇ) ଡି.ୱାଇ ଚନ୍ଦ୍ରଚୂଡ଼ ନଭେମ୍ବର ୧୦ରେ ଅବସର ନେବେ । ୧୦ ତାରିଖ ରବିବାର ଥିବାରୁ ଶୁକ୍ରବାର ସୁପ୍ରିମକୋର୍ଟରେ ତାଙ୍କ ଶେଷ କାର୍ଯ୍ୟଦିବସ ଥିଲା । ସିଜେଆଇଙ୍କୁ ବିଦାୟ ସମ୍ବର୍ଦ୍ଧନା ଦେବା ଲାଗି ସେରିମୋନିଆଲ ଖଣ୍ଡପୀଠ ବସିଥିଲା । ଏହାର ସିଧା ପ୍ରସାରଣ କରାଯାଇଥିଲା । ଏହି ଅବସରରେ ସିଜେଆଇ ବେଶ୍ ଭାବୁକ ହେବା ସହ କାହାକୁ କଷ୍ଟ ଦେଇଥିଲେ କ୍ଷମା କରିଦେବେ ବୋଲି କହିଥିଲେ । ଆବଶ୍ୟକ ସମୟରେ ଲୋକଙ୍କ ସେବାଠାରୁ ବଳି ଖୁସି ଆଉ କିଛି ବି ନାହିଁ । ପ୍ରତି ମୁହୂର୍ତ୍ତରେ ମୁଁ ଏହି ଅଦାଲତରୁ କିଛି ନା କିଛି ଶିଖିବାକୁ ପାଇଛି ।
ଏହା ହିଁ ମୋତେ ଆଗକୁ ବଢ଼ାଇବାକୁ ପ୍ରେରଣା ଦେଇଛି । ସମାଜକୁ ସେବା କରିବାର ଅବସର ମୋତେ ଏଠାରୁ ମିଳିଛି ବୋଲି ସିଜେଆଇ କହିଥିଲେ । ଏହି ସମୟରେ ସେ ଆଗକୁ ନଇଁବା ସହ ହାତ ଯୋଡ଼ିବା ମୁଦ୍ରାରେ ଛିଡ଼ା ହୋଇଥିଲେ । କାର୍ଯ୍ୟକ୍ରମରେ ସିଜେଆଇଙ୍କ ସହ ଜଷ୍ଟିସ୍ ମନୋଜ ମିଶ୍ର, ଜଷ୍ଟିସ୍ ଜେ.ବି ପାର୍ଦିୱାଲା, ବରିଷ୍ଠ ଓକିଲଙ୍କ ସମେତ ଆସନ୍ତା ୧୧ ତାରିଖରେ ପ୍ରଧାନ ବିଚାରପତି ଭାବେ ପଦ ସମ୍ଭାଳିବାକୁ ଥିବା ଜଷ୍ଟିସ୍ ସଞ୍ଜୀବ ଖାନ୍ନା ମଧ୍ୟ ସାମିଲ ହୋଇଥିଲେ । ସିଜେଆଇ ଚନ୍ଦ୍ରଚୂଡ଼ଙ୍କ ପରେ ଜଷ୍ଟିସ୍ ଖାନ୍ନା ଭାରତର ୫୧ତମ ପ୍ରଧାନ ବିଚାରପତି ହେବେ ।
୨୦୧୬ ମେ ୧୩ରେ ସିଟିଂ ଜଜ୍ ଭାବେ ଆହ୍ଲାବାଦ୍ ହାଇକୋର୍ଟ ମୁଖ୍ୟ ବିଚାରପତିରୁ ସୁପ୍ରିମକୋର୍ଟକୁ ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ପଦୋନ୍ନତି ହୋଇଥିଲା । ୨୦୨୨ ନଭେମ୍ବର ୯ରେ ସେ ପ୍ରଧାନ ବିଚାରପତି ଭାବେ ଦାୟିତ୍ୱ ସମ୍ଭାଳିଥିଲେ । ନିଜ କାର୍ଯ୍ୟକାଳରେ ସିଜେଆଇ ଚନ୍ଦ୍ରଚୂଡ଼ ୧,୨୭୪ ଖଣ୍ଡପୀଠର ଅଂଶ ରହିଛନ୍ତି । ସେ ମୋଟ ୬୧୨ ମାମଲାର ଫଇସଲା ଲେଖିଛନ୍ତି । ସୁପ୍ରିମକୋର୍ଟର ଏବେର ବିଚାରପତିଙ୍କ ମଧ୍ୟରେ ସେ ସବୁଠୁ ଅଧିକ ଫଇସଲା ଲେଖିଛନ୍ତି । କାର୍ଯ୍ୟକାଳର ଶେଷ ଦିନରେ ବି ସେ ୪୫ ମାମଲାର ଶୁଣାଣି କରିଥିଲେ । ଶୁଣାଣି ପରେ ଜଷ୍ଟିସ୍ ପି. ନରସିହ୍ମା ପୀଠରେ ଥିବାବେଳେ ହିଁ ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ଉପରେ ନିଜ ଭାବନା ବ୍ୟକ୍ତ କରିବା ଆରମ୍ଭ କରିଦେଇଥିଲେ । ଏହି ସମୟରେ ଜଷ୍ଟିସ୍ ଚନ୍ଦ୍ରଚୂଡ଼ ପକେଟରୁ ରୁମାଲ କାଢ଼ି ଆଖିରୁ ଲୁହ ପୋଛୁଥିବା ଦେଖିବାକୁ ମିଳିଥିଲା ।
ସିଜେଆଇ ଚନ୍ଦ୍ରଚୂଡ଼ କହିଥିଲେ, ରାତିରେ ଭାବୁଥିଲି ଯେ ଶୁକ୍ରବାର ଅପରାହ୍ନ ୨ଟାରେ ସୁପ୍ରିମକୋର୍ଟ ପରିସର ତ ଖାଲି ଥିବ । ସ୍କ୍ରିନ୍ରେ କେବଳ ନିଜେ ନିଜକୁ ଦେଖୁଥିବି । କିନ୍ତୁ ଆପଣ ସମସ୍ତଙ୍କ ଉପସ୍ଥିତି ଦେଖି ଅଭିଭୂତ । ଛୋଟ ଥିବାବେଳେ ସୁପ୍ରିମକୋର୍ଟର କାର୍ଯ୍ୟବାହୀ ଏବଂ କୋର୍ଟରେ ଲାଗି ଥିବା ଦୁଇ ଛବିକୁ ଦେଖୁଥିଲି । ବମ୍ବେ ହାଇକୋର୍ଟରେ ଜଷ୍ଟିସ୍ ଚୋଗଲାଙ୍କ ବହୁତ ପ୍ରଭାବ ମୋ ଉପରେ ପଡ଼ିଥିଲା । ଆମେ ସବୁ ଏଠାରେ ଯାତ୍ରୀ ପରି । ମାତ୍ର କିଛି ସମୟ ପାଇଁ ଆମେ ଏଠାକୁ ଆସିଛୁ । ନିଜ ନିଜ କାମ ସାରି ସଭିଏଁ ଚାଲିଯିବୁ । ଅଦାଲତ ରୂପରେ ଏହି ସଂସ୍ଥା ସବୁବେଳେ ଚାଲିବ ଏବଂ ଏଠାରେ ବିଭିନ୍ନ ବିଚାରଧାରର ଲୋକ ଆସିବେ, ଯିବେ । ମୋର ପୂରା ଭରସା ଯେ ଜଷ୍ଟିସ୍ ଖାନ୍ନା ଏହି ନ୍ୟାୟିକ ସଂସ୍ଥାକୁ ଦୃଢ଼ତା ଏବଂ ଗରିମାର ସହ ଆଗକୁ ବଢ଼ାଇବେ ।
ଜଷ୍ଟିସ୍ ଚନ୍ଦ୍ରଚୂଡ଼ ଜଷ୍ଟିସ୍ ପାରଦିୱାଲା ଏବଂ ଜଷ୍ଟିସ୍ ମନୋଜ ମିଶ୍ରଙ୍କ ସହ ଥିବା ତାଙ୍କ ଅନୁଭୂତି ମଧ୍ୟ ବଖାଣିଥିଲେ । ଆଗକୁ ବଢ଼ିବା ପାଇଁ ଏହି ଅଦାଲତ ହିଁ ତାଙ୍କୁ ପ୍ରେରଣା ଯୋଗାଇଥିବା କହିଥିଲେ । ଆମେ ଜୀବନରେ ଏପରି ଲୋକଙ୍କୁ ଭେଟିଥାଉ ଯେଉଁମାନେ ଆମକୁ ଜାଣି ନ ଥାନ୍ତି । ଏପରି ଅନୁଭବ ଜୀବନକୁ ଏକ ନୂଆ ଦୃଷ୍ଟିକୋଣ ଦେଇଥାଏ ବୋଲି ସେ କହିଥିଲେ । ଆଗକୁ ଚନ୍ଦ୍ରଚୂଡ଼ କହିଥିଲେ, ଆଜି ବି ବହୁତ କିଛି ଶିଖିଲି । ଯଦି କୋର୍ଟରେ କାହାକୁ ମୋ କାରଣରୁ କଷ୍ଟ ହୋଇଛି ତେବେ ତାଙ୍କୁ ବିନମ୍ରତାପୂର୍ବକ କ୍ଷମା ମାଗୁଛି । ଶେଷରେ ଚନ୍ଦ୍ରଚୂଡ଼ ସଭିଁଙ୍କୁ ଧନ୍ୟବାଦ ଜଣାଇଥିଲେ ।
