ଭୋଗରାଇ,୧୯/୬ : ଅବକାରୀ ଅଧିକ୍ଷକ ମନୋଜ କୁମାର ସେଠୀଙ୍କ ନିର୍ଦ୍ଦେଶ କ୍ରମେ ବାଲେଶ୍ଵର ଜିଲ୍ଲା ଅବକାରୀ ମୋବାଇଲ ସ୍କ୍ୱାର୍ଡ ଓ ଭୋଗରାଇ ଅବକାରୀ ଥାନା ପକ୍ଷରୁ ଗୁରୁବାର ଭୋଗରାଇ ଥାନା ଅଞ୍ଚଳରେ ମିଳିତ ଚଢ଼ଉ କରାଯାଇଛି । ଏହି ଚଢଉରେ ମୋଟ୍ ୭୭୫ଲିଟର ପଶ୍ଚିମବଙ୍ଗ ମାର୍କା ଦେଶୀ ସ୍ପିରିଟ ମଦ ଓ ଦେଶୀ ହାତରନ୍ଧା ମହୁଲି ମଦ ସହ ଏଥିରେ ସମ୍ପୃକ୍ତ ୫ଜଣ ଚୋରା ମଦ ବ୍ୟବସାୟୀଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ।
ସୂଚନା ଅନୁସାରେ, ଗୁରୁବାର ସକାଳ ପ୍ରାୟ ୬ଟା ସମୟରେ ଭୋଗରାଇ ଅବକାରୀ ଥାନା ଓଆଇସି ଚନ୍ଦନ କୁମାର ନାୟକଙ୍କ ନେତୃତ୍ବରେ ଅବକାରୀ ଇନ୍ସପେକ୍ଟର ହରିହର ସିଂହ, ସବ୍ ଇନ୍ସପେକ୍ଟର ଭବେଶ ଦାସ, ଏଏସ୍ଆଇ ଦିଲ୍ଲୀପ କୁମାର ତ୍ରିପାଠୀ, ଦୂର୍ଯ୍ଯଧନ ବେହେରା, ଅବକାରୀ କନଷ୍ଟେବଳ ମିନତୀ ପରିଡ଼ା, ସୁନାରାମ ସୋରେନ୍ ଓ ବ୍ରହ୍ମଜୀତ୍ ଦାସ ପ୍ରମୁଖ ପାଟ୍ରୋଲିଂରେ ଯାଇଥିବାବେଳେ ଭୋଗରାଇ ଥାନା ସରସ୍ବତୀପୁର ଗାଁର ରବି ମାରାଣ୍ଡିଙ୍କ ସ୍ତ୍ରୀ ମଇନା ମାରାଣ୍ଡି (୩୩)ଙ୍କୁ ୪୦ଲିଟର ପଶ୍ଚିମବଙ୍ଗ ମାର୍କା ଦେଶୀ ସ୍ପିରିଟ ମଦ ସହ ଓ ଅନୀଲ ଟୁଡୁଙ୍କ ପତ୍ନୀ ରାଣୀ ଟୁଡୁ (୩୪)ଙ୍କୁ ୬୫ ଲିଟର ଦେଶୀ ହାତରନ୍ଧା ମହୁଲି ମଦ ସହିତ ଗିରଫ କରିଥିଲେ ।
ସେହିପରି କୁକୁଡିଆ ଗାଁର ସ୍ବର୍ଗତ ପୂର୍ଣ୍ଣଚନ୍ଦ୍ର କରଙ୍କ ପୁଅ ଦିଲ୍ଲୀପ କର (୪୧)ଙ୍କୁ ୩୨୦ଲିଟର, ନେଗୁଆଁ ଗାଁର ସ୍ବର୍ଗତ କାଲୁ ମାରାଣ୍ଡିଙ୍କ ପୁଅ ବିଜୟ ମାରାଣ୍ଡି (୪୩)ଙ୍କୁ ୧୫୦ଲିଟର ଓ ସାତଗହଳିଆ ଗାଁର ସ୍ବର୍ଗତ ଦଶରଥ ଟୁଡୁଙ୍କ ପୁଅ ସନ୍ତୋଷ ଟୁଡୁ(୩୫)ଙ୍କୁ ୨୦୦ ଲିଟର ଦେଶୀ ହାତରନ୍ଧା ମହୁଲି ମଦ ସହିତ ଗିରଫ କରିଥିଲେ । ପରେ ଭୋଗରାଇ ଅବକାରୀ ଥାନା ପକ୍ଷରୁ ପୃଥକ୍ ପୃଥକ୍ ୫ଟି ମାମଲା ରୁଜ୍ଜୁ କରାଯାଇ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିଲାବେଳେ ଜାମିନ୍ ନାମଞ୍ଜୁର ହେବାରୁ ସେମାନଙ୍କୁ ଜଳେଶ୍ବରସ୍ଥିତ ବିଚାର ବିଭାଗୀୟ ହାଜତକୁ ପଠାଯାଇଥିବା ଏଏସ୍ଆଇ ଶ୍ରୀ ତ୍ରିପାଠୀ ସୂଚନା ଦେଇଛନ୍ତି ।
