ବ୍ରହ୍ମପୁର, ୦୯/୧୦: ଆଇନଜୀବୀ ତଥା ବିଜେପି ନେତା ପୀତବାସ ପଣ୍ଡାଙ୍କୁ ଗୁଳିକରି ହତ୍ୟା ଘଟଣା । ନିଜେ ବ୍ରହ୍ମପୁର ଏସ୍ପି ଡା.ସର୍ବଣା ବିବେକ ଏମ୍ ସମସ୍ତ ଜୋର୍ ଲଗାଇ ତଦନ୍ତର ନେତୃତ୍ୱ ନେଇଛନ୍ତି । ଛଅଟି ଟିମ୍ ଅନୁସନ୍ଧାନରେ ଅଛନ୍ତି । ବ୍ୟକ୍ତିଗତ, ରାଜନୈତିକ, ପେସାଗତ ଦିଗ ପ୍ରତି ଧ୍ୟାନ ଦେଇ ଛାନ୍ଭିନ୍ ହେଉଛି । ହେଲେ ହତ୍ୟା ପଛର କାରଣ ନେଇ ପୁଲିସ ଏବେ ବି ଅନ୍ଧାରରେ । ତେବେ ସିସିଟିଭି ଫୁଟେଜ ଆଧାରରେ ଚାରି ଜଣ ସନ୍ଦିଗ୍ଧଙ୍କୁ ଅଟକ ରଖାଯାଇଥିବା ସୂଚନା ମିଳିଛି । ଏହି ସନ୍ଦିଗ୍ଧମାନେ ବ୍ରହ୍ମପୁର ବାହାରର ବାସିନ୍ଦା ବୋଲି କୁହାଯାଉଛି ।
ଏସ୍ପି ଓ ବୈଦ୍ୟନାଥପୁର ଥାନା ଆଇଆଇସି ସୁଚିତ୍ରା ପରିଡ଼ା ବୁଧବାର ସକାଳୁ ଏସ୍ଏନ୍ଟି ରୋଡ଼ରେ ଥିବା ପୀତବାସ ପଣ୍ଡାଙ୍କ ବ୍ୟକ୍ତିଗତ ଚାମ୍ବରରେ ପହଞ୍ଚି ସେଠାରେ ଥିବା କେସ୍ ରେକର୍ଡ ଯାଞ୍ଚ କରିଥିଲେ । ପୀତବାସଙ୍କ ଦୁଇଜଣ ସହଯୋଗୀଙ୍କୁ ଥାନାକୁ ଡାକି ବିଭିନ୍ନ ପଚରାଉଚରା ହୋଇଛି । ସହରର ପ୍ରାୟ ୨୦ଜଣ ଅପରାଧୀଙ୍କୁ ଥାନାକୁ ଡାକି ଜେରା ପରେ ଛାଡ଼ିଛ । ଆଉ କିଛି ଜଣଙ୍କୁ ଅଟକ ରଖି ଜେରା ଚାଲିଥିବା କୁହାଯାଉଛି । ବିଶେଷ ଭାବେ ମାଉଜର କାରବାରରେ ସଂପୃକ୍ତ ଅପରାଧୀଙ୍କ ଉପରେ ନଜର ରଖାଯାଇଛି । ସେପଟେ ରାଜ୍ୟ ସରକାର ଶୀଘ୍ର ଅପରାଧୀଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଛନ୍ତି ।
