ଠାକୁରମୁଣ୍ଡା,୨୬/୧୦: ଶାଶୁକୁ ହତ୍ୟା ଅଭିଯୋଗରେ ଆଜୀବନ କାରାଦଣ୍ଡ ଭୋଗୁଥିବା କଏଦୀ ଜେଲରୁ ଫେରାର ହେବାର ୧୪ ମାସ ପରେ ଗିରଫ ହୋଇଛି । ସମ୍ପୃକ୍ତ ଆସାମୀ ଲକ୍ଷ୍ମଣ ମହାନ୍ତଙ୍କୁ ଗିରଫ କରି ଠାକୁରମୁଣ୍ଡା ଥାନା ଅଧିକାରୀଣୀ ସାବିତ୍ରୀ ଦଳେଇ କରଞ୍ଜିଆ ଥାନାକୁ ହସ୍ତାନ୍ତର କରିଛନ୍ତି ।
ଘଟଣାରୁ ପ୍ରକାଶ ଆଜୀବନ କାରାଦଣ୍ଡ ଭୋଗୁଥିବା କଏଦୀ ଲକ୍ଷ୍ମଣଙ୍କୁ ଜୁନ ୧୧,୨୦୨୪ ମସିହାରେ ଜେମାଦାର ଗୁମନ ଜାମୁଦା ଜେଲ ପରିସରରେ ଥିବା ଆମ୍ବ ଗଛରୁ ଆମ୍ବ ତୋଳିବାକୁ ନେଇଥିଲେ । ସେ ସେଠାରେ ଆମ୍ବ ତୋଳୁଥିବା ସମୟରେ ଗୁମନ ଜାମୁଦାଙ୍କୁ ଚକମା ଦେଇ ଫେରାର ହୋଇଯାଇଥିଲେ । ଉପଖଣ୍ଡ ଜେଲର ପ୍ରଦୀପ କୁମାର ମହାଳିକଙ୍କ ଅନୁପସ୍ଥିତିରେ ଉପଖଣ୍ଡ ଭାରପ୍ରାପ୍ତ ଜେଲ ସୁପରିଟେଣ୍ଡେଣ୍ଟ ସୌମ୍ୟରଞ୍ଜନ ନାଏକ କରଞ୍ଜିଆ ଥାନାରେ ଲିଖିତ ଅଭିଯୋଗ କରିଥିଲେ । କରଞ୍ଜିଆ ଥାନାରେ ଏ ବିଷୟରେ ୧୯୧/୨୦୨୪ ରେ ମାମଲା ରୁଜ୍ଜୁ କରାଯାଇଥିଲା । କରଞ୍ଜିଆ ଥାନା ଭାରପ୍ରାପ୍ତ ଅଧିକାରୀ ନିରୋଦ କୁମାର ମଲ୍ଲିକଙ୍କ ନିର୍ଦ୍ଦେଶ ମତେ ତଦନ୍ତକାରୀ ଅଧିକାରୀ ସବ୍ଇନ୍ସପେକ୍ଟର ସୁଧାଂଶୁ ସେଠୀ ତଦନ୍ତ ଜାରି ରଖିଥିଲେ ।
ଠାକୁରମୁଣ୍ଡା ଥାନା ଅଧିକାରୀଣୀ ସାବିତ୍ରୀ ଦଳେଇ ଲକ୍ଷ୍ମଣକୁ ଧରିବାକୁ ଖୋଜା ଖୋଜି କରିବାରୁ ସେ ଖସିଯାଇ ତାମିଲନାଡୁ ପଳାଇଥିଲା । ମଙ୍ଗଳବାର ତାମିଲନାଡୁରୁ ଘରକୁ କାଳିପୂଜା ବନ୍ଦାଣ ଉତ୍ସବ ପାଳନ ପାଇଁ ଫେରୁଥିବା ଖବର ପାଇ ବିଭିନ୍ନ ସ୍ଥାନରେ ପୁଲିସ ଚଢ଼ଉ କରିଥିଲା । ଶୁକ୍ରବାର ସନ୍ଧ୍ୟା ୮ଟା ବେଳେ ଠାକୁରମୁଣ୍ଡା ବଜାର ନିକଟ ଏକ ଗ୍ରାମରୁ ଲକ୍ଷ୍ମଣକୁ ଗିରଫ କରି ଠାକୁରମୁଣ୍ଡା ଥାନାକୁ ଆଣି ଅଟକ ରଖିଥିଲେ । ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶ କ୍ରମେ କରଞ୍ଜିଆ ଥାନା ପୁଲିସ୍ କୁ ଲକ୍ଷ୍ମଣକୁ ହସ୍ତାନ୍ତର କରାଯାଇଛି ।
