ନୂଆଦିଲ୍ଲୀ ୨୨/୦୭: ବିମାନ ଭିତରେ କିମ୍ବା ଉଡ଼ାଣ ସମୟରେ ‘ବୋମା’ ଶବ୍ଦର ପ୍ରୟୋଗ ଉପରେ ପ୍ରତିବନ୍ଧକ ରହିଛି । ମଜାରେ ଏମିତି କହିବା ମଧ୍ୟ ମହଙ୍ଗା ପଡ଼ିପାରେ । ବିମାନରେ ବସିଥିବା ଜଣେ ୧୬ ବର୍ଷୀୟ କିଶୋର ଏଭଳି ସ୍ଥିତିର ସମ୍ମୁଖୀନ ହୋଇଛନ୍ତି । ସେ ମଜାରେ କହିଦେଲେ, ମୋ ପକେଟ୍ରେ ବୋମା ଅଛି । ଏତିକି କହିବା ମାତ୍ରେ ତାଙ୍କୁ ଗିରଫ କରାଗଲା । ତେବେ ତାଙ୍କ ମା’ କହିଲେ, ପୁଅ ମଜାରେ କହିଦେଲା । ସେ ବହୁତ ଭଲ ପିଲା । କିନ୍ତୁ ତାଙ୍କ କଥା ଶୁଣାଗଲା ନାହିଁ । ବୋମା ଧମକ ଅଭିଯୋଗରେ ତାଙ୍କୁ ଗିରଫ କରାଗଲା ।
ରିପୋର୍ଟ ଅନୁସାରେ, ଫୋର୍ଟ ଲଡରଡେଲ୍-ହଲିଉଡ୍ ଅନ୍ତର୍ଜାତୀୟ ବିମାନବନ୍ଦରରୁ ତାଙ୍କୁ ଗିରଫ କରାଗଲା । ବନ୍ଧୁଙ୍କ ସହ ସେ କନ୍ସାସ୍ ସିଟିକୁ ବିମାନ ଯାତ୍ରା କରୁଥିଲେ । ବିମାନ ଉଡ଼ାଣ ପାଇଁ ପ୍ରସ୍ତୁତ ହେଲା । ଏହି ସମୟରେ କିଶୋର ଜଣକ କହିଲେ, ମୋ ପକେଟ୍ରେ ବୋମା ଅଛି । ଏତିକି କହୁ କହୁ ବିମାନରେ ଆତଙ୍କ ଖେଳିଗଲା । ଅଧିକାରୀମାନେ ତାଙ୍କୁ ବିମାନରୁ ଓହ୍ଲାଇ ଦେଲେ । ଅପରାଧିକ ବଦ୍ମାଶୀ ବା ବିସ୍ଫୋରଣର ମିଛ ରିପୋର୍ଟ ଦେବା ଅଭିଯୋଗରେ ତାଙ୍କ ଉପରେ ୧୦୦୦ ହଜାର ଡଲାରରୁ ଅଧିକ ଜରିମାନା ଲାଗୁ ହେଲା । ଅନ୍ୟପକ୍ଷେ, କିଶୋରଙ୍କ ମା’ ଗଣମାଧ୍ୟମକୁ କହିଛନ୍ତି, ପୁଅ କଦାପି ଧମକ୍ ରୂପେ ଏହି ଟିପ୍ପଣୀ ଦେଇନଥିଲା । ତାହା କେବଳ ମଜା ଥିଲା । ସେ କେବଳ ନିଜକୁ ବଡ଼ ଦେଖାଇବା ପାଇଁ ମଜା କରୁଥିଲା ।
ସ୍ପିରିଟ୍ ଏୟାରଲାଇନ୍ସ ଘଟଣା ବିଷୟରେ ସୂଚନା ଦେଇ କହିଛି, ବିମାନକୁ ଏକ ଦୂର ସ୍ଥାନକୁ ନିଆଗଲା । ଏହା ପରେ ଯାତ୍ରୀଙ୍କୁ ସୁରକ୍ଷିତ ସ୍ଥାନରେ ଓହ୍ଲାଇ ଦିଆଗଲା । ନ୍ୟାୟିକ ଏଜେନ୍ସିଗୁଡ଼ିକ ବିମାନ ଯାଞ୍ଚ୍ ପରେ ଉଡ଼ାଣ ମଞ୍ଜୁରି ଦେଲେ । କିଶୋରଙ୍କ ପାଇଁ ସ୍ପିରିଟ୍ ଏୟାରଲାଇନ୍ସର ବିଳମ୍ବ ଓ ବ୍ୟବଧାନ ଯୋଗୁ ଆନୁମାନିକ ୫୦ ହଜାର ଡଲାର କ୍ଷତି ହେଲା । ବିମାନ ଦ୍ୱିପହର ୨.୩୭ରେ ଉଡ଼ିଥାନ୍ତା, କିନ୍ତୁ ମିଛ ବୋମା ଧମକ ଯୋଗୁ ସନ୍ଧ୍ୟା ୭.୪୪ ପର୍ଯ୍ୟନ୍ତ ଉଡ଼ାଣ କରିପାରିଲା ନାହିଁ । ବିମାନରେ କିମ୍ବା କିଶୋରଙ୍କ ପାଖରୁ କୌଣସି ବିସ୍ଫୋରକ ମିଳିଲା ନାହିଁ । ଘଟଣାରେ କେହି ଆହତ ମଧ୍ୟ ହୋଇନାହାନ୍ତି । ତଥାପି କୋର୍ଟ କିଶୋରଙ୍କ ମନୋବୈଜ୍ଞାନିକ ମୂଲ୍ୟାଙ୍କନ ପାଇଁ ତାଙ୍କୁ ସୁଧାର ଗୃହରେ ରଖିବାକୁ ଆଦେଶ ଦେଇଛନ୍ତି ।
