ନୂଆଦିଲ୍ଲୀ: ଲାଞ୍ଚ ମାମଲାରେ ଗତକାଲି (ଗୁରୁବାର) ଗିରଫ ହୋଇଥିବା ପଞ୍ଜାବ ପୋଲିସର ବରିଷ୍ଠ IPS ଅଧିକାରୀ DIG ହରଚରଣ ସିଂହ ଭୁଲ୍ଲରଙ୍କ ପାପ ଧନର ଭଣ୍ଡାର ଏବେ ସାମ୍ନାକୁ ଆସିଛି । ଭୁଲ୍ଲରଙ୍କୁ ଲାଞ୍ଚ ଗ୍ରହଣ କରିବା ସମୟରେ ସିବିଆଇ ଗିରଫ କରିଛି। ଗିରଫ ହେବା ପରେ, CBI ହରଚରଣ ସିଂହ ଭୁଲ୍ଲରଙ୍କ ସହିତ ଜଡିତ ପଞ୍ଜାବ ଏବଂ ଚଣ୍ଡିଗଡ଼ର ବିଭିନ୍ନ ସ୍ଥାନରେ ତଲାସି ଆରମ୍ଭ କରିଛି। ଏଥିରେ କୋଟି କୋଟି ଟଙ୍କାର ନଗଦ ଟଙ୍କା ଏବଂ ଅଳଙ୍କାର ଜବତ କରିଛି।
ସିବିଆଇ DIG ଭୁଲ୍ଲରଙ୍କ ବିଭିନ୍ନ ସ୍ଥାନ ଗୁଡ଼ିକରୁ ନଗଦ ପ୍ରାୟ ୫ କୋଟି ଟଙ୍କା, ପ୍ରାୟ ଦେଢ କିଲୋଗ୍ରାମ ଅଳଙ୍କାର ଏବଂ ପଞ୍ଜାବରେ ଅସ୍ଥାବର ସମ୍ପତ୍ତି ଏବଂ ସମ୍ପତ୍ତି ସହିତ ଜଡିତ ଦସ୍ତାବିଜ ଜବତ କରିଛି । ଏହା ବ୍ୟତୀତ ଦୁଇଟି ବିଳାସପୂର୍ଣ୍ଣ ଗାଡ଼ି(ଗୋଟିଏ ମର୍ସିଡିଜ୍ ଏବଂ ଅନ୍ୟଟି ଅଡି),୨୨ଟି ବିଳାସପୂର୍ଣ୍ଣ ଘଣ୍ଟା,ଲକର ଚାବି ଏବଂ ୪୦ ଲିଟର ବିଦେଶୀ ମଦ ମଧ୍ୟ ଜବତ କରିଛି । ସେହିଭଳି କିଛି ଅସ୍ତ୍ରଶସ୍ତ୍ର ମଧ୍ୟ ଜବତ କରିଛି ତଦନ୍ତକାରୀ ସଂସ୍ଥା, ଏଗୁଡିକ ମଧ୍ୟରେ ଗୋଟିଏ ଡବଲ-ବ୍ୟାରେଲ୍ ବନ୍ଧୁକ, ଗୋଟିଏ ପିସ୍ତଲ,ଗୋଟିଏ ରିଭଲଭର ଏବଂ ଗୋଟିଏ ଏୟାରଗନ୍ ସହିତ କାର୍ଟ୍ରିଜ୍ ମଧ୍ୟ ଜବତ କରାଯାଇଛି। ଏହା ସହିତ, କିର୍ଶାନୁ ନାମକ ଜଣେ ମଧ୍ୟସ୍ଥିଙ୍କୁ ଗିରଫ କରାଯାଇଛି ଏବଂ ତାଙ୍କଠାରୁ ସିବିଆଇ ଅଧିକାରୀ ମାନେ ୨୧ ଲକ୍ଷ ଟଙ୍କା ଜବତ କରିଛନ୍ତି।
ଅଭିଯୋଗକାରୀ ଆକାଶ ବଟ୍ଟା ଅଭିଯୋଗ କରିଛନ୍ତି ଯେ,ଡିଆଇଜି ଭୁଲ୍ଲର ତାଙ୍କ ମଧ୍ୟସ୍ଥିଙ୍କ ମାଧ୍ୟମରେ ଏହି ଟଙ୍କା ଦାବି କରୁଥିଲେ । ସିରହିନ୍ଦରେ ତାଙ୍କ ବିରୁଦ୍ଧରେ ପଞ୍ଜିକୃତ ହୋଇଥିବା ୨୦୨୩ ଏଫଆଇଆରକୁ ବାତିଲ କରିବା ପାଇଁ ଏବଂ ତାଙ୍କ ସ୍କ୍ରାପ୍ ବ୍ୟବସାୟ ବିରୁଦ୍ଧରେ ଆଉ କୌଣସି ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ ନକରିବା ପାଇଁ ଏହି ଲାଞ୍ଚ ଦାବି କରୁଥିଲେ। ଅଭିଯୋଗକାରୀ ଅଭିଯୋଗ କରିଛନ୍ତି ଯେ ଭୁଲ୍ଲର "ସେବା-ପାଣି" ନାମରେ ଜଣାଶୁଣା ମାସିକ ଦେୟ ଦାବି କରୁଥିଲେ ଏବଂ ଯଦି ସେ ଦେୟ ନ ଦିଅନ୍ତି ତେବେ ତାଙ୍କୁ ତାଙ୍କ ବ୍ୟବସାୟ ସହ ଜଡିତ ମିଥ୍ୟା ଅପରାଧିକ ମାମଲାରେ ଫସାଇ ଦେବାକୁ ଧମକ ଦେଇଥିଲେ।
ତେବେ ଭୁଲ୍ଲର ଏବଂ ମଧ୍ୟସ୍ଥି କିର୍ଷ୍ଣୁଙ୍କ ମଧ୍ୟରେ ଏକ ରେକର୍ଡ ହୋଇଥିବା ହ୍ୱାଟ୍ସଆପ୍ କଲ୍ ଏହି ଅପରାଧର ପର୍ଦ୍ଦାଫାଶ କରିଥିଲା। ଏହି ଅଡିଓ କ୍ଲିପରେ ଶୁଣିବାକୁ ମିଳୁଛି ଯେ, ଭୁଲ୍ଲର କହୁଛନ୍ତି କି, "ତାଙ୍କ ଠାରୁ ୮ ଲକ୍ଷ ଟଙ୍କା ଆଦାୟ କର।" ସେ ତା'ପରେ କହୁଛନ୍ତି, "ସେ ଯାହା ଦିଅନ୍ତି ତାହା ଆଦାୟ କର ଏବଂ ତାଙ୍କ ଠାରୁ ମୋଟ ୮ ଲକ୍ଷ ଟଙ୍କା ଦାବି କର।"
ତେବେ ଗିରଫ ହେବା ପରେ, ଭୁଲ୍ଲରଙ୍କୁ ଚଣ୍ଡିଗଡ଼ର ସିବିଆଇ କାର୍ଯ୍ୟାଳୟକୁ ନିଆଯାଇଥିଲା। ୨୦୦୭ ବ୍ୟାଚ୍ ଭାରତୀୟ ପୋଲିସ ସେବା (IPS) ଅଧିକାରୀ, ଭୁଲ୍ଲର ରୋପାର ଡିଭିଜନର ଡିଆଇଜି ଭାବରେ କାର୍ଯ୍ୟ କରନ୍ତି। ସେ ନଭେମ୍ବର ୨୦୨୪ ରେ ଏହି ପଦବୀ ଗ୍ରହଣ କରିଥିଲେ। ରୋପାର ଡିଭିଜନରେ ମୋହାଲି, ରୂପନଗର ଏବଂ ଫତେଗଡ଼ ସାହିବ ଜିଲ୍ଲା ଅନ୍ତର୍ଭୁକ୍ତ।
ହରଚରଣ ସିଂହ ଭୁଲ୍ଲର ହେଉଛନ୍ତି ପୂର୍ବତନ ପଞ୍ଜାବ ପୋଲିସ ମହାନିର୍ଦ୍ଦେଶକ ଏମ୍.ଏସ୍. ଭୁଲ୍ଲରଙ୍କ ପୁଅ। ତାଙ୍କ କ୍ୟାରିୟର ମଧ୍ୟରେ, ଭୁଲ୍ଲର ବିଭିନ୍ନ ପଦବୀରେ କାର୍ଯ୍ୟ କରିଛନ୍ତି, ଯେଉଁଥିରେ ପଟିଆଲା ରେଞ୍ଜର ଡିଆଇଜି, ଭିଜିଲାନ୍ସ ବ୍ୟୁରୋର ଯୁଗ୍ମ ନିର୍ଦ୍ଦେଶକ ଏବଂ ଜଗରାଓଁ, ମୋହାଲି, ସଂଗ୍ରୁର, ଫତେହଗଡ଼ ସାହିବ, ଖାନ୍ନା, ହୋସିଆରପୁର ଏବଂ ଗୁରୁଦାସପୁରର ବରିଷ୍ଠ ପୋଲିସ ଅଧିକ୍ଷକ ରହିଛନ୍ତି। ସେ ୨୦୨୧ ମସିହାରେ ଶିରୋମଣି ଅକାଳୀ ଦଳରୁ ଇସ୍ତଫା ଦେଇଥିଲେ।
