ଦୁବାଇ, ୨୮/୦୯: ସୁପର ସନ୍ଡେ'ରେ ଏସିଆ କପ୍ ଫାଇନାଲ୍ ଫାଇଟ୍ । ସାମ୍ନା ସାମ୍ନି ହେବେ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ । ଉଭୟ ଦଳ ମଧ୍ୟରେ ସର୍ବଦା ହାଇ ଭୋଲଟେଜ ମୁକାବିଲା ହୋଇ ଆସୁଥିବାବେଳେ ଏଥର ପରିସ୍ଥିତି ସମ୍ପୂର୍ଣ୍ଣ ଅଲଗା । ବିବାଦ ପରେ ବିବାଦ ଲାଗି ରହିଛି । ଭାରତ ମଧ୍ୟ ଆଧିପତ୍ୟ ବଜାୟ ରଖିଛି। ପରାଜୟ ଜର୍ଜରିତ ପାକିସ୍ତାନ ରକ୍ତ ଚାଉଳ ଚୋବାଉଛି । ଉଭୟ ଦଳ ମଧ୍ୟରେ ତୃତୀୟ ମୁକାବିଲା ସମ୍ପୂର୍ଣ୍ଣ କ୍ରିକେଟ୍ ଜଗତକୁ ଆକର୍ଷିତ କରି ରଖିଛି ।
ଏସିଆ କପ୍ ଇତିହାସରେ ଉଭୟ ଦଳ ପ୍ରଥମ କରି ଫାଇନାଲରେ ସାମ୍ନା ସାମ୍ନି ହେବାକୁ ଯାଉଛନ୍ତି । ଭାରତ ଟୁର୍ଣ୍ଣାମେଣ୍ଟ ଆରମ୍ଭରୁ ଅପରାଜେୟ ରହିଛି । ଲିଗ୍ ଓ ସୁପର-୪ ରାଉଣ୍ଡରେ ପାକିସ୍ତାନକୁ ହରାଇ ସାରିଛି । ଆଜି ମଧ୍ୟ ଭାରତ ଆଧିପତ୍ୟ ଜାରି ରଖି ନବମ ଟାଇଟଲ ହାସଲ କରିବାକୁ ପ୍ରସ୍ତୁତ । ଅଭିଷେକ ଶର୍ମା, ଯଶପ୍ରୀତ ବୁମରା ଓ କୁଲଦୀପ ଯାଦବଙ୍କ ପ୍ରଦର୍ଶନ ଉପରେ ଭାରତର ଭାଗ୍ୟ ନିର୍ଭର କରିବା ଆଶା କରାଯାଉଛି । ଅଭିଷେକ ଚଳିତ ଟୁର୍ଣ୍ଣାମେଣ୍ଟରେ ସର୍ବାଧିକ ରନ ଓ କୁଲଦୀପ ସର୍ବାଧିକ ୧୩ଟି ୱିକେଟ୍ ଅର୍ଜନ କରିସାରିଛନ୍ତି । ବୁମରା ଲୟରେ ରହିଲେ ପ୍ରତିପକ୍ଷର କୌଣସି ବ୍ୟାଟର ତାଙ୍କ ମୁକାବିଲା କରିପାରିବେ ନାହିଁ । ଏମାନଙ୍କ ବ୍ୟତୀତ ବରୁଣ ଚକ୍ରବର୍ତ୍ତୀ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବେ ।
ଅନେକ ଉତ୍ଥାନ ଓ ପତନ ମଧ୍ୟରେ ପାକିସ୍ତାନ ସଂଘର୍ଷ କରି ଫାଇନାଲ୍ରେ ପହଞ୍ଚିଛି । ଭାରତକୁ ହରାଇବାର କ୍ଷମତା ମଧ୍ୟ ଦଳ ନିକଟରେ ରହିଛି । ଦୁଇ ପେସ୍ ବୋଲର ସହିନ ଆଫ୍ରିଦି ଓ ହ୍ୟାରିସ ରୌଫଙ୍କ ଉପରେ ଦଳର ଭାଗ୍ୟ ନିର୍ଭର କରିବ । ବ୍ୟାଟିଂରେ ଫଖାର ଜମାନ, ସାହିବଜାଦା ଫରହାନ, ମହମ୍ମଦ ନୱାଜ ଓ ସଲମାନ ଆଘା ବଡ଼ ସ୍କୋର ସଂଗ୍ରହ କଲେ ପାକିସ୍ତାନର ପରାଜୟ ଧାରାରେ ବ୍ରେକ୍ ଲାଗି ପାରିବ ।
