ନୂଆଦିଲ୍ଲୀ: ଏୟାର ଇଣ୍ଡିଆ ଏବଂ ଇଣ୍ଡିଗୋ ଭଳି ଏୟାର ଲାଇନ୍ସ ଦିଲ୍ଲୀରୁ ଇଣ୍ଡୋନେସିଆର ବାଲିକୁ ବିମାନ ଉଡ଼ାଣ ବାତିଲ କରିଛନ୍ତି । ପ୍ରତିକୂଳ ପାଣିପାଗ ଯୋଗୁଁ ବୁଧବାର ବାଲିକୁ ଏବଂ ବାଲିରୁ ଦିଲ୍ଲୀ ବିମାନ ସେବା ବାତିଲ କରାଯାଇଛି ବୋଲି ଏୟାର ଇଣ୍ଡିଆ ପକ୍ଷରୁ ଏକ୍ସରେ ସୂଚନା ଦିଆଯାଇଛି । ବିମାନ ସେବା ବାତିଲ କରିବାର କାରଣ ସଂପର୍କରେ ଏୟାର ଲାଇନ୍ ପକ୍ଷରୁ କୁହାଯାଇଛି ଯେ, ବାଲି ଅଞ୍ଚଳରେ ଆଗ୍ନେୟଗିରି ଉଦଗୀରଣ ଯୋଗୁଁ ବୁଧବାର ବାଲିରୁ ଦିଲ୍ଲୀ ଏବଂ ଦିଲ୍ଲୀରୁ ବାଲିକୁ ବିମାନ ଉଡ଼ାଣ ବନ୍ଦ ରହିବ ।
ଯାତ୍ରୀଙ୍କ ଅସୁବିଧା ପାଇଁ କମ୍ପାନି କ୍ଷମା ମାଗିଥିବା ବେଳେ ପରବର୍ତ୍ତୀ ତାରିଖରେ ଉଡ଼ାଣ ଲାଗି ପ୍ରସ୍ତୁତି କରାଯାଉଛି ବୋଲି କହିଛି । ଯେଉଁ ଯାତ୍ରୀ ବିମାନ ଭଡ଼ା ଫେରସ୍ତ ପାଇଁ ଚାହିଁବେ ସେମାନଙ୍କୁ ଟଙ୍କା ଫେରସ୍ତ କରାଯିବ ବୋଲି ଏୟାର ଇଣ୍ଡିଆ ପକ୍ଷରୁ କୁହାଯାଇଛି । କେବଳ ଏୟାର ଇଣ୍ଡିଆ ନୁହେଁ ଅନ୍ୟ କେତେକ ଏୟାର ଲାଇନ୍ସ ମଧ୍ୟ ବାଲିକୁ ନିଜ ନିଜର ବିମାନ ଉଡ଼ାଣ ବାତିଲ କରିଛନ୍ତି ।
ଇଣ୍ଡୋନେସିଆର ହଲିଡେ ଦ୍ବୀପରେ ଭୟଙ୍କର ଆଗ୍ନେୟଗିରି ଉଦଗୀରଣ ଯୋଗୁଁ ବାହାରୁଥିବା ଧୂଆଁ ଏବଂ ପାଉଁଶ ବିମାନ ଉଡ଼ାଣ ଲାଗି ବିପଦ ସୃଷ୍ଟି କରିଛି । ଏହା ପୂର୍ବରୁ ଇଣ୍ଡିଗୋ ଏନେଇ ଏକ ସୂଚନା ଜାରି କରିଥିଲା । ସେହିଭଳି କ୍ବାଣ୍ଟାଜ୍, ଜେଟଷ୍ଟାର ଏବଂ ଭର୍ଜିନ ଅଷ୍ଟ୍ରେଲିଆ ମଧ୍ୟ ନିଜର ଯାତ୍ରୀଙ୍କୁ ଏନେଇ ସୂଚନା ଦେଇଥିବା ଜଣାପଡ଼ିଛି । ମାଉଣ୍ଟ ଲୋବଟୋବି ଲାକି ଲାକିରେ ବିସ୍ଫୋରଣ ବିମାନ ଉଡ଼ାଣକୁ ପ୍ରଭାବିତ କରିଛି ବୋଲି ଏୟାର ଲାଇନ୍ସ ସୂଚନା ଦେଇଛନ୍ତି । ସେପଟେ ଆଗ୍ନେୟଗିରି ଉଦଗୀରଣରୁ ନିର୍ଗତ ଧୂଆଁ ଏବଂ ପାଉଁଶ ୯ କିଲୋମିଟର ଉଚ୍ଚକୁ ଉଠୁଥିବା ଜଣାପଡ଼ିଛି । ତେବେ ଗୋଟିଏ ସପ୍ତାହ ପରେ ପୁଣି ଥରେ ହୋଇଥିବା ଏହି ଆଗ୍ନେୟଗିରଣ ଉଦଗୀରଣରେ ୧୦ରୁ ଅଧିକ ଜୀବନ ଯାଇଛି ।