ଅପରାଧୀମାନେ ଆସିଥିବା ବାଇକ୍ର ନମ୍ବର ନକଲି ଥିବା ଜଣାପଡ଼ିଛି । ନମ୍ବର ଟ୍ରାକ୍ କରି ଆଙ୍କୁଲି ନିଗମ ନଗରରେ ପୁଲିସ ଚଢ଼ଉ କରିଥିଲା । କିନ୍ତୁ ସିସିଟିଭି ଫୁଟେଜ୍ରେ ଥିବା ବାଇକ୍ ଏବଂ ଆଙ୍କୁଲିରେ ଥିବା ବାଇକ୍ ଭିନ୍ନ ଭିନ୍ନ । ପ୍ରାଥମିକ ତଦନ୍ତରୁ ଅପରାଧୀମାନଙ୍କ ସୁରାକ ମିଳିଛି । ସେମାନଙ୍କୁ ଖୁବ ଶୀଘ୍ର ଧରାଯିବ । ୬ଟି ଟିମ୍ ଭିତରୁ ଗୋଟିଏ ଟିମ୍ ଘଟଣା ଦିନ ସନ୍ଧ୍ୟାଠାରୁ ରାତି ପର୍ଯ୍ୟନ୍ତ ପୀତବାସ କେଉଁ ରାସ୍ତାରେ ଯାଉଥିଲେ ତାହାର ତଥ୍ୟ ସଂଗ୍ରହ କରି ଯାଞ୍ଚ କରୁଛନ୍ତି । ଆଉ ଗୋଟିଏ ଟିମ୍ ସାଇଣ୍ଟିଫିକ ରିପୋର୍ଟ ଓ ଅଞ୍ଚଳବାସୀଙ୍କୁ ପଚରାଉଚରା କରି ବୟାନ ରେକର୍ଡ କରୁଛନ୍ତି । ଅପରାଧୀଙ୍କ ଗତିବିଧି ଉପରେ ନଜର ରଖିଛନ୍ତି । ଆଉ ଗୋଟିଏ ଟିମ୍ ପୀତବାସ ପଣ୍ଡାଙ୍କ କଲ୍ ରେକର୍ଡ ଏବଂ ସେହି ଅଞ୍ଚଳର ମୋବାଇଲ କଲ୍ଗୁଡିକର ରେକର୍ଡ ଯାଞ୍ଚ କରୁଛନ୍ତି । ଆଉ ଏକ ଟିମ୍ ତାଙ୍କ ସହ କାହାର ଶତ୍ରୁତା ଥିଲା ସେ ଦିଗରେ ତଦନ୍ତ ଜାରି ରଖିଛି ।
ସହରରେ ୬୦ରୁ ୭୦ ଜାଗାର ସିସିଟିଭି ଫୁଟେଜ ସଂଗ୍ରହ କରାଯାଇଛି । ଅପରାଧୀ ଖସିପାରିବେ ନାହିଁ ସେମାନଙ୍କୁ ଧରିବାକୁ ଉଦ୍ୟମ କରାଯାଉଥିବା ଏସ୍ପି କହିଛନ୍ତି । ସହରରେ ସିସିଟିଭି ଫୁଟେଜ୍ ଯାଞ୍ଚ ସମୟରେ କିଛି ତଥ୍ୟ ପୁଲିସ ହାତ ଲାଗିଥିବା ସୂଚନା ମିଳିଛି । ଅପରାଧୀମାନେ ପୀତବାସଙ୍କୁ ପିଛା କରିଥିଲେ । ସେ ନୂଆ ବସ୍ଷ୍ଟାଣ୍ଡ ରୋଡ୍ ହୋଟେଲ୍ ଭୁପତିରୁ ଖାଦ୍ୟ ସାମଗ୍ରୀ କିଣି ଘରକୁ ଫେରୁଥିବା ସମୟରେ ପିଛା କରିଥିଲେ । ହତ୍ୟାକାରୀ ଯୋଜନାବଦ୍ଧ ଭାବେ ସିଙ୍ଗଲ୍ ରାଉଣ୍ଡ ପିସ୍ତଲ ବ୍ୟବହାର କରିଥିଲେ । ଘଟଣା ପରେ ଅପରାଧୀଦ୍ୱୟ ଗୋକର୍ଣ୍ଣେଶ୍ୱର ମନ୍ଦିର ପାଶ୍ୱର୍ ରାସ୍ତା ହୋଇ ଲୋଚପଡ଼ା ହୋଇ ସହର ବାହାରକୁ ଯାଇଥିବା ଜଣାପଡ଼ିଛି ।
