ନୂଆଦିଲ୍ଲୀ, ୨୨।୧: ବେଆଇନ ଭାବେ ଆମେରିକାକୁ ପ୍ରବେଶ କରିଥିବା ଭାରତୀୟ ପ୍ରବାସୀଙ୍କ ଉପରେ ଟ୍ରମ୍ଫଙ୍କ ବଡ଼ ଆକ୍ସନ । ପ୍ରବାସୀ ଭାରତୀୟଙ୍କୁ ଘାରି ବସିଛି ଚିନ୍ତା । ଯେ କୌଣସି ମୁହୂର୍ତ୍ତରେ ଆମେରିକାରୁ କରାଯିବ ବିତାଡ଼ିତ । ଆମେରିକାରେ ବେଆଇନ ଭାବେ ରହିଥିବା ଏକାଧିକ ଭାରତୀୟଙ୍କ ପାଖରେ ବୈଧ ଭିସା କାଗଜପତ୍ର ନାହିଁ । ଆମେରିକା ପ୍ରଶାସନ କହିବାନୁସାରେ, ଆମେରିକାରେ ପାଖାପାଖି ୨୦ ହଜାର ଭାରତୀୟ ଅଛନ୍ତି, ଯେଉଁମାନଙ୍କ ପାଖରେ ଆମେରିକାରେ ରହିବାକୁ ଆବଶ୍ୟକ ହେଉଥିବା ବୈଧ କାଗଜପତ୍ର ନାହିଁ । ଟ୍ରମ୍ଫ ପ୍ରଶାସନ ଏଭଳି ଭାରତୀୟଙ୍କୁ ଦିଲ୍ଲୀ ଫେରାଇପାରେ ବୋଲି କୁହାଯାଉଛି । ଯୁଏସ୍ ଇମିଗ୍ରେସନ୍ ଆଣ୍ଡ କଷ୍ଟମ ଏନଫୋର୍ସମେଣ୍ଟ (ଆଇସିଇ)ର ଆକଳନ ଅନୁସାରେ, ନଭେମ୍ୱର ୨୦୨୪ ଯାଏ ୨୦ ହଜାର ୪୦୭ ଜଣ ଭାରତୀୟଙ୍କ ପାଖରେ ବୈଧ କାଗଜପତ୍ର ରହିଥିବା ବେଳେ କିଛି ଭାରତୀୟଙ୍କ ପାଖରେ ଥିବା କାଗଜପତ୍ରରେ କିଛି ତ୍ରୁଟି ଥିବା ଜଣାପଡ଼ିଥିଲା । ଆମେରିକାରେ ରହୁଥିବା ଆଇନଗତ କାଗଜପତ୍ର ନଥିବା ପ୍ରବାସୀ ଭାରତୀୟଙ୍କ ଉପରେ କଡ଼ା ନଜର ରଖିଛି ଟ୍ରମ୍ଫ ପ୍ରଶାସନ । ଏମାନଙ୍କୁ ନେଇ ଯେ କୌଣସି ମୁହୂର୍ତ୍ତରେ ଫାଇନାଲ ରିମୁଭାଲ୍ ଅର୍ଡର ଆସିପାରେ । ଏମାନଙ୍କ ମଧ୍ୟରୁ ୨ ହଜାର ୪୬୭ ଭାରତୀୟ ୟୁଏସ୍ ଇମିଗ୍ରେସନ୍ କ୍ୟାମ୍ପରେ ବନ୍ଦୀ ଥିବାବେଳେ ୧୭ ହଜାର ୯୪୦ ଭାରତୀୟଙ୍କ ପାଖରେ ବୈଧ କାଗଜପତ୍ର ନଥିବା ଆମେରିକା ସରକାର କହିଛି ।
ପ୍ୟୁ ରିସର୍ଚ୍ଚ ୨୦୨୪ର ରିପୋର୍ଟ ଅନୁସାରେ, ଆମେରିକାରେ ରହୁଥିବା ପ୍ରବାସୀ ଭାରତୀୟ ହେଉଛନ୍ତି ତୃତୀୟ ବଡ଼ ସମୁଦାୟ, ଯେଉଁମାନଙ୍କ ପାଖରେ ବୈଧ କାଗଜପତ୍ର ନାହିଁ । ଏହି ତାଲିକାର ପ୍ରଥମ ସ୍ଥାନରେ ପଡ଼ୋଶୀ ଦେଶ ମେକ୍ସିକୋ ରହିଥିବା ବେଳେ ଦ୍ୱିତୀୟ ସ୍ଥାନରେ ସଲଭାଡୋର ନାଗରିକ ଅଛନ୍ତି । ୨୦୨୪ରେ ଆମେରିକା ଇମିଗ୍ରେସନ୍ ଆଣ୍ଡ କଷ୍ଟମ୍ ଏନଫୋର୍ସମେଣ୍ଟ ବିଭାଗ ୨ ଲକ୍ଷ ୭୦ ହଜାର ପ୍ରବାସୀଙ୍କୁ ୧୯୨ ଦେଶକୁ ନିର୍ବାସିତ କରିଛି । ଏଥିରେ ଭାରତ ମଧ୍ୟ ସାମିଲ । ୨୦୨୪ରେ ଆମେରିକା ୧ ହଜାର ୫୨୯ ଅବୈଧ ପ୍ରବାସୀ ଭାରତୀୟଙ୍କୁ ଭାରତକୁ ନିର୍ବାସିତ କରିଥିଲା । ଆଇସିଇର ବାର୍ଷିକ ରିପୋର୍ଟ ଅନୁସାରେ, ୪ ବର୍ଷରେ ଡିପାର୍ଟ କରାଯାଇଥିବା ଭାରତୀୟଙ୍କ ସଂଖ୍ୟା ୫ ଗୁଣା ବଢ଼ିଯାଇଛି । ଆମେରିକା ୨୦୨୧ରେ ୨୯୨ ଭାରତୀୟଙ୍କୁ ଡିପୋର୍ଟ କରିଥିଲା । ୨୦୨୪ରେ ଏହାର ସଂଖ୍ୟା ବୃଦ୍ଧି ପାଇ ୧୫୨୯ରେ ପହଞ୍ଚିଛି ।
ରିମୁଭାଲ୍ ଅର୍ଡର କ’ଣ ?
କହିରଖୁ କି, ରିମୁଭାଲ୍ ଅର୍ଡର ଇମିଗ୍ରେସନ୍ ନ୍ୟାୟଧିଶଙ୍କ ଦ୍ୱାରା ଜାରି କରାଯାଏ । ପ୍ରବାସୀଙ୍କ ଅପିଲ୍ ପରେରେ ଶୁଣାଣି ସମୟରେ ଉଚ୍ଚ ଅଧିକାରୀ ଏହି ଆଦେଶକୁ ମଞ୍ଜୁରୀ ଦେଲେ ଏହା ରିମୁଭାଲ୍ ଅର୍ଡରରେ ପରିଣତ ହୁଏ । ବର୍ତ୍ତମାନ ଆମେରିକାରେ ବେଆଇନ ଭାବେ ରହିଥିବା ଭାରତୀୟଙ୍କ ସଂଖ୍ୟା ୨୦ ହଜାର ୪୦୭ । ଆମେରିକାର କହିବାନୁସାରେ, ଏହି ଭାରତୀୟଙ୍କ ପାଖରେ ଆମେରିକାରେ ରହିବା ଲାଗି ଆବଶ୍ୟକ ହେଉଥିବା ଆଇନଗତ କାଗଜପତ୍ର ନାହିଁ । ଏହି ଭାରତୀୟମାନଙ୍କୁ ଆମେରିକା ନିର୍ବାସିତ ତାଲିକାରେ ସାମିଲ କରିଛି । ଅର୍ଥାତ୍, ଏମାନଙ୍କୁ ସ୍ୱଦେଶ ଫେରାଇ ଦିଆଯିବ । ଯଦି ଟ୍ରମ୍ଫ ପ୍ରଶାସନ ଏହି ନିୟମକୁ କଡ଼ାକଡ଼ି ଭାବେ ପାଳନ କରେ ତେବେ ୨୦ ହଜାର ଭାରତୀୟଙ୍କର ରିମୁଭାଲ୍ ଅର୍ଡର ଯେ କୌଣସି ମୁହୂର୍ତ୍ତରେ ଆସିପାରିବ ।
