ରାଇରଙ୍ଗପୁର, ୧୧/୦୮: ରାକ୍ଷୀ ବନ୍ଧୁ ମିଳନ ସାରି ଫେରିବା ବେଳେ ମର୍ମନ୍ତୁଦ ଦୁର୍ଘଟଣା। ବାଇକ୍ ଦୁର୍ଘଟଣାରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ଆଉ ୨ ଜଣ ଗୁରୁତର ହୋଇଥିବା ଜଣାପଡ଼ିଛି । ମୃତକ ହେଲେ ବିଶୋଇ ଥାନା ଦେଉପଟା ଗ୍ରାମର ଶ୍ରୀ ହରି ସୋରେନଙ୍କ ପୁତ୍ର ଶୈଲେନ୍ଦର ସୋରେନ (୩୫ ବର୍ଷ) ଓ ବାଙ୍ଗିରିପୋଷି ଥାନା ଦୋଷୀସୋଳ ଗାଁର ନିମାଇଁ ମାର୍ଣ୍ଡି ପୁତ୍ର କୃଷ୍ଣ ଚନ୍ଦ୍ର ମାର୍ଣ୍ଡି (୧୭ବର୍ଷ) ଏବଂ ଆହତ ୨ଜଣ ଖେଲା ମାର୍ଣ୍ଡି ଓ ଶିବ ଶଙ୍କର ଟୁଡୁ ବୋଲି ଜଣା ପଡିଛି।
ସୂଚନା ମୁତାବକ, ରାଇରଙ୍ଗପୁର ଗ୍ରାମାଞ୍ଚଳ ଥାନା ବାଂକବଳ ନଦୀ ବନ୍ଧଠାରେ ଅନୁଷ୍ଠିତ ରାକ୍ଷୀ ବନ୍ଧୁ ମିଳନ ସାରି ବିଳମ୍ବିତ ରାତ୍ରରେ ଘରକୁ ଫେରୁଥିଲେ । ଏହି ସମୟରେ ରାଇରଙ୍ଗପୁର ବିଶୋଇ ରାଜ୍ୟ ରାଜପଥ ଲୋହାବାଳିଆ ଠାରେ ଉଭୟ ପଟରୁ ଆସୁଥିବା ଦୁଇ ବାଇକ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ଦୁଇ ଜଣଙ୍କ ମୃତ୍ୟୁ ହୋଇ ଥିବା ବେଳେ ୨ଜଣ ଗୁରୁତର ହୋଇଥିଲେ । ଗୁରୁତର ଅବସ୍ଥାରେ ଉଭୟଙ୍କୁ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ୍ କଲେଜକୁ ସ୍ଥାନାନ୍ତର କରାଯାଇଛି ।
