କଟକ, ୦୭/୧୨: ଦୁର୍ଗାପୂଜା ଓ ଭସାଣି ବେଳେ ୬୦ ପ୍ଲାଟୁନ୍ ଫୋର୍ସ ସୁରକ୍ଷାରେ ନିୟୋଜିତ ହେବେ । ସେହିପରି ପ୍ରାୟ ୪ ଶହ ଅଫିସର ମଧ୍ୟ ସୁରକ୍ଷା ତଦାରଖ କରିବେ । ମହାଷଷ୍ଠୀର ସନ୍ଧ୍ୟାରୁ ଫୋର୍ସଙ୍କୁ ନିୟୋଜିତ କରାଯିବ । ଦଶହରା ୫ ଦିନ ଓ ଭସାଣି ଗୋଟିଏ ଦିନ ପାଇଁ କଟକ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥା କରାଯାଉଛି । ମୋଟ୍ ୬୦ରୁ ୬୫ ପ୍ଲାଟୁନ୍ ମଧ୍ୟରେ ଫୋର୍ସ ନିୟୋଜିତ ହେବେ । ଗଣେଶ ପୂଜା ସମୟରୁ ସହରରେ ପ୍ରାୟ ୨୦ ପ୍ଲାଟୁନ୍ ଫୋର୍ସ ରହିଥିଲେ । ଏବେ ଆଉ ୪୦ରୁ ୪୫ ପ୍ଲାଟୁନ୍ ଫୋର୍ସ ଅନ୍ୟ ଜିଲ୍ଲାରୁ ଆସି ପହଞ୍ଚିଛନ୍ତି ।
ସେହିପରି ବିଭିନ୍ନ ଜିଲ୍ଲା, ପୁଲିସର ଅନୁଷ୍ଠାନ ଓ ଟ୍ରେନିଂ ଅନୁଷ୍ଠାନରୁ ମଧ୍ୟ ୧୫୦ ଜଣ ଏଏସ୍ଆଇ, ୧୨୦ ଜଣ ଏସ୍ଆଇ ଓ ୬୦ରୁ ଅଧିକ ଇନ୍ସପେକ୍ଟର, ଡିଏସ୍ପି ଓ ଅତିରିକ୍ତ ଏସ୍ପି ଦଶହରା ଡ୍ୟୁଟି କରିବା ପାଇଁ ଆସିବେ । ଏହି କ୍ରମରେ ଦୁଇ କମ୍ପାନୀ ସିଆର୍ପିଏଫ୍ ବା କେନ୍ଦ୍ରୀୟ ପୁଲିସ ବଳ ଆସି କଟକରେ ପହଞ୍ଚିଛନ୍ତି । ରବିବାର ରାତିରୁ ପ୍ରାଥମିକ ଭାବେ ଏହି ଫୋର୍ସ ପାଟ୍ରୋଲିଂ ମଧ୍ୟ ଆରମ୍ଭ କରିଛନ୍ତି । ସ୍ଥିତି ନିୟନ୍ତ୍ରଣ ପାଇଁ ସହରର ୭୨ଟି ସ୍ଥାନରେ ଏଡ୍ପୋଷ୍ଟ ବା ଭିଏଚ୍ଏଫ୍ ପୋଷ୍ଟ କରାଯିବ ।
ମୁତୟନ ହେବାକୁ ଥିବା ଫୋର୍ସ ମଧ୍ୟରୁ ପ୍ରାୟ ୬ରୁ ୮ ପ୍ଲାଟୁନ୍ ଫୋର୍ସ ଟ୍ରାଫିକ୍ ନିୟନ୍ତ୍ରଣରେ ସହଯୋଗ କରିବେ । ସବୁ ଥାନାରେ ଗୋଟିଏ କରି ସେକ୍ସନ୍ ଷ୍ଟ୍ରାଇକିଂ ଫୋର୍ସ ରହିବେ । କିଛି ଜରୁରି ପରିସ୍ଥିତିରେ ଥାନା ଅଧିକାରୀଙ୍କୁ ଏହି ଫୋର୍ସ ସହଯୋଗ କରିବ । ଏହାକୁ ବାଦ୍ ଦେଲେ କଟକରେ ଥିବା ସମସ୍ତ ହୋମ୍ଗାର୍ଡ, ଟ୍ରାଫିକ୍ କର୍ମଚାରୀ, ଥାନା ଏଏସ୍ଆଇ ଓ ଏସ୍ଆଇ ସୁରକ୍ଷା ଦାୟିତରେ ରହିବେ । କଟକର ସମସ୍ତ ଇନ୍ସପେକ୍ଟର ଓ ଏସିପି ସେକ୍ଟର ୱାରୀ ସୁରକ୍ଷା ବୁଝିବେ । ଖୋଦ୍ ଡିସିପି ଜଗମୋହନ ମୀନା ସୁରକ୍ଷା ବ୍ୟବସ୍ଥା ତଦାରଖ କରିବେ । ମହାଷଷ୍ଠୀର ସକାଳେ ଏକ ବ୍ରିଫିଂ କାର୍ଯ୍ୟକ୍ରମ ଆୟୋଜିତ ହେବ ।
