ଜଳେଶ୍ୱର, ୩୦/୦୬: ସୁବର୍ଣ୍ଣରେଖା ନଦୀରେ ଦ୍ଵିତୀୟ ଥର ପାଇଁ ବନ୍ୟା ଦେଖାଦେଇଛି । ଉପର ମୁଣ୍ଡରେ ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ନଦୀରେ ଜଳସ୍ତର ବଢ଼ିବାରେ ଲାଗିଛି । ବାଲେଶ୍ବର ରାଜଘାଟ ଠାରେ ବିପଦ ସଂକେତ ୧୦.୩୬ ମିଟର ଥିଲା ବେଳେ ସକାଳ ୬ଟା ସୁଦ୍ଧା ବନ୍ୟା ପାଣି ୧୧.୩୨ ମିଟରରେ ପ୍ରବାହିତ ହେଉଛି । ଯାହା ଫଳରେ ବାଲିଆପାଳ ବ୍ଲକର ୬ଟି ପଞ୍ଚାୟତର ୨୦ରୁ ଅଧିକ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡିଛି ।
ସେପଟେ ଜଳକା ନଦୀରେ ମଧ୍ୟ ବନ୍ୟା ସ୍ଥିତି ଦେଖିବାକୁ ମିଳିଛି । ମାଥାନି ଠାରେ ବିପଦ ସଂକେତ ୬.୫୦ମିଟର ଥିବା ବେଳେ ସୋମବାର ସକାଳ ୬ଟା ସୁଦ୍ଧା ଜଳସ୍ତର ୬.୯୦ମିଟରରେ ପ୍ରବାହିତ ହେଉଛି । ଯାହା ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
