ଖଲ୍ଲିକୋଟ,୧୭।୬ : ଖଲ୍ଲିକୋଟ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥର ବଡ଼ ଘାଟି ରାସ୍ତାରେ ଛେଳି ପଲ ଉପରେ ମାଡିଗଲା ଟ୍ରକ। ଏଥିରେ ପ୍ରାୟ ୭୦ଟି ଛେଳିଙ୍କ ମୃତ୍ୟୁ ଘଟିଛି।
ପୂର୍ଣ୍ଣଚନ୍ଦ୍ରପୁର ଗ୍ରାମର ବି. ରାମେୟା ପାତ୍ର ଓ ବି. ମୋଚିରାମ ପାତ୍ର ସକାଳୁ ଛେଳି ଓ ମେଣ୍ଢା ପଲ ଧରି ବଡ଼ ଘାଟି ଉପରକୁ ଚରେଇବାକୁ ନେଇଥିଲେ। ସେଠାରୁ ଅପରାହ୍ନ ଦୁଇଟାରେ ଛେଳି ଓ ମେଣ୍ଢା ପଲ ଧରି ଗାଁକୁ ଫେରୁଥିବା ବେଳେ ଏକ ଟ୍ରକ ଦ୍ରୁତଗତିରେ ଆସି ପଲ ଉପରେ ମାଡି ଚାଲି ଯାଇଥିଲା। ପଲରେ ୨୦୦ ଛେଳି ଓ ମେଣ୍ଢା ରହିଥିବା ବେଳେ ଟ୍ରକ ଚାପାରେ ପ୍ରାୟ ୭୦ ଛେଳି ଓ ମେଣ୍ଢାଙ୍କ ଶୋଚନୀୟ ମୃତ୍ୟୁ ଘଟିଥିଲା। ଖବର ପାଇ ଖଲ୍ଲିକୋଟ ପୁଲିସ ଦୁର୍ଘଟଣା ସ୍ଥଳରେ ପହଞ୍ଚି ଛେଳି ଚରାଳିକୁ ଘଟଣା ସମ୍ପର୍କରେ ପଚାରି ବୁଝିଥିଲେ। ଦୁର୍ଘଟଣା ଘଟାଇ ଚମ୍ପଟ ମାରିଥିବା ଟ୍ରକକୁ ଧରିବା ପାଇଁ ଚେଷ୍ଟା କରାଯାଉଛି ବୋଲି ଖଲ୍ଲିକୋଟ ଥାନା ଅଧିକାରୀ ରମେଶ କୁମାର ପ୍ରଧାନ କହିଛନ୍ତି।
