ଲକ୍ଷ୍ନୌ,୦୭/୦୩: ଉତ୍ତରପ୍ରଦେଶ ମିରଟରୁ ଏକ ବିଚଳିତ କରିବା ପରି ଖବର ସାମ୍ନାକୁ ଆସିଛି । ୟୁପି ପୋଲିସର ୪୪ତମ ବାଟାଲିୟନର ଜଣେ ପିଏସି ଯବାନ ଲେଟର ଲେଖି ତାଙ୍କ ଉପରିସ୍ଥ ଅଧିକାରୀଙ୍କୁ ଦେଇଥିବା ଉତ୍ତର ସମସ୍ତଙ୍କୁ ଚକିତ କରିଛି । ସେ କାହିଁକି ଡ୍ୟୁଟି ବିଳମ୍ବରେ ଆସୁଛନ୍ତି ବୋଲି ଅଧିକାରୀ ପଚାରିଥିଲେ । ପ୍ରଶ୍ନ ଅଜବ ସ୍ପଷ୍ଟୀକରଣ ଦେଇଛନ୍ତି ଯବାନ । ସେ କହିଛନ୍ତି, ପ୍ରତିଦିନ ପତ୍ନୀ ସ୍ବପ୍ନରେ ଆସି ମୋ ରକ୍ତ ପିଉଛନ୍ତି ରାତି ସାରା ଶୋଇ ପାରୁନାହିଁ । ତେଣୁ ଲେଟ୍ ହୋଇଯାଉଛି । ଏବେ ଯବାନଙ୍କର ଏହି ଚିଠି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଭଗବାନଙ୍କ ଶରଣ ଯିବାକୁ ଚାହେଁ- ଗତ ଫେବୃଆରୀ ୧୭ ତାରିଖରେ ୪୪ତମ ବାଟାଲିୟନ ପ୍ରାଦେଶିକ ସଶସ୍ତ୍ର କନଷ୍ଟାବୁଲାରୀର କମାଣ୍ଡର ଜଣେ କନଷ୍ଟେବଳଙ୍କୁ ନୋଟିସ୍ କରିଥିଲେ । ଦାୟିତ୍ବରେ ଅବହେଳା ସହ ବିଶୃଙ୍ଖଳିତ ଆଚରଣ ଓ ବିଳମ୍ବରେ ଅଫିସ୍ ଆସିବା ନେଇ କାରଣ ପଚାରିଥିଲେ । ବିଳମ୍ବରେ ଅଫିସ୍ ଆସିବାର କାରଣ ଦର୍ଶାଅ ନୋଟିସର ପ୍ରତିକ୍ରିୟା ରଖିଥିଲେ ଉତ୍ତରପ୍ରଦେଶ ପାରାମିଲିଟାରୀ ଫୋର୍ସର ଜଣେ କନେଷ୍ଟବଳ । ଜବାବରେ କନଷ୍ଟେବଳ ଦରଖାସ୍ତ ଲେଖି କହିଥିଲେ,'' ସ୍ବପ୍ନରେ ମୋ ସ୍ତ୍ରୀ ଆସି ଛାତି ଉପରେ ବସି ରକ୍ତ ପିଉଛନ୍ତି । ସେଥିପାଇଁ ମୁଁ ଠିକରେ ଶୋଇ ପାରୁନାହିଁ । ତେଣୁ ସକାଳୁ ଠିକ୍ ସମୟରେ ଅଫିସରେ ପହଞ୍ଚିପାରୁ ନାହିଁ । ଅସହାୟ ହୋଇପଡିଛି । ଜୀବନ ଜିଇଁବାର କାରଣ ଭୁଲି ଗଲିଣି । ବଞ୍ଚିବାର ଶକ୍ତି ଶେଷ ହୋଇଗଲାଣି । ଏଥିରୁ ମୁକୁଳିବାକୁ ସାହାଯ୍ୟ କରନ୍ତୁ । ଭଗବାନଙ୍କ ଶରଣରେ ଯିବାକୁ ରାସ୍ତା ବତାନ୍ତୁ ।''
ମାମଲାର ତଦନ୍ତ ଆରମ୍ଭ- ଚିଠିଟି ସୋସିଆଲ ମିଡିଆରେ ଭାଇରାଲ ହେବା ପରେ ୪୪ ବାଟାଲିୟନ କମାଣ୍ଡର ସଚିନ୍ଦ୍ର ପଟେଲ ମାମଲାର ତଦନ୍ତ ନିର୍ଦ୍ଦେଶ ଦେଇଛନ୍ତି । ତେବେ ଚିଠିର ସତ୍ୟାସତ୍ୟକୁ ନେଇ କୌଣସି ସ୍ପଷ୍ଟତା ମିଳିନାହିଁ । ଏ ବାବଦରେ ପୁଙ୍ଖାନୁପୁଙ୍ଖ ତଦନ୍ତ ଚାଲିଛି । ଯଦି କୌଣସି କର୍ମଚାରୀ ସମାଧନ ଚାହୁଁଛନ୍ତି ନିଶ୍ଚିନ୍ତ ରୂପେ ସାହାଯ୍ୟ କରାଯିବ ବୋଲି ବିଭଗ ପକ୍ଷରୁ କୁହାଯାଇଛି ।
