ବ୍ରହ୍ମପୁର, ୨୫/୧୧ : ବାଲିଗୁଡ଼ା ସୂଚନା ଅଧିକାର କର୍ମୀ ଅଭିମନ୍ୟୁ ପଣ୍ଡା ହତ୍ୟା ମାମଲା। ୬ ଜଣଙ୍କୁ ଆଜୀବନ ଜେଲ୍ ଦଣ୍ଡାଦେଶ ଶୁଣାଇଲେ ଗଞ୍ଜାମ ଜିଲ୍ଲା ଓ ଦୌରା ଜଜ୍। ଦୁଇ ଜଣ କୋର୍ଟରେ ଅନୁପସ୍ଥିତ ଥିବାରୁ ସେମାନଙ୍କ ବିରୋଧରେ କୋର୍ଟ ୱାରେଣ୍ଟ ଜାରି କରିଛନ୍ତି। ତତ୍କାଳୀନ ବାଲିଗୁଡା ଥାନା ଆଇଆଇସି ତଥା ବର୍ତ୍ତମାନର ବ୍ରହ୍ମପୁର ବଡ଼ବଜାର ଥାନା ଆଇଆଇସି ବାବଶଙ୍କର ସରାଫ ଚାର୍ଜସିଟ୍ ଦାଖଲ କରିଥିବା ବେଳେ ପିପି ତ୍ରିଲୋଚନ ପରିଡ଼ା ମକୋଦ୍ଦମା ପରିଚାଳନା କରୁଥିଲେ।
ସୂଚନା ଥାଉକି, ଏକ ଦୋକାନକୁ କେନ୍ଦ୍ର କରି ବାଲିଗୁଡ଼ା ଥାନା ଅନ୍ତର୍ଗତ ପାତ୍ର ସାହିର ସୂଚନା ଅଧିକାର କର୍ମ ଅଭିମନ୍ୟୁ ପଣ୍ଡା ଓ କେ.ବିଶ୍ଵଜିତ ପାତ୍ରଙ୍କ ମଧୟରେ ଶତ୍ରୁତା ହୋଇଥିଲା। ଏଥିରେ ଉତକ୍ଷିପ୍ତ ହୋଇ ବିଶ୍ଵଜିତ ସବୁଦିନ ପାଇଁ ଅଭିମନ୍ୟୁଙ୍କୁ ରାସ୍ତାରୁ ହଟାଇବା ଲାଗି ଏସ୍ ବାଲାଜି ଆଚାରୀ ଓ ରାସ ବିହାରୀ ଦାଶଙ୍କ ସହାୟତା ନେଇଥିଲେ। ସେମାନେ ଦୁଇ ଜଣ ସୁପାରୀ କିଲରଙ୍କୁ ୧ ଲକ୍ଷ ଟଙ୍କା ଦେଇଥିଲେ। ୨୦୧୯ ମସିହା ଡିସେମ୍ଵର ୧୦ ତାରିଖରେ ଅଭିମନ୍ୟୁ ପଣ୍ଡାଙ୍କୁ ଘର ଡାକିନେଇ ୨ ଦୁର୍ବୃତ୍ତ ଗୁଳିମାଡ଼ କରିଥିଲେ। ତାଙ୍କୁ ଗୁରୁତର ଅବସ୍ଥାରେ ବାଲିହୁଡ଼ା ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
