ଭୁବନେଶ୍ୱର, ୨୪।୮: ଦୀର୍ଘ ଦିନ ଧରି ଅଚଳ ହୋଇ ପଡ଼ିଥିବା ଗାଡ଼ିକୁ ସ୍କ୍ରାପିଂ ପାଇଁ ପଠାଇବ ବିଏମସି । ୧୫ ବର୍ଷରୁ ଅଧିକ ପୁରୁଣା ହୋଇଥିବା ବା ୨ଲକ୍ଷ ୫୦ହଜାର କିମିରୁ ଅଧିକ ଗଡ଼ିଥିବା ଯାନକୁ ହଟାଇ ଦିଆଯିବ । ଏହାକୁ କୌଣସି ସ୍ଥାନରେ ଅଯଥାରେ ପକାଇ ନ ରଖି ସ୍କ୍ରାପିଂ ପାଇଁ ପଠାଯିବ । ସରକାରୀ ବିଭାଗ ଭିତରେ ପ୍ରଥମଥର ପାଇଁ ବିଏମସି ଏଭଳି ପଦକ୍ଷେପ ନେଇ ଦୃଷ୍ଟାନ୍ତ ସୃଷ୍ଟି କରିଛି । ବିଏମ୍ସି ଅଧୀନରେ ସହରରେ ବହୁ ଗାଡ଼ି ଚାଲିଛି । କିନ୍ତୁ ଟାଟା ଟିପର, ଏସ୍କାଭେଟର, ଲୋଡର, ଆମ୍ବୁଲାନ୍ସ ଓ ଟ୍ରାକ୍ଟର ଭଳି ୨୮ଟି ଗାଡ଼ି ବହୁତ ପୁରୁଣା ହୋଇଗଲାଣି । କେଉଁ ଗାଡ଼ି ୧୫ ବର୍ଷ ପୂରି ସାରିଛି ତ ଆଉ କିଏ ଅଢ଼େଇ ଲକ୍ଷ କିମିରୁ ଅଧିକ ଗଡ଼ିଛି । ଏଥିରୁ ଅଧିକାଂଶ ଗାଡ଼ି ଦୀର୍ଘଦିନରୁ ଅଚଳ ହେବା ସହ ଅବ୍ୟବହୃତ ହୋଇ ପଡ଼ିଛି । ଏହାକୁ ଚଲାଇଲେ ମାତ୍ରାଧିକ ପ୍ରଦୂଷଣ ସୃଷ୍ଟି କରିବାର ଆଶଙ୍କା ରହିଛି । ଖାଲି ସେତିକି ନୁହେଁ, ଏହି ସବୁ ଗାଡ଼ି ବହୁତ ଜାଗା ମାଡ଼ି ବସୁଛନ୍ତି ।
ଯେଉଁଠାରେ ଏହା ରଖାଯାଉଛି ସେଠାକାର ପରିବେଶ ନଷ୍ଟ ହେବା ସହ ବର୍ଜ୍ୟ ସୃଷ୍ଟି ହେଉଛି । ଏଣୁ ସରକାରଙ୍କ ସ୍କ୍ରାପିଂ ନୀତି ଅନୁସାରେ ଏହାକୁ ସ୍ୱୀକୃତିପ୍ରାପ୍ତ ଏଜେନ୍ସିକୁ ଦେଇ ସ୍କ୍ରାପିଂ କରିବାକୁ ବିଏମ୍ସି ନିଷ୍ପତ୍ତି ନେଇଛି । ଆଞ୍ଚଳିକ ପରିବହନ କାର୍ଯ୍ୟାଳୟର ପରାମର୍ଶରେ ଏହାକୁ ସ୍କ୍ରାପିଂ କରାଯିବ । ଗାଡ଼ି ସ୍କ୍ରାପିଂକୁ ନେଇ ବିଏମ୍ସି କମିଶନର ଚଞ୍ଚଲ ରାଣା କହିଛନ୍ତି, ଅଚଳ ଗାଡ଼ିକୁ ପକାଇ ନ ରଖି ଏହାକୁ ସ୍କ୍ରାପିଂ କରାଯିବ । ଗାଡ଼ି ହଟିଲେ ବହୁତ ମୂଲ୍ୟବାନ ଜାଗାର ଉପଯୋଗ ହୋଇପାରିବ । ବିଏମ୍ସି ସହରରୁ ବାହାରୁଥିବା ବର୍ଜ୍ୟକୁ ନେଇ ମ୍ୟାଟେରିଆଲ ରିକଭରି ଫ୍ୟାସିଲିଟି(ଏମଆରଏଫ୍)ରେ ପ୍ରକ୍ରିୟାକରଣ କରୁଛି । ଏହି ଢାଞ୍ଚାରେ ପୁରୁଣା ଗାଡ଼ିକୁ ସ୍କ୍ରାପିଂ କରି ଏହାର ସାମଗ୍ରୀକୁ ଅନ୍ୟତ୍ର ଉପଯୋଗ କରାଯିବ । ଏହି ପରିବେଶ ଉପଯୋଗୀ ପଦକ୍ଷେପକୁ ଅନ୍ୟମାନେ ଅନୁକରଣ କରିବାକୁ ସେ ଆହ୍ୱାନ ଦେଇଛନ୍ତି ।
