କଟକ, ୬। ୭(ବ୍ୟୁରୋ): ଗୁଗୁଲ ମ୍ୟାପରେ ରାସ୍ତା ଦେଖିବା ମହଙ୍ଗା ପଡିଲା । ଜାତୀୟ ରାଜପଥରେ ଘୁରି ବୁଲିଲେ ମଧ୍ୟପ୍ରଦେଶ ବିଧାୟକ । ପୁରୀରେ ବିଶ୍ୱ ପ୍ରସିଦ୍ଧ ବାହୁଡା ଯାତ୍ରା ଦେଖି ଗୁଗୁଲ ମ୍ୟାପରେ ରାସ୍ତା ଦେଖି ଘରକୁ ଫେରୁଥିବା ବେଳେ ସମସ୍ୟାର ସମ୍ମୁଖୀନ ହୋଇଛନ୍ତି ମଧ୍ୟପ୍ରଦେଶ ବିଧାୟକ। ଠିକ ଭାବେ ରାସ୍ତା ଜାଣି ନ ପାରି ଏଣେ ତେଣେ ଘୁରି ବୁଲିଥିଲେ ବିଧାୟକ। ପରେ ପୁଲିସ ସହାୟତାରେ ଠିକ୍ ରାସ୍ତାରେ ଯାଇଥିଲେ।
ପୁରୀରେ ବିଶ୍ୱ ପ୍ରସିଦ୍ଧ ରଥ ଯାତ୍ରା ଦେଖିବା ପାଇଁ ମଧ୍ୟ ପ୍ରଦେଶର କିଛି ବିଧାୟକ ଆସିଥିଲେ। ବାହୁଡା଼ରେ ତିନି ଠାକୁରଙ୍କ ରଥ ଟାଣି ପୁରୀରେ ସେମାନେ ବିଶ୍ରାମ ନେଇ ରବିବାର ସକାଳେ ହୋଟେଲରୁ ଘର ଅଭିମୁଖେ ବାହାରି ଥିଲେ। ତେବେ ଗୁଗୁଲ ମ୍ୟାପ ଲୋକେସନର ସହାୟତା ନେଇ ସବା ଆଗରେ ଦିଲ୍ଲୀ ନମ୍ବର ରେଜିଷ୍ଟ୍ରେସନ ଥିବା ଜଣେ ବିଧାୟକଙ୍କ ଗାଡି ଗଡୁଥିବା ବେଳେ ପଛକୁ ମଧ୍ୟ ପ୍ରଦେଶ ନମ୍ବର ରେଜିଷ୍ଟ୍ରେସନ ଥିବା ଦୁଇ ଜଣ ବିଧାୟକଙ୍କ ଗାଡି ପଛରେ ଥିଲା। ଗାଡି ଭୁବନେଶ୍ୱର ଦେଇ ଛତିଶଗଡ଼ ଅଭିମୁଖେ ଯିବା ପାଇଁ ଯୋଜନା ଥିଲେ ହେଁ ଡ୍ରାଇଭର ଗୁଗୁଲ ଲୋକେସନକୁ ଅନୁସରଣ କରି ପୁରୀ ବାଇପାସ ରାସ୍ତାରେ ଆସି କଟକ ଫୁଲନଖରା ରାସ୍ତାରେ ପହଁଞ୍ଚିଥିଲେ। ବିଧାୟକ ବାଟ ବାଉଳା ହୋଇଥିବାର ଜାଣିଲା ବେଳକୁ ଗାଡି ଆସି ଏନଏଚରେ ବାଲିକୁଦା ଛକରେ ପହଞ୍ଚି ସାରିଥିଲା।
ଆଗରେ ଗଡୁଥିବା ଗାଡି ବାଉଳା ହୋଇ ଦିଗ ପରିବର୍ତ୍ତନ କରିବା ମଧ୍ୟରେ ପଛରେ ଆସୁଥିବା ଅନ୍ୟ ଦୁଇ ବିଧାୟକଙ୍କ କାର ଦ୍ୱୟ ଭୁବନେଶ୍ୱର ଅଧା ରାସ୍ତାରେ ଅଟକି ଏପଟ ସେପଟ ହୋଇ କିଏ କୁଆଡେ ବୁଲିଥିଲେ। ପଛରେ ଆସୁଥିବା ସମ୍ପୃକ୍ତ ବିଧାୟକଙ୍କ ଗାଡି ଭୁବନେଶ୍ୱର ନନ୍ଦନ କାନନ ଓ ବାରଙ୍ଗ ରାସ୍ତାରେ ବୁଲିବୁଲି ନିରାଶ ହୋଇ ଶେଷରେ ପୁଲିସର ସହାୟତା ନେଇଥିଲେ। ପୁଲିସକୁ ବାଟ ପଚାରି ବିଧାୟକ ଦ୍ୱୟଙ୍କ କାର ବାଲିକୁଦା ଏନଏଚ ଟ୍ରାଫିକ ଛକରେ ପହଁଚିବା ପରେ ସେମାନେ ପ୍ରଥମ ଗାଡିକୁ ଧରିଥିଲେ। ସକାଳୁ ଅପରାହ୍ନ ୩ଟା ଯାଏ କଟକରୁ ଭୁବନେଶ୍ୱର ରାସ୍ତାରେ ମଧ୍ୟପ୍ରଦେଶର ପ୍ରାୟ ତିନି ଜଣ ବିଧାୟକ ଘୁରି ବୁଲିବା ପରେ ସେମାନଙ୍କ ପିଏସଓମାନେ ବାଲିକୁଦା ଟ୍ରାଫିକ ଛକରେ ଡ୍ୟୁଟିରେ ଥିବା ଟ୍ରାଫିକ ପୁଲିସର ସହାୟତା ନେଇ ମଧ୍ୟପ୍ରଦେଶ ଅଭିମୁଖେ ଯାଇଥିଲେ।
