ଭୁବନେଶ୍ୱର,୧୧/୧୦: ପୁଲିସ ଏସ୍ଆଇ ଲିଖିତ ପରୀକ୍ଷା କେଳେଙ୍କାର ତଦନ୍ତ ଗତ ୧୦ ଦିନ ହେବ କ୍ରାଇମ୍ବ୍ରାଞ୍ଚ କରୁଛି । ହେଲେ ଏପର୍ଯ୍ୟନ୍ତ ଘଟଣା ପଛର ମାଷ୍ଟର ମାଇଣ୍ଟ ଧରାପଡ଼ି ନାହାନ୍ତି । ଏହାରି ଭିତରେ ବଡ଼ ଖବର ସାମ୍ନାକୁ ଆସିଛି । ସରକାରଙ୍କୁ ଅଡୁଆରେ ପକାଉଥିବା ଓଡ଼ିଶା ପୁଲିସ ନିଯୁକ୍ତି ବୋର୍ଡ(ଓପିଆର୍ବି)କୁ ଉଚ୍ଛେଦ କରାଯିବ ବୋଲି ଅତି ବିଶ୍ୱସ୍ତସୂତ୍ରରୁ ଜଣାପଡ଼ିଛି । ପୁଲିସ୍ର ସମସ୍ତ ପରୀକ୍ଷା ଏକ ବଡ଼ ଘରୋଇ ସଂସ୍ଥା ଦ୍ୱାରା କରିବାକୁ ସରକାର ଯୋଜନା କରିଛନ୍ତି । ଖୁବ୍ଶୀଘ୍ର ଏନେଇ ବିଜ୍ଞପ୍ତି ପ୍ରକାଶ ପାଇବ ବୋଲି ଜଣାପଡ଼ିଛି ।
ମିଳିଥିବା ଖବର ଅନୁସାରେ ଷ୍ଟାପ୍ ସିଲେକ୍ସନ୍ କମିଶନ ଯେତେବେଳେ ପୁଲିସ ପରୀକ୍ଷା କରୁଥିଲା ସବୁ ଠିକ୍ ଠାକ୍ ଥିଲା । ଯେତେବେଳେ ଓପିଆର୍ବି ହାତକୁ ପରୀକ୍ଷା ଗଲା ଗୋଟିଏ ବର୍ଷ ପରେ ବାରମ୍ବାର ଅକ୍ଷମଣୀୟ ତ୍ରୁଟି ଦେଖା ଦେଲା । ଏହାକୁ ନଜରରେ ରଖି ସରକାର ଓପିଆର୍ବିକୁ ଉଚ୍ଛେଦ କରିବାକୁ ଯୋଜନା କରିଛନ୍ତି ।
ସେପଟେ ଓପିଆର୍ବି ନିଜ ଦୋଷ ଲୁଚାଇବାକୁ ଯାଇ ପରୀକ୍ଷା ପରିଚାଳନା କରିବା ପାଇଁ ଟେଣ୍ଡର ପାଇଥିବା ସଂସ୍ଥା ଆଇଟିଆଇକୁ ନୋଟିସ୍ କରିଛି । ୧୦ ଦିନ ମଧ୍ୟରେ ପକ୍ଷ କରିବାକୁ ଓପିଆରବି ନିର୍ଦ୍ଦେଶ ଦେଇଛି । ରାଜ୍ୟ ସରକାର କୌଣସି ନିଯୁକ୍ତି ପରୀକ୍ଷା ଲାଗି ଏକ ନିୟମାବାଳୀ ପ୍ରସ୍ତୁତ କରିଛନ୍ତି । ନିଯୁକ୍ତି ପରୀକ୍ଷା କରୁଥିବା ସଂସ୍ଥା ଟେଣ୍ଡର ପାଇବା ପରେ ଅନ୍ୟ କାହାକୁ ଦେଇ ପାରିବେ ନାହିଁ । ଯଦି ଦେବେ ତାହେଲେ ସେ ସରକାରଙ୍କୁ ଅବଗତ କରିବା କଥା । ସେହିପରି ଓପିଆର୍ବିଠାରୁ ଏସ୍ଆଇ ନିଯୁକ୍ତି ପରୀକ୍ଷା ଟେଣ୍ଡର ପାଇଥିବା ଆଇଟିଆଇ ଏହାକୁ ଖୋଲା ଉଲ୍ଲଙ୍ଘନ କରିଥିଲା । ଏସ୍ଆଇ ପରୀକ୍ଷା କରିବା ପାଇଁ ଟେଣ୍ଡର ପାଇଥିଲା ଆଇଟିଆଇ । ନିଜେ ପରୀକ୍ଷା ନ କରି ଏହାକୁ ସିଲିକନ୍ ଟେକ୍ଲାବ୍ ପ୍ରାଇଭେଟ୍ ଲିମିଟେଡ୍କୁ ହସ୍ତାନ୍ତର କରିଥିଲା । ସିଲିକନ୍ ନିଜେ ପରୀକ୍ଷା ନ କରି ଏହି ଦାୟିତ୍ୱ ପାନ୍ସଫ୍ଟ ଟେକ୍ ପ୍ରାଇଭେଟ୍ ଲିମିଟେଡ୍କୁ ଦେଇଥିଲା । ସିଲିକନ୍କୁ ଦାୟିତ୍ୱ ଦେବା ବେଳେ ଆଇଟିଆଇ ଏବିଷୟରେ ଓପିଆର୍ବିକୁ ଜଣାଇଥିଲା । ହେଲେ ସିଲିକନ୍ଠାରୁ ଏହି