ରାଉରକେଲା ,୨୦/୫ : ଗାଡ଼ି ମାଲିକଙ୍କଠାରୁ ଭଡ଼ା ଚାର୍ଜ ମୁକ୍ତ କରିବାକୁ ଲାଞ୍ଚ ନେଉଥିବାବେଳେ ବିସ୍ରା ବନାଞ୍ଚଳ ରେଞ୍ଜର ଗିରଫ । ଭିଜିଲାନ୍ସ ଦ୍ବାରା ଗିରଫ ହୋଇଛନ୍ତି ଡେୱାଇ ରେଞ୍ଜର ଅସିତ ପଟ୍ଟନାୟକ । ଜନୈକ ଗାଡ଼ି ମାଲିକଙ୍କଠାରୁ ଏପ୍ରିଲ ମାସ ପାଇଁ ତାଙ୍କର ପୂର୍ବ ନିୟୋଜିତ ଗାଡ଼ିର ଭଡ଼ା ଚାର୍ଜ ମୁକ୍ତ କରିବାକୁ ୧୮,୦୦୦ ଟଙ୍କା ଲାଞ୍ଚ ଦାବି କରୁଥିଲେ । ଏହାସହ ୧ ମେ ୨୦୨୫ରୁ ସରକାରୀ ବ୍ୟବହାର ପାଇଁ ଉକ୍ତ ଗାଡ଼ିକୁ ପୁନଃ ନିୟୋଜିତ କରିବାର ପ୍ରତିଶ୍ରୁତି ମଧ୍ୟ ଦେଇଥିଲେ। କୌଣସି ବିକଳ୍ପ ନ ଥିବାରୁ ଅଭିଯୋଗକାରୀ ଜଣଙ୍କ ଭିଜିଲାନ୍ସ କର୍ତ୍ତୃପକ୍ଷଙ୍କୁ ଘଟଣା ସମ୍ପର୍କରେ ଜଣାଇଥିଲେ।
ଏହାପରେ ଆଜି ଭିଜିଲାନ୍ସର ଏକ ଦଳ ପୂର୍ବ ପ୍ରସ୍ତୁତି କ୍ରମେ ଅଭିଯୋଗକାରୀଙ୍କଠାରୁ ୧୮,୦୦୦ ଟଙ୍କା ଲାଞ୍ଚ ନେଉଥିବା ସମୟରେ ଡେପୁଟି ରେଞ୍ଜର ଶ୍ରୀ ପଟ୍ଟନାୟକଙ୍କୁ ଗିରଫ କରିଥିଲେ। ଅଭିଯୁକ୍ତ ଶ୍ରୀ ପଟ୍ଟନାୟକଙ୍କ କବଜାରୁ ସମସ୍ତ ଦାଗି ଲାଞ୍ଚ ୧୮,୦୦୦ ଟଙ୍କା ଉଦ୍ଧାର କରାଯାଇ ଜବତ କରାଯାଇଛି। ଏଥିସହ ୪ଟି ସ୍ଥାନରେ ଏକକାଳୀନ ତଲାସ ଚାଲିଛି।
