ନୂଆଦିଲ୍ଲୀ: ଭୂମିକମ୍ପରେ ଦୋହଲିଲା ପାକିସ୍ତାନ। ପାକିସ୍ତାନର ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଜାରି କରିଥିବା ତଥ୍ୟ ଅନୁଯାୟୀ, ସୋମବାର ଦେଶରେ ଆଉ ଏକ ୪.୭ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଏହି ଭୂକମ୍ପର କେନ୍ଦ୍ରସ୍ଥଳ ୧୦ କିଲୋମିଟର ଗଭୀରତାରେ ରହିଥିଲା ବୋଲି ଜଣାପଡିଛି। ଉଲ୍ଲେଖଯୋଗ୍ୟ, ଶନିବାର ଏବଂ ରବିବାର ମଧ୍ୟ ପାକିସ୍ତାନରେ ୪.୦ ତୀବ୍ରତାର ମଧ୍ୟମ ଧରଣର ଭୂମିକମ୍ପ ଅନୁଭୂତ ହୋଇଥିଲା।
ଏହି ଭୂମିକମ୍ପ, ଭାରତୀୟ ସମୟ ସକାଳ ୧୧ଟା ୧୨ ସମୟରେ ଅନୁଭୂତ ହୋଇଥିଲା। ଏନେଇ ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟରେ, NCS ଭୂମିକମ୍ପର ନିର୍ଦ୍ଦେଶାଙ୍କ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲା।
ଖବର ସରବରାହ ସଂସ୍ଥା ANI ଦେଇଥିବା ତଥ୍ୟ ଅନୁଯାୟୀ, ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ସୋମବାର ଅନୁଭୂତ ହୋଇଥିବା ଅଗଭୀର ଭୂମିକମ୍ପ ଗଭୀର ଭୂମିକମ୍ପ ଅପେକ୍ଷା ଅଧିକ ବିପଦପୂର୍ଣ୍ଣ ହୋଇପାରେ। କାରଣ ଏପରି ଭୂକମ୍ପରେ ଭୂକମ୍ପୀୟ ତରଙ୍ଗ ପୃଥିବାର ତଳ ପୃଷ୍ଠକୁ ଯିବା ପାଇଁ କମ୍ ଦୂରତା ଥାଏ। ଯାହା ପ୍ରାୟତଃ ଅଧିକ ଶକ୍ତିଶାଳୀ କମ୍ପନ କରାଇବା ସହ ଅଧିକ କ୍ଷତି ଘଟାଇଥାଏ।
ଆପଣଙ୍କୁ ଜଣାଇରଖୁ ଯେ, ପାକିସ୍ତାନ ଏକ ଭୂକମ୍ପ ଜନିତ ସକ୍ରିୟ ଅଞ୍ଚଳରେ ଅବସ୍ଥିତ। ଯାହାଦେଇ ଅନେକ ପ୍ରମୁଖ ଫଲ୍ଟ ଦ୍ୱାରା ଅତିକ୍ରମ କରିଛି। ବେଲୁଚିସ୍ତାନ, ଖାଇବର ପଖତୁନଖ୍ୱା ଏବଂ ଗିଲଗିଟ-ବାଲ୍ଟିସ୍ତାନ ଭଳି ପ୍ରଦେଶ ୟୁରେସିଆନ୍ ପ୍ଲେଟର ଦକ୍ଷିଣ ପାର୍ଶ୍ୱରେ ଅବସ୍ଥିତ ହୋଇଥିବା ବେଳେ, ସିନ୍ଧ ଏବଂ ପଞ୍ଜାବ ଭାରତୀୟ ପ୍ଲେଟର ଉତ୍ତର-ପଶ୍ଚିମ ପାର୍ଶ୍ୱରେ ଅବସ୍ଥିତ। ଏହି ଭୂକମ୍ପୀୟ ସଂଘର୍ଷ ଦେଶକୁ ବିଶେଷ ଭାବରେ ଭୂମିକମ୍ପ ପାଇଁ ସମ୍ବେଦନଶୀଳ କରିଥାଏ।
ଐତିହାସିକ ଭାବେ ଦେଖିବାକୁ ଗଲେ, ଏହି ଅଞ୍ଚଳଟି ଭୟଙ୍କର ଭାବେ ଭୂକମ୍ପର ସମ୍ମୁଖୀନ ହୋଇଛି, ଯେଉଁଥିରେ ୧୯୪୫ ମସିହାରେ ବେଲୁଚିସ୍ତାନରେ ୮.୧ ତୀବ୍ରତାର ଭୂମିକମ୍ପ ମଧ୍ୟ ସାମିଲ ଅଛି। ସିନ୍ଧରେ କମ୍ ଭୂମିକମ୍ପ ଅନୁଭୂତ ହୁଏ, କିନ୍ତୁ କୌଣସି ଅଞ୍ଚଳ ସମ୍ପୂର୍ଣ୍ଣ ଭାବରେ ଭୂକମ୍ପ ମୁକ୍ତ ନୁହେଁ। କର୍ତ୍ତୃପକ୍ଷ ବାସିନ୍ଦାଙ୍କୁ ପରବର୍ତ୍ତୀ ଝଟକା ପାଇଁ ସତର୍କ ରହିବାକୁ ଏବଂ ସୁରକ୍ଷା ପ୍ରୋଟୋକଲ ପାଳନ କରିବାକୁ ଅନୁରୋଧ କରିଛନ୍ତି।
