ଭୁବନେଶ୍ଵର ; ସମାନ କ୍ୟାଲେଣ୍ଡର, ସମାନ ତାରିଖ, ସମାନ ଘଟଣାବଳୀ। ମିଶିଲା ପ୍ରଳୟ ବର୍ଷର କ୍ୟାଲେଣ୍ଡର। ଗଲା ୬ ମାସ... ବାକି ଅଛି ଆହୁରି ଅଧେ । ବିମାନ ଦୁର୍ଘଟଣା ହେଉକି ଜଙ୍ଗଲ ନିଆଁ ଅବା ଯୁଦ୍ଧ। ଅଘଟଣର ତାରିଖ ସମାନ, ମାସ ବି ସମାନ। ୨୦୨୫ ମସିହାରେ ୧୯୪୧ର ପୁନରାବୃତ୍ତି। ଦୁଇ ଅଲଗା ବର୍ଷର କ୍ୟାଲେଣ୍ଡର ସମାନ ହେବା କିଛି ନୂଆ କଥା ନୁହେଁ। ପ୍ରତି ଦଶକରେ ଏମିତି ଘଟେ । ଆଶ୍ଚର୍ଯ୍ୟର ବିଷୟ ୧୯୪୧ ଓ ୨୦୨୫ର ଘଟଣା ଏବଂ ଦୁର୍ଘଟଣା ଏକାଭଳି। ୮୪ ବର୍ଷ ପରେ ୨୦୨୫ରେ ଫେରିଛି ୧୯୪୧ର ବିପର୍ଯ୍ୟୟ । ଉଭୟ ମସିହାରେ ବୁଧବାରରୁ ଆରମ୍ଭ ହୋଇଥିଲା ବର୍ଷ ଏବଂ ନଥିଲା ଅଧିବର୍ଷ। ଲାଗୁଛି ଯେମିତି ଟାଇମ୍ ଟ୍ରାଭେଲ୍ କରୁଛି ପୃଥିବୀ ।
୨୦୨୫ର ଅଧା ବିତିଗଲାଣି। ବର୍ଷ ସରିବାକୁ ଆଉ ବାକି ମାତ୍ର ୬ ମାସ। ହେଲେ ୨୦୨୫ର ଆରମ୍ଭରୁ ଘଟିଛି ଏଭଳି କିଛି ଘଟଣା- କୁମ୍ଭମେଳାରେ ଦଳାଚକଟା, ପହଲଗାମ୍ରେ ନରସଂହାର, ଭାରତ-ପାକିସ୍ତାନ ମଧ୍ୟରେ ସଂଘର୍ଷ, ବେଲୁଚିସ୍ତାନରେ ଇରାକ୍ ଭଳି ସ୍ଥିତି, ଅହମ୍ମଦାବାଦ ପ୍ଲେନ୍ ଟ୍ରାଜେଡି, ଗାଜାରେ ଇସ୍ରାଏଲ୍ର ରକ୍ତିର ହୋଲି, ଇରାନ-ଇସ୍ରାଏଲ୍ ଭିତରେ ମହାଯୁଦ୍ଧ, ପୁଣି ଆମେରିକା ଏବଂ ଋଷ ମୁହାଁମୁହିଁ। ଯାହାକୁ ଦେଖି ଏବେ ଲୋକେ ଭୟଭୀତ। କାରଣ ୨୦୨୫ ଭଳି ୧୯୪୧ ଥିଲା ଅଘଟଣର ବର୍ଷ।
୧୯୪୧ରେ ଭୀଷଣ ହୋଇଥିଲା ଦ୍ଵିତୀୟ ବିଶ୍ଵଯୁଦ୍ଧ। ସୋଭିଏତ୍ ସଙ୍ଘ ଏବଂ ପର୍ଲ ହାର୍ବର ଉପରେ ଆକ୍ରମଣ କରିଥିଲା ଜର୍ମାନୀ। ହିଟଲରର ଗ୍ୟାସ୍ ଚାମ୍ବରରେ ହଜାର ହଜାର ଲୋକଙ୍କୁ କରାଯାଇଥିଲା ହତ୍ୟା। ବିଶ୍ଵର କିଛି ଭାଗରେ ଆରମ୍ଭ ହୋଇଯାଇଥିଲା ଯୁଦ୍ଧ। ପ୍ରଥମ ଥର ପାଇଁ ଆମ୍ନା-ସାମ୍ନା ହୋଇଥିଲେ ଆମେରିକା-ଋଷ। ରସାତଳକୁ ଚାଲିଯାଇଥିଲା ବିଶ୍ଵ ଅର୍ଥନୀତି। ଏଭଳି କିଛି ଘଟଣା ୨୦୨୫ର ପ୍ରଥମ ୬ ମାସରେ ଦେଖିବାକୁ ମିଳିଲାଣି। ତେବେ ଏହା କେବଳ ଏକ ସଂଯୋଗ ନା ଆଉ କିଛି ? କ'ଣ ଇତିହାସ ନିଜକୁ ପୁନରାବୃତ୍ତି କରୁଛି ? ତୃତୀୟ ବିଶ୍ଵଯୁଦ୍ଧ ମୁହାଁ ହେଉଛି କି ବିଶ୍ଵ ? ତେବେ ଏହା କେବଳ ଏକ ବିଶ୍ଳେଷଣ ହୋଇ ଥାଇପାରେ... କିନ୍ତୁ ୨୦୨୫, ୧୯୪୧ର ସ୍ମୃତିକୁ ସତେଜ କରିଛି।