ଏସ୍ପି ଓ ଆଇଆଇସି ଆଜି ପୀତବାସଙ୍କ ବ୍ୟକ୍ତିଗତ ଚାମ୍ବରରେ କିଛି ତଥ୍ୟ ସଂଗ୍ରହ କରିଥିବା ସୂଚନା ମିଳିଛି । ପୀତବାସ ଅନେକ ଘଟଣା, ଲିଜ୍ ଓ ଟେଣ୍ଡର ସମ୍ପର୍କରେ ସୂଚନା ଅଧିକାର ଆଇନ୍ ବଳରେ ତଥ୍ୟ ମାଗିଥିବା ବେଳେ ସେ କୋର୍ଟ ବାହାରେ ମଧ୍ୟ କିଛି ଘଟଣାର ସମାଧାନ କରୁଥିଲେ । ଯାହାର ତଥ୍ୟ ପାଇଛି ପୁଲିସ । ରାଜନୈତିକ କ୍ଷେତ୍ରରେ ମଧ୍ୟ ସେ ଅନେକ ଲୋକଙ୍କ ବାଟରେ କଣ୍ଟା ଥିଲେ । କିଛି ଅପରାଧୀକ ମାମଲାର ଅଭିଯୁକ୍ତଙ୍କ ସେ ମାମଲା ପରିଚାଳନା କରୁଥିଲେ । କିଛି ପ୍ରତିଷ୍ଠିତ ବ୍ୟବସାୟୀଙ୍କୁ ମଧ୍ୟ ସେ ସହଯୋଗର ହାତ ବଢ଼ାଉଥିଲେ ।
ସେହିଭଳି ରାଜନୈତିକ ଦୃଷ୍ଟିରୁ ମଧ୍ୟ ବିଭିନ୍ନ ବିଷୟ ଚର୍ଚ୍ଚା ହେଉଛି । ଗତବର୍ଷ ଜଣେ ନେତାଙ୍କ ଉପରକୁ ବୋମାମାଡ଼ ହୋଇଥିଲା । ଏନେଇ ଗୋସାଇଁନୂଆଗାଁ ଥାନାରେ ଏତଲା ହୋଇଥିଲା । ଏତଲାରେ ପୀତବାସଙ୍କ ନାମ ମଧ୍ୟ ଲେଖାଯାଇଥିଲା । କିନ୍ତୁ ତାଙ୍କର ସଂପୃକ୍ତି ନପାଇବାରୁ ପୁଲିସ ତାଙ୍କ ନାମରେ ଏତଲା କରିନଥିଲା । ପୁଣି ଗୋପାଳପୁର ଗଣବଳାତ୍କାର ମାମଲାକୁ ନେଇ ସାମାଜିକ ଗଣମାଧ୍ୟମରେ ଜଣେ ବିଧାୟକଙ୍କ ସହ ପୀତବାସଙ୍କ ତୁ ତୁ ମେମେ ହୋଇଥିଲା । ତଦନ୍ତରେ ପୁଲିସ ରାଜନୈତିକ ଦିଗ ପ୍ରତି ମଧ୍ୟ ଅଖି ରଖିଛି । ଖୁବ୍ ଶୀଘ୍ର ଘଟଣାର ପର୍ଦ୍ଦାଫାସ୍ ହେବ ବୋଲି ଏସ୍ପି ଗଣମାଧ୍ୟମକୁ କହିଛନ୍ତି । ତଦନ୍ତ କରୁଥିବା ଛଅଟି ଟିମ୍ରେ ୨ ଜଣ ଡିଏସ୍ପି, ୨ ଜଣ ଏସଡିପିଓ ଓ ୩ ଜଣ ସବ୍ ଇନ୍ସପେକ୍ଟର ଅଛନ୍ତି । ବ୍ରହ୍ମପୁର ଏସଡିପିଓଙ୍କ ନେତୃତ୍ୱରେ ଏମାନେ ତଦନ୍ତ କରିବେ ବୋଲି କୁହାଯାଇଛି ।