ସହରରେ ଥିବା ତିନିଟି ସ୍ଥାୟୀ ଦମକଳକେନ୍ଦ୍ର ବକ୍ସିବଜାର, ଚାଉଳିଆଗଞ୍ଜ ଓ ସିଡିଏ ବା ବିଡ଼ାନାସୀକୁ ଛାଡ଼ି ଦଶହରା ପାଇଁ ୬ଟି ଅସ୍ଥାୟୀ ଅଗ୍ନିଶମ କେନ୍ଦ୍ର ଖୋଲାଯିବ । ଲାଲବାଗ, ସିଏମସି ଅଫିସ ନିକଟଚୌଧୁରୀ ବଜାର, ନେତାଜୀ ବସ୍ ଟର୍ମିନାଲ୍ ସମ୍ମୁଖ, ଖାନନଗର ପାଖରେ, କଲେଜ ଛକ ଓ ଯୋବ୍ରା ପାଖରେ କରାଯିବ । ପ୍ରତି କେନ୍ଦ୍ରରେ ଜଣେ ଲେଖାଏଁ ଅଗ୍ନିଶମ ଅଧିକାରୀ, ଜଣେ ହାବିଲଦାର, ଦମକଳ ଗାଡ଼ି ଡ୍ରାଇଭର ଦୁଇ ଜଣ, ଫାୟାର ମ୍ୟାନ୍ ଚାରି ଜଣ ଓ ଗୋଟିଏ କରି ଦମକଳ ଗାଡ଼ି ନିୟୋଜିତ ହେବ । ଏହାଛଡ଼ା ସହରର ଗଳି ରାସ୍ତାରେ ଦୁଇଟି ଛୋଟ ଅଗ୍ନିଶମ ଗାଡ଼ି ଓ ଦୁଇଟି ବାଇକ୍ ପାଟ୍ରୋଲିଂ ଗାଡ଼ି ବୁଲିବ ।
୬ଟି ଅସ୍ଥାୟୀ ଦମକଳ କେନ୍ଦ୍ର
ଏହି ସବୁ ଗାଡ଼ି ୨୪ ଘଣ୍ଟିଆ ପାଟ୍ରୋଲିଂ କରିବ । ଜରୁରିକାଳନୀ ପରିସ୍ଥିତିରେ ପାଣି ଲୋଡିଂ ପାଇଁ ରାଣୀହାଟ ଘଣ୍ଟା ଘର ନିକଟ ଓ ଗଡ଼ଗଡ଼ିଆ ଘାଟ ନିକଟରେ ଦୁଇଟି ଉଚ୍ଚ କ୍ଷମତା ସଂପର୍ଣ୍ଣ ପମ୍ପ୍ ରହିବ । ଏଥିସହିତ ସବୁ ପୂଜା ମଣ୍ଡପ ଓ ସାଂସ୍କୃତିକ ମଣ୍ଡପରେ ଅଗ୍ନି ନିର୍ବାପକ ଯନ୍ତ୍ର ରଖିବା ବାଧ୍ୟତାମୂଳକ । ସେହିପରି ମଣ୍ଡପରେ ବ୍ୟବହାର ହେଉଥିବା ବିଦ୍ୟୁତ୍ ତାର ଗୁଡ଼ିକର ମାନ ଉନ୍ନତମାନର ହେବା ସହିତ କଟାଫଟା ହୋଇନଥିବା ଦରକାର । ଏହି କ୍ରମରେ ପୂଜା ମଣ୍ଡପରେ ପାଣି ଓ ବାଲିକୁ ପର୍ଯ୍ୟାପ୍ତ ପରିମାଣରେ ରଖିବାକୁ ଅଗ୍ନିଶମ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଥିବା କଟକ ଏଏଫ୍ଓ ସଂଜିବ ବେହେରା ସୂଚନା ଦେଇଛନ୍ତି ।
