ନୂଆଦିଲ୍ଲୀ,୦୪/୦୮: କଂଗ୍ରେସ ନେତା ତଥା ସାଂସଦ ରାହୁଲ ଗାନ୍ଧୀଙ୍କୁ ଭାରି ପଡ଼ିଲା ସେନା ବିରୋଧୀ ବୟାନ । ଭାରତୀୟ ସେନାଙ୍କୁ ନେଇ ରାହୁଲ ଦେଇଥିବା ବୟାନକୁ ସୁପ୍ରିମକୋର୍ଟ ସମାଲୋଚନା କରିଛନ୍ତି । ରାହୁଲ ଗାନ୍ଧୀଙ୍କୁ ପ୍ରଶ୍ନ କରିଛନ୍ତି ଯେ ତାଙ୍କ ପାଖରେ ଏହି ବୟାନକୁ ପ୍ରମାଣିତ କରିବାକୁ କିଛି ଠୋସ୍ ପ୍ରମାଣ ଅଛି କି ? ଯଦି ତୁମେ ପ୍ରକୃତ ଭାରତୀୟ ହୋଇଥାନ୍ତ ତେବେ କେବେ ବି ଏମିତି କହିନଥାନ୍ତ କହି ବର୍ଷିଛନ୍ତି ସର୍ବୋଚ୍ଚ ନ୍ୟାୟାଳୟ ।
ଭାରତ ଯୋଡୋ ଯାତ୍ରା ସମୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଦ୍ୱାରା ଭାରତୀୟ ସେନା ସମ୍ପର୍କରେ ଦିଆଯାଇଥିବା ବୟାନ ଉପରେ ସୁପ୍ରିମକୋର୍ଟ କଠୋର ଟିପ୍ପଣୀ ରଖିଛନ୍ତି । କୋର୍ଟ ରାହୁଲ ଗାନ୍ଧୀଙ୍କୁ ପ୍ରଶ୍ନ କରିଛନ୍ତି ଯେ,ଏହି ବୟାନକୁ ପ୍ରମାଣିତ କରିବା ପାଇଁ ତାଙ୍କ ପାଖରେ କୌଣସି ଠୋସ୍ ଦସ୍ତାବିଜ ଅଛି କି ? ଜଷ୍ଟିସ୍ ଦୀପଙ୍କର ଦତ୍ତା କହିଥିଲେ, "ଯଦି ଆପଣ ବିରୋଧୀ ଦଳର ନେତା, ତେବେ ଆପଣ ଗୃହରେ ଏପରି କଥା କହିବା ଉଚିତ, ସୋସିଆଲ ମିଡିଆରେ କାହିଁକି ?" ସେ ପଚାରିଥିଲେ, "ଆପଣ କିପରି ଜାଣିଲେ ଯେ ୨୦୦୦ବର୍ଗ ମିଟର ଅଞ୍ଚଳ ଚୀନ୍ କବଜାକୁ ଚାଲିଯାଇଛି ?"
'ଆପଣ କିଛି ବି କହିପାରିବେ ନାହିଁ' ? ଜଷ୍ଟିସ୍ ଦତ୍ତା ଆହୁରି କହିଛନ୍ତି, "ଜଣେ ପ୍ରକୃତ ଭାରତୀୟ ଏହା କେବେ କହିବେ ନାହିଁ । ସୀମା ବିବାଦ ହେଲେ ଆପଣ କ'ଣ ଏସବୁ କହିପାରିବେ ? ଆପଣ ସଂସଦରେ କାହିଁକି ପ୍ରଶ୍ନ ପଚାରିପାରିବେ ନାହିଁ ? ଆପଣଙ୍କର ବାକ୍ ସ୍ୱାଧୀନତା ଅଛି ବୋଲି ତାହା ମାନେ ନୁହେଁ ଆପଣ କିଛି ବି କହିପାରିବେ । "
ତେବେ ସୁପ୍ରିମକୋର୍ଟ, ରାହୁଲ ଗାନ୍ଧୀଙ୍କ ବିରୋଧରେ ଚାଲିଥିବା ବିଚାର ପ୍ରକ୍ରିୟା ଉପରେ ବର୍ତ୍ତମାନ ପାଇଁ ରୋକ ଲଗାଇଛନ୍ତି । ୩ ସପ୍ତାହ ପରେ ପରବର୍ତ୍ତୀ ଶୁଣାଣି କରିବାକୁ ଦିନ ଧାର୍ଯ୍ୟ କରିଛନ୍ତି । ଏହି ମଦଦ୍ଦମା ସୀମା ସଡ଼କର ପୂର୍ବତନ ନିର୍ଦ୍ଦେଶକ ଉଦୟ ଶଙ୍କର ଶ୍ରୀବାସନ୍ତବଙ୍କ ଦ୍ୱାରା ଦାଖଲ ହୋଇଥିଲା । ଭାରତ ଯୋଡ଼ ଯାତ୍ରା ସମୟରେ ରାହୁଲ ଗାନ୍ଧୀ ଗଲୱାନରେ ଚୀନ ସୈନିକମାନେ ଭାରତୀୟ ସୈନିକଙ୍କୁ ମାଡ଼ ମାରୁଛନ୍ତି ବୋଲି କହିଥିବା ଅଭିଯୋଗ ହୋଇଥିଲା ।
