ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପୂର୍ବତନ ପରାମର୍ଶଦାତା ଏବଂ ସ୍ପଷ୍ଟବାଦୀ ସମାଲୋଚକ ଜନ୍ ବୋଲ୍ଟନ୍ ଶୁକ୍ରବାର ଦିନ ମେରିଲ୍ୟାଣ୍ଡ କୋର୍ଟରେ ଆତ୍ମସମର୍ପଣ କରିଛନ୍ତି। ଗୁଇନ୍ଦା ସୂଚନାର ଅପବ୍ୟବହାର କରିବା ଅଭିଯୋଗରେ ତାଙ୍କ ଉପରେ ମାମଲା ଚାଲିଥିଲା ବୋଲି ସୂଚନା ମିଳିଛି। ଗୁରୁବାର ତାଙ୍କ ବିରୁଦ୍ଧରେ ଦେଶଦ୍ରୋହ ଆଇନ ଅନୁଯାୟୀ ୧୮ଟି ଅଭିଯୋଗ ଲଗାଯାଇଥିଲା। ଗୁପ୍ତ ସୂଚନା ଏବଂ ବୈଠକର ନୋଟ୍ ସମେତ ସମ୍ବେଦନଶୀଳ ସୂଚନାକୁ ସେ ତାଙ୍କ ପତ୍ନୀ ଏବଂ ଝିଅଙ୍କ ସହ ସେୟାର କରିଥିଲେ, ଯାହାକୁ ସେ ଏକ ପୁସ୍ତକରେ ବ୍ୟବହାର କରିବାକୁ ଚାହୁଁଥିଲେ ବୋଲି ତାଙ୍କ ବିରୁଦ୍ଧରେ ଅଭିଯୋଗ ରହିଛି।
ବୋଲ୍ଟନ୍ ଏହି ଅଭିଯୋଗଗୁଡ଼ିକୁ ଟ୍ରମ୍ପଙ୍କ ଦ୍ୱାରା କ୍ଷମତାର ଅପବ୍ୟବହାର ଏବଂ ରାଜନୈତିକ ବିରୋଧୀମାନଙ୍କୁ ଟାର୍ଗେଟ କରିବାର ପ୍ରୟାସ ବୋଲି ବର୍ଣ୍ଣନା କରିଛନ୍ତି। ଗତ କିଛି ସପ୍ତାହ ମଧ୍ୟରେ ଜଣେ ପ୍ରମୁଖ ଟ୍ରମ୍ପ ସମାଲୋଚକଙ୍କ ବିରୁଦ୍ଧରେ ଏହା ତୃତୀୟ ଅଭିଯୋଗ। ବୋଲ୍ଟନଙ୍କ ଓକିଲ କହିଛନ୍ତି ଯେ ସେ ବେଆଇନ ଭାବରେ କୌଣସି ସୂଚନା ସେୟାର କିମ୍ବା ସଂରକ୍ଷଣ କରିନାହାଁନ୍ତି। ଦୋଷୀ ସାବ୍ୟସ୍ତ ହେଲେ, ବୋଲ୍ଟନଙ୍କୁ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ହୋଇପାରେ ବୋଲି ଅନୁମାନ କରାଯାଉଛି।
ବୋଲ୍ଟନଙ୍କ ବିରୋଧରେ ଥିବା ୧୮ଟି ଅଭିଯୋଗରେ ଏହା ମଧ୍ୟ ଅଭିଯୋଗ କରାଯାଇଛି ଯେ ଇରାନ ସହିତ ଜଡିତ ହ୍ୟାକର୍ସମାନେ ବୋଲ୍ଟନଙ୍କ ଇମେଲ୍ ଆକାଉଣ୍ଟ୍ ହ୍ୟାକ୍ କରିଥିଲେ ଏବଂ ଗୋପନୀୟ ସୂଚନା ହାସଲ କରିଥିଲେ। ବୋଲ୍ଟନ ୨୦୨୧ ମସିହାରେ ଫେଡେରାଲ୍ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (FBI)ଙ୍କୁ ତାଙ୍କ ଇମେଲ୍ ବିଷୟରେ ଜଣାଇଥିଲେ। କିନ୍ତୁ ସେ ସେହି ଆକାଉଣ୍ଟରୁ ଗୋପନୀୟ ସୂଚନା ସେୟାର କରିଥିବା ପ୍ରକାଶ କରି ନଥିଲେ, ଯାହା ବର୍ତ୍ତମାନ ହ୍ୟାକର୍ସଙ୍କ ହାତରେ ଥିଲା।
ବୋଲ୍ଟନ ଜଣେ ରିପବ୍ଲିକାନ୍ ପାର୍ଟିର ବୈଦେଶିକ ନୀତି ବିଶେଷଜ୍ଞ ଯିଏ ନିଜର କଠୋର ବୈଦେଶିକ ନୀତି ଏବଂ ଯୁଦ୍ଧ-ସମର୍ଥକ ମନୋଭାବ ପାଇଁ ଆମେରିକାରେ ବେଶ ଜଣାଶୁଣା। ସେ ତାଙ୍କ ପ୍ରଥମ କାର୍ଯ୍ୟକାଳରେ ଟ୍ରମ୍ପଙ୍କ ସହିତ ଏକ ବର୍ଷରୁ ଅଧିକ ସମୟ ପାଇଁ କାର୍ଯ୍ୟ କରିଥିଲେ। କିନ୍ତୁ ୨୦୧୯ ମସିହାରେ ତାଙ୍କୁ ବହିଷ୍କାର କରାଯାଇଥିଲା। ପରେ ସେ ଟ୍ରମ୍ପଙ୍କୁ କଡ଼ା ସମାଲୋଚନା କରି ଏକ ପୁସ୍ତକ ମଧ୍ୟ ପ୍ରକାଶ କରିଥିଲେ।
ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ ବୋଲ୍ଟନ୍ ୧୭ ମାସ ପାଇଁ ଜାତୀୟ ସୁରକ୍ଷା ପରାମର୍ଶଦାତା (NSA) ଭାବରେ କାର୍ଯ୍ୟ କରିଥିଲେ। ୨୦୨୦ ମସିହାରେ ସେ ତାଙ୍କର ପୁସ୍ତକ "ଦି ରୁମ୍ ହ୍ୱେୟାର୍ ଇଟ୍ ହାପେଣ୍ଡ୍" ପ୍ରକାଶ କରିଥିଲେ। ଯେଉଁଥିରେ ସେ ଟ୍ରମ୍ପଙ୍କ ବୈଦେଶିକ ନୀତିକୁ ତୀବ୍ର ସମାଲୋଚନା କରିଥିଲେ। ଟ୍ରମ୍ପ ପ୍ରଶାସନ ଯୁକ୍ତି ଦର୍ଶାଇଥିଲା ଯେ ପୁସ୍ତକରେ ଅନେକ ସମ୍ବେଦନଶୀଳ ଏବଂ ଗୋପନୀୟ ସୂଚନା ରହିଛି। ତେବେ ବୋଲ୍ଟନଙ୍କ ଓକିଲ ଦାବି କରିଥିଲେ ଯେ ହ୍ୱାଇଟ୍ ହାଉସର ଜାତୀୟ ସୁରକ୍ଷା ପରିଷଦ ଏହାକୁ ପ୍ରକାଶନଯୋଗ୍ୟ ବୋଲି ଅନୁମତି ପ୍ରଦାନ କରିଛି।
