ନୂଆଦିଲ୍ଲୀ, ୧୧।୮: ଗାଜାକୁ ସମ୍ପୂର୍ଣ୍ଣ ଦଖଲ କରିବାକୁ ଯୋଜନା କରୁଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ । ଇସ୍ରାଏଲୀ ସୁରକ୍ଷା ବାହିନୀ ଗାଜାରେ ଘନ ଘନ ସିରିଜ ଆକ୍ରମଣ କରୁଛନ୍ତି । ରବିବାର ହୋଇଥିବା ସିରିଜ୍ ଆକ୍ରମଣରେ ୫ ଜଣ ଅଲ ଜଜିରା ସାମ୍ୱାଦିକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଅଲ୍ ଜଜିରା ରିପୋର୍ଟ ଅନୁଯାୟୀ, ଗାଜା ସହରରେ ଅଲ-ଶିଫା ହସ୍ପିଟାଲର ମୁଖ୍ୟ ଫାଟକ ବାହାରେ ପ୍ରେସ୍ ପାଇଁ ଲଗାଯାଇଥିବା ଏକ ତମ୍ୱୁକୁ ଚାର୍ଗେଟ୍ କରାଯାଇଥିଲା । ଇସ୍ରାଏଲୀ ଆକ୍ରମଣରେ ମୋଟ୍ ୭ ଜଣ ପ୍ରାଣ ହରାଇଥିଲେ । ଏଥିମଧ୍ୟରୁ ୫ ଜଣ ସାମ୍ୱାଦିକ ଥିଲେ । ରିପୋର୍ଟରେ କୁହାଯାଇଛି ଯେ, ମୃତକଙ୍କ ମଧ୍ୟରେ ଅଲ୍ ଜାଜିରାର ପ୍ରତିନିଧି ଅନସ ଅଲ୍ ଶରିଫ୍, ମହମ୍ମଦ କାରିକେହଙ୍କ ସହ କ୍ୟାମେରାମ୍ୟାନ୍ ଇବ୍ରାହିମ୍ ଜାହିର, ମୋଆମେନ୍ ଅଲିୱା ଏବଂ ମହମ୍ମଦ ନୌଫାଲ ଥିଲେ । ଆକ୍ରମଣରେ କିଛି ସମୟ ପରେ, ଇସ୍ରାଏଲୀ ସେନା ଏକ ବିବୃତ୍ତିରେ ଅଲ୍ ଜାଜିରା ପ୍ରତିନିଧି ଅନସ ଅଲ୍ ଶରିଫ୍ଙ୍କୁ ଟାର୍ଗେଟ କରାଯାଇଥିବା ସ୍ୱୀକାର କରିଥିଲା । ଅନସ ଅଲ୍ ଶରିଫ୍ ଜଣେ ଆତଙ୍କବାଦୀ ବୋଲି କହିବା ସହ, ସେ ହମାସର ଏକ ଆତଙ୍କବାଦୀ ସେଲ୍ର ପ୍ରମୁଖ ଭାବରେ କାର୍ଯ୍ୟ କରିଥିବା ଇସ୍ରାଏଲ କହିଛି ।
ମୃତ୍ୟୁ ପୂର୍ବର ବୋମା ବିସ୍ଫୋରଣର ରିପୋର୍ଟିଂ:
୨୮ ବର୍ଷୀୟ ଅଲ୍ ଶରିଫ ତାଙ୍କ ମୃତ୍ୟୁର କିଛି ମୁହୂର୍ତ୍ତ ପୂର୍ବରୁ ଗାଜା ସିଟିରେ ଇସ୍ରାଏଲର ବୋମାମାଡ଼ ବିଷୟରେ ରିପୋର୍ଟିଂ କରୁଥିଲେ। ସରିଫ୍ ସୋସିଆଲ ମିଡିଆ ଏକ୍ସରେ ଇସ୍ରାଏଲର ଆକ୍ରମଣକୁ ନେଇ ଏକ ପୋଷ୍ଟ କରିଥିଲେ । ଅଲ୍ ଜଜିରା ରିପୋର୍ଟ କରିଛି ଯେ, ପୋଷ୍ଟଟି ତାଙ୍କର ଜଣେ ବନ୍ଧୁଙ୍କ ଦ୍ୱାରା ପୋଷ୍ଟ କରାଯାଇଥିବା ପରି ମନେ ହେଉଛି, ଯାହା ତାଙ୍କ ମୃତ୍ୟୁ ଖବର ପାଇବା ପରେ ସରିଫ୍ଙ୍କ ଆକାଉଣ୍ଟରୁ ପୋଷ୍ଟ କରାଯାଇଥିଲା ।
ଭିଡିଓରେ ଇସ୍ରାଏଲର ବୋମା ମାଡ଼ ଶବ୍ଦ:
ଅଲ୍ ଶରିଫ୍ ପୋଷ୍ଟ କରିଥିବା ଏହି ଭିଡିଓର କ୍ୟାପସନ୍ରେ ଲେଖା ଅଛି, “ଯଦି ମୋର ଏହି ସୂଚନା ତୁମ ପାଖରେ ପହଞ୍ଚୁଛି, ତେବେ ଜାଣିବ ଯେ ଇସ୍ରାଏଲ ମୋତେ ହତ୍ୟା କରିବାରେ ଏବଂ ମୋ ସ୍ୱରକୁ ଦମନ କରିବାରେ ସଫଳ ହୋଇଛି ।” ଅଲ୍ ଶରିଫ୍ଙ୍କ ସୋସିଆଲ ମିଡିଆରେ ପୋଷ୍ଟ ହୋଇଥିବା ଏହି ଶେଷ ଭିଡିଓରେ, ଇସ୍ରାଏଲର ବୋମା ମାଡ଼ର ଜୋରଦାର ଶବ୍ଦ ଶୁଣାଯାଉଛି ।