ଆଜି ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ରହିବ । ଅଭିଷେକ ଶର୍ମାଙ୍କୁ ସହଳ ଆଉଟ କରିବା ପାକିସ୍ତାନ ବୋଲରଙ୍କ ମୁଖ୍ୟ ଦାୟିତ୍ୱ ରହିବ । କ୍ରମାନ୍ୱୟରେ ୩ଟି ଅର୍ଦ୍ଧଶତକ ଅର୍ଜନ କରିସାରିଥିବା ଅଭିଷେକ ମୁଖ୍ୟ ଆକର୍ଷଣ ସାଜିବେ । ଶ୍ରୀଲଙ୍କା ବିପକ୍ଷ ମ୍ୟାଚ୍ରେ ବିଶ୍ରାମ ନେଇଥିବା ଯଶପ୍ରୀତ ବୁମରା ପୁଣି ଥରେ ପେସ୍ ବୋଲିଂ ବିଭାଗ ସମ୍ଭାଳିବେ । ପାକିସ୍ତାନକୁ ଜିତିବାକୁ ହେଲେ ପ୍ରଥମେ ବ୍ୟାଟିଂ ବିଭାଗକୁ ବଡ଼ ସ୍କୋର ସଂଗ୍ରହ କରିବାକୁ ହେବ । ଫର୍ମ ହରାଇଥିବା ସାଏମ ଆୟୁବ, ଫଖାର ଜମାନ, ସାହିବଜାଦ ଫରହାନଙ୍କ ବ୍ୟାଟ୍ରୁ ଉପଯୋଗୀ ସ୍କୋର ଆଶା କରାଯାଉଛି ।
ଦୁବାଇ ପିଚ୍ ମନ୍ଥର ରହିଥିବାରୁ ସ୍ପିନରମାନେ ପ୍ରମୁଖ ଭୂମିକା ଗ୍ରହଣ କରିବେ । ରାତ୍ରିରେ କାକର ପଡ଼ିବାର ଯଥେଷ୍ଟ ସମ୍ଭାବନା ରହିଛି । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । ପ୍ରାରମ୍ଭରୁ ପିଚ୍ ନୂଆ ବଲ୍ରେ ପେସ୍ ବୋଲରଙ୍କୁ ସହାୟତା କରିବ ।
ସମ୍ଭାବ୍ୟ ଦଳ
ଭାରତ: ଅଭିଷେକ ଶର୍ମା, ଶୁଭମନ ଗିଲ୍, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ସଞ୍ଜୁ ସାମସନ, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, କୁଲଦୀପ ଯାଦବ, ଯଶପ୍ରୀତ ବୁମରା, ବରୁଣ ଚକ୍ରବର୍ତ୍ତୀ ।
ପାକିସ୍ତାନ: ସାହିବଜାଦା ଫରହାନ, ଫଖାର ଜମାନ, ସାଏମ ଆୟୁବ, ସଲମାନ ଅଲି ଆଘା (ଅଧିନାୟକ), ହୁସେନ ତଲତ, ମହମ୍ମଦ ନୱାଜ, ମହମ୍ମଦ ହାରିସ, ଫହିମ ଅଶ୍ରଫ, ସହିନ ଆଫ୍ରିଦି, ହ୍ୟାରିସ ରୌଫ, ଅବରାର ଅହମ୍ମଦ ।
