ବ୍ରହ୍ମପୁର,୧୩/୧୧: ବିଜେପି ନେତା ତଥା ବରିଷ୍ଠ ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାକୁ ନେଇ ପ୍ରତ୍ୟେକ ଦିନ ନୂଆ ଖୁଲାସା ହେବାରେ ଲାଗିଛି । ପୁଲିସ ବିଭିନ୍ନ ଦିଗରୁ ତଦନ୍ତ କରୁଥିବାବେଳେ ହତ୍ୟା ପଛରେ ବାଲିଘାଟ ବିବାଦ ରହିଥିବା ପୁଲିସର ଏବେ ପ୍ରମୁଖ ସନ୍ଦେହ ରହିଛି । ସେ ଦିଗରେ ପୁଲିସ ତଦନ୍ତ ଆଗେଇଛି । ହତ୍ୟାକାଣ୍ଡରେ ପୁରୀର ଦୁଇ ଜଣାଶୁଣା ଅପରାଧୀଙ୍କ ସମ୍ପୃକ୍ତି ଥିବା ପୁଲିସ ସନ୍ଦେହ କରୁଛି । ସେମାନଙ୍କର ପୁରୁଣା ଅପରାଧ ତଥ୍ୟ ପୁଲିସ ସଂଗ୍ରହ କରିବା ପରେ ଜଣକୁ ଉଠାଇ ପଚରାଉଚରା କରୁଥିବା ସୂଚନା ମିଳିଛି । ଏହି ଦୁଇ ଅପରାଧୀ ପୂର୍ବରୁ ବ୍ରହ୍ମପୁରରେ ହୋଇଥିବା ଏକ ହାଇପ୍ରୋଫାଇଲ୍ ହତ୍ୟାକାଣ୍ଡରେ ଜଡ଼ିତ ଥିଲେ । ତେଣୁ ସେମାନଙ୍କ ଉପରେ ପୁଲିସ ସନ୍ଦେହ ଘନେଇଛି ।
ବ୍ରହ୍ମପୁରର କିଛି ବ୍ୟବସାୟୀଙ୍କୁ ମଧ୍ୟ ପୁଲିସ ସନ୍ଦେହ ଘେରରେ ରଖିଥିବା ବେଳେ ସେମାନେ ଘଟଣା ସମୟରେ କେଉଁଠି ଥିଲେ ଏବଂ କାହା ସହ ଫୋନ୍ରେ କଥା ହେଉଥିଲେ ତାହାର ତନାଘନା ଚାଲିଛି । କିଛିଦିନ ହେଲା ଗଞ୍ଜାମ ଜିଲ୍ଲାର ଗୋଟିଏ ବାଲିଘାଟ ବନ୍ଦ ହୋଇଥିବା ବେଳେ ଏହି ଘାଟକୁ କିଛି ପ୍ରଭାବଶାଳୀ ବ୍ୟକ୍ତି ଚଳାଉଥିଲେ । ବନ୍ଦ ପଛରେ ପୀତବାସଙ୍କ ଭୂମିକା ଥିବା ସନ୍ଦେହରେ ବି ଏଭଳି କାଣ୍ଡ ହୋଇଥାଇପାରେ ବୋଲି ସେ ଦିଗରେ ଅଧିକ ତଦନ୍ତ ଜାରି ରହିଛି । ଟୋଲ୍ଗେଟ୍ମାନଙ୍କରେ ଲାଗିଥିବା ସିସିଟିଭି ଫୁଟେଜ୍ ମଧ୍ୟ ପୁଲିସ ଯାଞ୍ଚ୍ କରିଛି । ବ୍ରହ୍ମପୁର ଏସ୍ପିଙ୍କ ନେତୃତ୍ୱରେ ୬ଟି ଟିମ୍ ବିଭିନ୍ନ ଦିଗରୁ ଖୋଳତାଡ଼ ଜାରି ରଖିଛନ୍ତି । ତଦନ୍ତ ବେଳେ ପୁଲିସ ହାତରେ କିଛି ପ୍ରମାଣ ଲାଗି ସାରିଲାଣି । ତେବେ ବାଲିଘାଟ ବିବାଦକୁ ନେଇ ପୁଲିସ ଆଜି ତଦନ୍ତ କରିଥିଲା । ପୀତବାସଙ୍କ ସହ କାହାର ବିବାଦ ଥିଲା, ସେ ଦିଗରେ ପୁଲିସ ପ୍ରତିପକ୍ଷଙ୍କୁ ପଚରାଉଚରା କରିଛି । ବାଲିଘାଟକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହେବାରୁ ପୀତବାସଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି । ବାଲିଘାଟ ଲିଜ୍ଧାରୀ ଓ ତାଙ୍କ ସହଯୋଗୀଙ୍କ ଉପରେ ପୁଲିସ ନଜର ପକାଇଥିବା ବେଳେ ସନ୍ଦେହରେ କେତେକ ଲୋକଙ୍କୁ ଜେରା ପାଇଁ ଡାକିଥିବା ସୂଚନା ମିଳିଛି । ଦିଗପହଣ୍ଡି ଅଞ୍ଚଳର ଆଉ ଜଣେ ଅପରାଧୀଙ୍କ ସମ୍ପୃକ୍ତି ନେଇ ମଧ୍ୟ ପୁଲିସ ଖୋଳତାଡ଼ କରୁଛି । ସଂପୃକ୍ତ ଅପରାଧୀଙ୍କ ଘଟଣା ରାତିରେ ଖଲ୍ଲିକୋଟ ଟୋଲ୍ ଗେଟ୍ରେ ଦେଖିବାକୁ ମିଳିଥିଲା । ଆଜି ପୀତବାସଙ୍କର ଦୁଇ ଶଳାଙ୍କୁ ମଧ୍ୟ ପୁଲିସ ଥାନାକୁ ଡାକି କଥା ହୋଇଥିବା ଜଣାଯାଇଛି ।
ସୂଚନାଯୋଗ୍ୟ ୧୫ବର୍ଷ ପୂର୍ବରୁ ପୀତବାସଙ୍କ ବିଜିପୁର ସ୍ଥିତ ଘରକୁ ବୋମାମାଡ଼ ହୋଇଥିଲା । ସେହି ଘଟଣାର ଫାଇଲ୍ ମଧ୍ୟ ପୁଲିସ ଓଲଟାଇଛି । ସେପଟେ ବିଜେପି ରାଷ୍ଟ୍ରୀୟ ପରିଷଦ ସଦସ୍ୟ କାହ୍ନୁ ଚରଣ ପତି ପୀତବାସଙ୍କ ହତ୍ୟାକାରୀଙ୍କୁ ପ୍ରାୟ ଧରାହୋଇସାରିଲାଣି ବୋଲି ଗଣମାଧ୍ୟମରେ ବୟାନ ଦେଇଛନ୍ତି । ବିଜେପି ଜିଲ୍ଲା କାର୍ଯ୍ୟାଳୟରେ ପୀତବାସ ପଣ୍ଡାଙ୍କ ସ୍ମୃତିସଭାରେ ସେ ଏଭଳି କହିଥିଲେ । ସେ କହିଛନ୍ତି ଯେ, ନଭେମ୍ବର ୨୬ ତାରିଖରୁ ଆଇନଜୀବୀ ପୀତବାସ ପଣ୍ଡାଙ୍କ ପିଛା କରୁଥିଲେ । ୧୦ ଦିନ ପରେ ୬ ତାରିଖରେ କୁମାର ପୂର୍ଣ୍ଣିମାରେ ପୀତବାସଙ୍କୁ ଟାର୍ଗେଟ୍ କରିଥିଲେ ହତ୍ୟାକାରୀ । ଘରଠାରୁ କିଛି ଦୂରରେ ଅତି ନିକଟରୁ ଗୁଳି କରି ହତ୍ୟା କଲେ । ଏହି ହତ୍ୟାକାଣ୍ଡରେ ବ୍ୟବହୃତ ବନ୍ଧୁକ ଆନ୍ଧ୍ର ତିଆରି ବୋଲି ପୁଲିସ ସୁରାକ୍ ପାଇଥିବା କାହ୍ନୁୁ କହିଛନ୍ତି । ସେଠାରୁ ସିଙ୍ଗଲ୍ ରାଉଣ୍ଡ ପିସ୍ତଲ୍ ଅଣାଯାଇଥିଲା । ଶ୍ରୀକାକୁଲମ୍ଠାରୁ ବିଜୟନଗରମ୍ ଭିତରେ ସେହି ବନ୍ଧୁକ ପ୍ରସ୍ତୁତ ହୋଇଥିବା ପୁଲିସ ସନ୍ଦେହ କରୁଛି । କାହ୍ନୁ ପୁଣି କହିଛନ୍ତି, ହତ୍ୟା ପଛରେ ରହିଛି ବଡ଼ ଷଡ଼ଯନ୍ତ୍ର । ସମ୍ପୂର୍ଣ୍ଣ ଘଟଣା ପ୍ରି-ପ୍ଲାନ୍ । ପୁଲିସ ତଦନ୍ତ ଠିକ୍ ଦିଗରେ ଯାଉଛି । ଖୁବ୍ଶୀଘ୍ର ହତ୍ୟା ପଛର କାରଣ ସହ ଷଡ଼ଯନ୍ତ୍ରକାରୀ ଧରାପଡ଼ିବେ । ପୁଲିସ ଏହି ଘଟଣାକୁ ନେଇ ବିଶେଷ ତଥ୍ୟ ଦେଇ ନ ଥିବାବେଳେ ବିଜେପି ନେତାଙ୍କ ଏଭଳି ବୟାନ ଏବେ ଚର୍ଚ୍ଚାର ବିଷୟ ହୋଇଛି । ସେ ହତ୍ୟା ପଛରେ ଥିବା ଏତେ ଘଟଣା କିଭଳି ଜାଣିଲେ ବୋଲି ସାଧାରଣରେ ଆଲୋଚନା ହେଉଛି।
