କେନ୍ଦୁଝର,୧୧/୧୧: ଚମ୍ପୁଆ ରେଞ୍ଜକୁ ଏକ ୨୮ ଟିକିଆ ହାତୀପଲ ଧସେଇ ପଶିଲେ । ହାତୀପଲ ମୟୁରଭଞ୍ଜ ଜିଲ୍ଲାରୁ ଆସି ପଦ୍ମପୁର ନିକଟରେ ବୈତରଣୀ ପାର ହୋଇଥିଲେ । ପରେ ଚମ୍ପୁଆ ରେଞ୍ଜ ଜ୍ୟୋତିପୁର ବିଟ୍କୁ ପ୍ରବେଶ କରିଛନ୍ତି । କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଜରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଏକ ୨୮ ଟିକିଆ ହାତୀପଲ ଚମ୍ପୁଆ ରେଞ୍ଜକୁ ଧସେଇ ପଶିଥିଲେ । ଆସିବା ବାଟରେ ବ୍ୟାପକ ଧାନ ଫସଲ ମାଡି ଦଳି ନଷ୍ଟ କରିଥିଲେ। ବର୍ତ୍ତମାନ ଝାଲିଆବେଡା ଗାଁ ନିକଟରେ ଏହି ହାତୀପଲ ଘୁରି ବୁଲୁଛନ୍ତି । ବ୍ୟାପକ ଧାନ ଚାଷ ନଷ୍ଟ ଆଶଙ୍କାରେ ସ୍ଥାନୀୟ ଚାଷୀ ଚିନ୍ତାରେ ଥିବା ବେଳେ ଗାଁ ନିକଟରେ ହାତୀପଲ ବୁଲୁଥିବାରୁ ଜ୍ୟୋତିପୁର, ପଦ୍ମପୁର, ଝାଲିଆବେଡା, ବର୍ଦ୍ଧନା ଓ ପାରୁଡ଼ିପଶି ଲୋକେ ଆତଙ୍କିତ ଅବସ୍ଥାରେ ରହିଛନ୍ତି । ଏନେଇ ବନ ବିଭାଗକୁ ଖବର ଦେଇଥିଲେ ସ୍ଥାନୀୟଲୋକେ । ଖବର ପାଇ ଘଟଣାସ୍ଥଳରେ ବନବିଭାଗର କର୍ମଚାରୀ ପହଞ୍ଚି ହାତୀପଲଙ୍କ ଗତିବିଧି ଉପରେ ନଜର ରଖିଛି।
