କପ୍ତିପଦା,୨୪।୩(ଆପ୍ର): ଜଙ୍ଗଲରେ ପାଟ୍ରୋଲିଂ ସମୟରେ ବନ କର୍ମଚାରୀଙ୍କୁ ଶିକାରୀଙ୍କ ଗୁଳି ମାଡ଼ । ପୋଡ଼ାଡିହା ରେଞ୍ଜ ମନଭଙ୍ଗା ବିଟ୍ ଅଞ୍ଚଳରେ ଚଢ଼ାଉ ସମୟରେ ଏଭଳି ଘଟଣା ଘଟିଛି । ଏହି ଘଟଣାରେ ୪ ଜଣଙ୍କୁ ବନବିଭାଗ ଗିରଫ କରିଛି।
ରବିବାର ଭୋରରୁ ପୋଡାଡିହା ବନ ବିଭାଗ ଏବଂ ଏସ୍ଟିପିଏଫ ମିଳିତ ଭାବେ ମନଭଙ୍ଗା ବିଟ୍ ଅଞ୍ଚଳରେ ପାଟ୍ରୋଲିଂ କରୁଥିଲେ। ଏହି ସମୟରେ ୬ଜଣ ଶିକାରୀଙ୍କୁ ଜଙ୍ଗଲ ଭିତରେ ଦେଖିବାକୁ ପାଇଥିଲେ । ବନ ବିଭାଗ କର୍ମଚାରୀଙ୍କୁ ଦେଖି ଶିକାରୀମାନେ ତାଙ୍କ ଉପରକୁ ଏକ ରାଉଣ୍ଡ ଗୁଳି ଚାଳନା କରି ଖସି ଯିବାକୁ ଚେଷ୍ଟା କରିଥିଲେ । ଏହାର ଜବାବରେ ଏସ୍ଟିପିଏଫ ମଧ୍ୟ ଫାଙ୍କା ଗୁଳିଚାଳନା କରିଥିଲା । ତେବେ ଘଟଣାସ୍ଥଳରୁ ଜଣେ ଶିକାରୀ ଧରା ପଡିବା ବେଳେ ଅନ୍ୟ ୫ଜଣ ଖସି ଯାଇଥିଲେ ।
ଗିରଫ ଶିକାରୀକୁ ପଚରା ଉଚରା କରିବା ପରେ ସେ ଅନ୍ୟମାନଙ୍କ ନାମ ପ୍ରକାଶ କରିଥିଲା । ଉକ୍ତ ଟିମ ରବିବାର ଅନ୍ୟ ୩ଜଣ ଶିକାରୀଙ୍କୁ ଧରିବା ସହିତ ଜଙ୍ଗଲରେ ଲୁଚାଇ ରଖିଥିବା ୩ଟି ବନ୍ଧୁକକୁ ଜବତ କରିଛି । ୨ଜଣ ଶିକାରୀ ଏବେବି ଫେରାର ରହିଛନ୍ତି । ଗିରଫ ଶିକାରୀ ମାନେ ହେଲେ ଅଶ୍ୱକୁଟି ଗ୍ରାମର ଗାନସା ସିଂ(୨୨), ବରଜୁ ସିଂ(୧୯), ମୁରା ସିଂବାଂକ୍ଷୀରା (୨୬), କାତ୍ତି ର୍କ ସିଂ ବାଂକ୍ଷୀରା(୨୫) । ଏମାନଙ୍କ ବିରୋଧରେ ବନାଞ୍ଚଳରେ କେସ ନଂ ୬/୨୦୨୪ ୦୨୫ ରୁଜୁ ହୋଇଛି । ଏଥିରେ ରେଞ୍ଚ ଅଧିକାରୀ ଅନୁକୂଳ ଚନ୍ଦ୍ର ଜେନା, କପ୍ତିପଦା ରେଞ୍ଜ ଅଧିକାରୀ ଅଚ୍ୟୁତାନନ୍ଦ ଦାସ, ନାଟ ଫରେଷ୍ଟର ଶିରୀଶ କୁମାର ଦଳେଇ, ଫରେଷ୍ଟ ଗାର୍ଡ ନରେଶ ସେଠି, ବିଜୟ କୁମାର ମହାନ୍ତ, ୧୫ ଜଣ ସହକାରୀ ସୁରକ୍ଷା କର୍ମୀ(ପିଏ) ଓ ଏସ୍ଟିଆର ଷ୍ଟାଫ ସାମିଲ ଥିଲେ । ଗୁଳି ମାଡ଼ରେ କୌଣସି କର୍ମଚାରୀ ଆହତ ହୋଇ ନ ଥିବାର ରେଞ୍ଜ ଅଧିକାରୀଙ୍କ ଠାରୁ ସୂଚନା ମିଳିଛି ।