ଦାୟିତ୍ୱ ଯେତେବେଳେ ପାନ୍ସଫ୍ଟକୁ ଗଲା ସେ ବିଷୟରେ ଆଇଟିଆଇ କାହାରିକୁ ଜଣାଇ ନଥିଲା । କ’ଣ ପାଇଁ ଏ ବିଷୟରେ ଓପିଆର୍ବିକୁ ଜଣା ଗଲାନାହିଁ ସେଥିପାଇଁ ଆଇଟିଆଇକୁ ନୋଟିସ୍ କରାଯାଇଛି । ନୋଟିସ୍ରେ ଓପିଆର୍ବି ଉଲ୍ଲେଖ କରିଛି ଏହି ଜାଲିଆତି ପାଇଁ ତମ ସହ ହୋଇଥିବା ଟେଣ୍ଡର ବାତିଲ କରାଯାଇ ଅନ୍ୟ ସଂସ୍ଥାକୁ ଟେଣ୍ଡର ଦିଆଯିବ । କ’ଣ ପାଇଁ ଟେଣ୍ଡର ବାତିଲ ହେବ ନାହିଁ ୧୦ ଦିନ ମଧ୍ୟରେ ଜଣାଅ ବୋଲି ଓପିଆର୍ବି କହିଛି ।
ସବୁଠାରୁ ବଡ଼ କଥା ହେଲା ଓପିଆରବି ସରକାର ତିଆରି କରିଥିବା ନିୟମକୁ ଖେଲାଖୋଲି ଉଲ୍ଲଙ୍ଘନ କରିଥିଲା । ଏସ୍ଆଇ ପରୀକ୍ଷା କରିବା ପାଇଁ ଟେଣ୍ଡର ପାଇଥିଲା ଆଇଟିଆଇ । ନିଜେ ପରୀକ୍ଷା ନ କରି ପ୍ରଥମେ ରିଚ୍ ନାମକ ଏକ ସଂସ୍ଥାକୁ ଦେଇଥିଲା । କ’ଣ ହେଲା କେଜାଣି ଆଇଟିଆଇ ହଠାତ୍ ରିଚ୍କୁ ବାହାର କରି ଦେଇଥିଲା । ପରେ ଆଇଟିଆଇ ଏହାକୁ ସିଲିକନ୍ ଟେକ୍ଲାବ୍ ପ୍ରାଇଭେଟ୍ ଲିମିଟେଡ୍କୁ ହସ୍ତାନ୍ତର କରିଥିଲା । ସିଲିକନ୍ ନିଜେ ପରୀକ୍ଷା ନ କରି ଏହି ଦାୟିତ୍ୱ ପାନ୍ସଫ୍ଟ ଟେକ୍ ପ୍ରାଇଭେଟ୍ ଲିମିଟେଡ୍କୁ ଦେଇଥିଲା । ସରକାର ଗତ ମାସ ୨୨ ତାରିଖରେ ଜାରି କରିଥିବା ଏସ୍ଓପିକୁ ହେୟଜ୍ଞାନ କରିଥିଲା ଓପିଆରବି । ଫଳରେ ଏମିତି ବିଭ୍ରାଟ୍ ମୁଣ୍ଡ ଟେକିଛି । ଓପିଆରବି ନିଜକୁ ବଞ୍ଚାଇବାକୁ ଯାଇ ଆଇଟିଆଇକୁ ନୋଟିସ୍ ଦେଇ କାମ ସାରି ଦେଇଛି ।
ଏହି ଜାଲିଆତି ଘଟଣାରେ ଓପିଆରବିଠାରୁ ପାନ୍ସଫ୍ଟର ଅଧିକାରୀ ଓ କର୍ମଚାରୀଙ୍କ ଲିଙ୍କ୍ ରହିଛି । ହେଲେ ସେମାନଙ୍କ ପାଖରେ ପହଞ୍ଚି ନାହିଁ କ୍ରାଇମ୍ବ୍ରାଞ୍ଚ । ଧରିବା ତ’ ଦୂରେ ଥାଉ ସେମାନଙ୍କୁ ତଦନ୍ତ ପରିସରଭୁକ୍ତ କରିନାହିଁ । ତଦନ୍ତ ଏମିତି ମୋଡରେ ଠିଆ ହୋଇଛି ଯେ ଲାଗୁଛି ଯେମିତି ଏଥିରେ ସାମିଲ ଥିବା ସବୁ ଅଭିଯୁକ୍ତ ଖସି ଯିବେ । ସେପଟେ ପରୀକ୍ଷା ପାଇଁ ଆଇଟିଆଇ ଓ ସିଲିକନ୍ ପାଇଁ ଜଣେ ପ୍ରଫେସ୍ର କାମ କରୁଥିଲେ । ଉକ୍ତ ପ୍ରଫେସର ଓପିଆରବିର ଅଧ୍ୟକ୍ଷଙ୍କୁ ମଧ୍ୟ ଦେଖା କରି ପ୍ରଶ୍ନପତ୍ର ଦେଇଥିଲେ। ହେଲେ ପ୍ରଶ୍ନପତ୍ର ଲିକ୍ ହେଲା କେମିତି ସେ ବିଷୟରେ କ୍ରାଇମ୍ବ୍ରାଞ୍ଚ ଖୋଳତାଡ଼ ଜାରି ରଖିଛି । ହେଲେ ପ୍ରଫେସରଙ୍କୁ ଏପର୍ଯ୍ୟନ୍ତ ପଚରାଉଚରା କରିନି କ୍ରାଇମ୍ବ୍ରାଞ୍ଚ ।
